സ്റ്റുഡന്റ്‌സ് പോലീസ് പദ്ധതി രാജ്യത്തിനാകെ മാതൃകാപരം: തിരുവഞ്ചൂര്‍

കാസര്‍കോട്: കേരളത്തിലാരംഭിച്ച സ്റ്റുഡന്റ്‌സ് പോലീസ് കേഡറ്റ്‌സ് പദ്ധതിയായ കുട്ടികളുടെ പോലീസ് രാജ്യത്തിനാകെ മാതൃകയാണെന്ന് ആഭ്യന്തരവകുപ്പ് മന്ത്രി തിരുവഞ്ചൂര്‍ രാധാകൃഷ്ണന്‍ പ്രസ്താവിച്ചു. ജില്ലയിലെ വിവിധ സ്‌കൂളുകളിലെ 87 ഓളം വരുന്ന സ്റ്റുഡന്റ്‌സ് പോലീസ് കേഡറ്റുകള്‍ക്ക് ചെമ്മനാട് ജമാഅത്തെ സ്‌കൂളില്‍ സംഘടിപ്പിച്ച അഞ്ച് ദിവസത്തെ വേനല്‍ക്കാല ക്യാമ്പിന്റെ സമാപനത്തോടനുബന്ധിച്ച് വെള്ളിയാഴ്ച രാവിലെ പാസിംഗ് ഔട്ട് പരേഡില്‍ സല്യൂട്ട് സ്വീകരിച്ചു സംസാരിക്കുകയായിരുന്നു മന്ത്രി.

സ്റ്റുഡന്റ്‌സ് പോലീസ് പ്രവര്‍ത്തനങ്ങളും അച്ചടക്കവും പഠിക്കാനായി രാജസ്ഥാന്‍, മഹാരാഷ്ട്ര എന്നിവിടങ്ങളില്‍ നിന്നും വിദഗ്ധ പഠന സംഘം കേരളത്തില്‍ വരാന്‍ തീരുമാനിച്ചിട്ടുണ്ട്. ഇന്ത്യന്‍ പ്രസിഡന്റും പ്രധാനമന്ത്രിയും മുന്‍ ഇന്ത്യന്‍ പ്രസിഡന്റ് അബ്ദുല്‍ കലാമും സ്റ്റുഡന്റ്‌സ് പോലീസ് പ്രവര്‍ത്തനങ്ങളെ പ്രകീര്‍ത്തിച്ചിട്ടുണ്ടെന്നും തിരുവഞ്ചൂര്‍ പറഞ്ഞു. സ്റ്റുഡന്റ്‌സ് പോലീസ് പദ്ധതി നിലവില്‍ 270 സ്‌കൂളുകളില്‍ നടപ്പാക്കി വരുന്നു. 16,000 കുട്ടി പോലീസുകളാണുളളത്. ഇത് കൂടുതല്‍ സ്‌കൂളുകളിലേക്ക് വ്യാപിപ്പിക്കാന്‍ പദ്ധതിയുളളതായി കുട്ടികളുടെ ചോദ്യങ്ങള്‍ക്ക് മന്ത്രി മറുപടി പറഞ്ഞു.

പോലീസിനെക്കുറിച്ച് പഴയകാലത്തെ അഭിപ്രായം ഇപ്പോളില്ല. മൈത്രി പോലീസ് ജനസൗഹൃദ പോലീസായി മാറി. എല്ലാ രീതിയിലും പോലീസിന്റെ പ്രവര്‍ത്തനം മെച്ചപ്പെട്ടിട്ടുണ്ട്. നിഷ്പക്ഷ നിലപാടാണ് പോലീസിന് വേണ്ടത്. ഒരു സര്‍വെ അനുസരിച്ച് ഇന്ത്യയില്‍ ഇന്ന് കേരളാ പോലീസ് ഒന്നാം സ്ഥാനത്താണുളളത്. പോലീസിനെക്കുറിച്ച് ഭയം ആവശ്യമില്ല. ബഹുമാനവും സ്‌നേഹവുമാണ് വേണ്ടത്. ആരേയും അധിക്ഷേപിക്കുക എന്നത് പോലീസിന്റെ ഗുണമല്ല. കുട്ടികളുടെ ചോദ്യത്തിന് മറുപടിയായി മന്ത്രി പറഞ്ഞു.

കുട്ടികള്‍ സ്വഭാവശുദ്ധിയുളളവരും കഠിനാധ്വാനവും നിശ്ചയദാര്‍ഢ്യവും രാജ്യസ്‌നേഹവും ഉളളവരുമായി വളരണം. എന്‍.സി. സികള്‍ക്ക് കൊടുക്കുന്ന ഗ്രേസ് മാര്‍ക്ക് സ്റ്റുഡന്‍സ് പോലീസ് സേനയിലെ കുട്ടികള്‍ക്ക് കൂടി അനുവദിക്കുമെന്ന് മന്ത്രി പ്രസ്താവിച്ചു. കൂടാതെ ലഘുഭക്ഷണത്തിനുളള അലവന്‍സ് വര്‍ധിപ്പിക്കും. സ്റ്റുഡന്റ്‌സ് പോലീസില്‍ പ്രവര്‍ത്തിച്ചവര്‍ക്ക് പോലീസ് നിയമനത്തിലും ഗ്രേസ് മാര്‍ക്ക് അനുവദിക്കും.