Coastal Defense | കടൽക്ഷോഭം: കാസർകോട്ടെ തീരങ്ങളെ സംരക്ഷിക്കാൻ 'ടെട്രോപോഡുകൾ' വരുമോ? ജലസേചന വകുപ്പ് സമർപ്പിച്ച നിർദേശത്തിൽ പ്രതീക്ഷ

കാസർകോട്: (KasargodVartha) കാലവർഷം കനക്കുമ്പോൾ ഭീതിയുടെ നിഴലിലാകുന്ന കാസർകോട് തീരങ്ങൾക്ക് ആശ്വാസമായി ടെട്രോപോഡുകൾ എത്തുമോയെന്ന് ഉറ്റുനോക്കുകയാണ് ജനം. തലപ്പാടി മുതൽ തൃക്കണ്ണാട് വരെയുള്ള 87.65 കിലോമീറ്റർ തീരദേശത്ത് രൂക്ഷമായ കടൽക്ഷോഭം നേരിടുന്നതിന് ശാസ്ത്രീയമായ പരിഹാരം തേടി ജലസേചന ഉപവിഭാഗം സമർപ്പിച്ച പ്രൊപ്പോസലിന് അംഗീകാരം ലഭിച്ചാൽ തീരദേശവാസികളുടെ ദുരിതങ്ങൾക്ക് അറുതിവരും.

വർഷങ്ങളായി തീരദേശവാസികൾ അനുഭവിക്കുന്ന ദുരിതങ്ങൾക്ക് അറുതിവരുത്താൻ ശാശ്വതമായ പദ്ധതി വേണമെന്ന ആവശ്യം ശക്തമായിരുന്നു. 'മൊഗ്രാൽ ദേശീയവേദി' സംഘടന സംസ്ഥാന സർക്കാരിന്റെ താലൂക്ക് തല അദാലത്തിൽ നൽകിയ പരാതിയിൽ ശാസ്ത്രീയമായ ടെട്രോപോഡ് പോലുള്ള സുരക്ഷാ പദ്ധതികൾ നടപ്പിലാക്കണമെന്ന് ആവശ്യപ്പെട്ടിരുന്നു. ഇതിന് മറുപടിയായി കാസർകോട് ജലസേചന ഉപവിഭാഗം എക്സിക്യൂട്ടീവ് എഞ്ചിനീയർ നൽകിയ കത്തിലാണ് ടെട്രോപോഡ് ഉപയോഗിച്ചുള്ള കടൽഭിത്തി നിർമാണത്തിനുള്ള പ്രൊപ്പോസൽ സമർപ്പിച്ച വിവരം അറിയിച്ചത്.

മഞ്ചേശ്വരം താലൂക്കിലെ കണ്വതീർഥ കടപ്പുറം, ഷിറിയ കടപ്പുറം, കോയിപ്പാടി കടപ്പുറം, നാങ്കി- കൊപ്പളം കടപ്പുറം, കാസർഗോഡ് താലൂക്കിലെ കാവുഗോളി കടപ്പുറം, കീഴൂർ ഹാർബറിന് സമീപം കീഴൂർ കടപ്പുറം, ഉദുമ ഗ്രാമപഞ്ചായത്തിന് കീഴിലുള്ള തൃക്കണ്ണാട് ബേക്കൽ കടപ്പുറം, കാപ്പിൽ ബീച്ച്, കൊപ്പൽ-കൊവ്വൽ കടപ്പുറം എന്നീ സ്ഥലങ്ങളിലാണ് ആദ്യഘട്ടത്തിൽ ടെട്രോപോഡ് ഉപയോഗിച്ചുള്ള കടൽഭിത്തി നിർമിക്കുകയെന്നാണ് സൂചന. ഇതിനായുള്ള പ്രൊപ്പോസലാണ് സമർപ്പിച്ചിട്ടുള്ളത്.

സാധാരണയായി കടൽഭിത്തി നിർമിക്കാൻ ഉപയോഗിക്കുന്ന കരിങ്കല്ലുകൾക്ക് പകരം ടെട്രോപോഡുകൾ ഉപയോഗിക്കുന്നത് കടൽക്ഷോഭത്തെ കൂടുതൽ ഫലപ്രദമായി പ്രതിരോധിക്കാൻ സഹായിക്കുമെന്നാണ് പറയുന്നത്. കോൺക്രീറ്റ് കൊണ്ട് നിർമിക്കുന്ന ടെട്രോപോഡുകൾക്ക് നാല് കാലുകൾ ഉണ്ടാകും. ഇവയുടെ പ്രത്യേക ആകൃതി കാരണം തിരമാലകളുടെ ശക്തി കുറയ്ക്കാനും തീരം സംരക്ഷിക്കാനും സാധിക്കും.

ഈ പദ്ധതി നടപ്പിലാക്കുന്നതോടെ തീരദേശത്തെ ആയിരക്കണക്കിന് കുടുംബങ്ങൾക്ക് സുരക്ഷിതമായ ജീവിതം സാധ്യമാകുമെന്നാണ് പ്രതീക്ഷിക്കുന്നത്. കടൽക്ഷോഭം മൂലം വീടുകൾ നഷ്ടപ്പെടുന്നതും കൃഷി നശിക്കുന്നതും പതിവായ തീരദേശത്ത് ടെട്രോപോഡുകൾ സ്ഥാപിക്കുന്നതോടെ ഈ പ്രശ്നങ്ങൾക്ക് പരിഹാരമാകുമെന്നാണ് കരുതുന്നത്.

ഈ വാർത്ത എല്ലാവരിലേക്കും എത്തിക്കാൻ ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യൂ.

The people of Kasaragod are hopeful that tetrapods will be used to protect the coast from sea erosion. The Irrigation Department has submitted a proposal for the construction of seawalls using tetrapods in several coastal areas of the district.

#SeaErosion, #Tetrapods, #Kasaragod, #CoastalProtection, #KeralaGovernment, #DisasterManagement