പ്രവാചകന്‍ കാരുണ്യമാണെന്ന് പ്രഖ്യാപിക്കുകയല്ല അടയാളപ്പെടുത്തുകയാണ് വേണ്ടത്: സ്വാമി ആത്മദാസ് യമി

By Web Desk - MainNov 20, 2019, 20:03 IST

കാഞ്ഞങ്ങാട്: (www.kasargodvartha.com 20.11.2019) മത ദര്‍ശനങ്ങളിലെ കാരുണ്യങ്ങള തിരിച്ചറിയാനാവാത്തതാണ് സമുദായങ്ങള്‍ക്കിടയിലെ സംഘര്‍ഷങ്ങള്‍ക്ക് കാരണമെന്നും പ്രവാചകന്‍ കാരുണ്യമാണെന്ന് പ്രഖ്യാപിക്കുകയല്ല അടയാളടുത്തുകയാണ് വേണ്ടതെന്നും സ്വാമി ആത്മദാസ് യമി പറഞ്ഞു. അയല്‍വാസിയുടെ പട്ടിണിയകറ്റുന്നതിലൂടെ ഇത് സാധ്യമാകും. ഇതിനാവണം മുസ്ലിം സമുദായം ജാഗ്രത പുലര്‍ത്തേണ്ടതെന്നും അദ്ദേഹം പറഞ്ഞു.

കാരുണ്യമാണ് തിരുനബി എന്ന തലക്കെട്ടില്‍ ജമാഅത്തെ ഇസ്ലാമി കാസര്‍കോട് ജില്ലാ കമ്മിറ്റി സംഘടിപ്പിച്ച സ്‌നേഹ സംഗമം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ജമാഅത്തെ ഇസ്ലാമി ജില്ലാ പ്രസിഡന്റ് വി എന്‍ ഹാരിസ് അധ്യക്ഷത വഹിച്ചു. ഡയലോഗ് സെന്റര്‍ കേരള കോഡിനേറ്റര്‍ നവാസ് അസ്ഹരി മുഖ്യപ്രഭാഷണം നടത്തി. ഫാദര്‍ തോംസണ്‍, സിജോ അമ്പാട്ട്, കുറുംബ ഭഗവതി ക്ഷേത്ര സെക്രട്ടറി രാജേഷ്, ബഷീര്‍ ശിവപുരം എന്നിവര്‍ സംസാരിച്ചു. അഡ്വ. എം.സി ജോസ്, അഡ്വ: പി നാരായണന്‍, സി.എച്ച് ബാലകൃഷ്ണന്‍, കെ ഗോപാലന്‍ പള്ളിക്കര തുടങ്ങിയവര്‍ സംബന്ധിച്ചു. ജില്ലാ സെക്രട്ടറി അഷ്‌റഫ് ബായാര്‍ സ്വാഗതവും സി എ മൊയ്തീന്‍ കുഞ്ഞി നന്ദിയും പറഞ്ഞു.