മൊബൈൽ അഡിക്ഷനിൽ നിന്ന് കുട്ടികളെ രക്ഷിക്കാൻ ഇനി കുട്ടിപ്പോലീസും; കാസർകോട്ട് പുതിയ പദ്ധതിക്ക് തുടക്കം

കാസർകോട്: (KasargodVartha) ജില്ലയിലെ കുട്ടികളിൽ വർദ്ധിച്ചുവരുന്ന ഡിജിറ്റൽ അഡിക്ഷൻ കണ്ടെത്തി ശാസ്ത്രീയമായ പരിഹാര മാർഗ്ഗങ്ങൾ തേടുന്നതിനായി സ്റ്റുഡൻ്റ് പോലീസ് കേഡറ്റുകൾ (എസ്.പി.സി) അംബാസഡർമാരായി രംഗത്തെത്തുന്നു. 

സോഷ്യൽ പോലീസിംഗ് ഡിവിഷൻ്റെ നേതൃത്വത്തിൽ ജില്ലയിൽ പുതുതായി ആരംഭിച്ച ഡി അഡിക്ഷൻ പ്രോജക്ടിൻ്റെ തുടർപ്രവർത്തനമെന്ന നിലയിലാണ് കേഡറ്റുകൾ ഈ പുതിയ ദൗത്യം ഏറ്റെടുത്തിരിക്കുന്നത്. ഡിജിറ്റൽ ലഹരിയുടെ ഇരകളാകുന്ന കുട്ടികളെ കണ്ടെത്തി അവരെ ജീവിതത്തിലേക്ക് തിരികെ കൊണ്ടുവരികയാണ് പദ്ധതിയുടെ ലക്ഷ്യം.

എല്ലാ എസ്.പി.സി സ്കൂളുകളിലും കേഡറ്റുകളുടെ നേതൃത്വത്തിൽ പ്രത്യേക നിരീക്ഷണം നടത്തുകയും ഡിജിറ്റൽ അഡിക്ഷൻ പ്രകടമാക്കുന്ന കുട്ടികളെ കണ്ടെത്തുകയും ചെയ്യും. അധ്യാപകരുടെയും പോലീസ് ഉദ്യോഗസ്ഥരുടെയും സഹായത്തോടെ ഇത്തരക്കാരെ ഡി ഡാഡ് (D DAD) സെൻ്ററുകളിൽ എത്തിച്ച് ആവശ്യമായ കൗൺസിലിംഗും മറ്റ് ചികിത്സാ രീതികളും ലഭ്യമാക്കും. ഇതിനായി എസ്.പി.സി കേഡറ്റുകൾക്ക് ഡി ഡാഡ് അംബാസഡർമാരായി പ്രത്യേക പരിശീലനം നൽകും.

പദ്ധതിയുടെ ഭാഗമായി കാഞ്ഞങ്ങാട് സബ് ഡിവിഷനിലെ 22 എസ്.പി.സി സ്കൂളുകളിൽ നിന്നുള്ള തെരഞ്ഞെടുക്കപ്പെട്ട കേഡറ്റുകൾക്കായി നീലേശ്വരം വ്യാപാര ഭവനിൽ ഏകദിന ശില്പശാല സംഘടിപ്പിച്ചു. 

നീലേശ്വരം നഗരസഭ ചെയർമാൻ പി പി മുഹമ്മദ് റാഫി ശില്പശാല ഉദ്ഘാടനം ചെയ്തു. ഡിജിറ്റൽ അഡിക്ഷൻ വളണ്ടിയർമാരായി പ്രവർത്തിക്കാൻ എസ്.പി.സി കേഡറ്റുകൾ സന്നദ്ധരാണെന്ന് അദ്ദേഹം അഭിപ്രായപ്പെട്ടു. കാഞ്ഞങ്ങാട് ഡിവൈഎസ്പിയുടെ ചുമതല വഹിക്കുന്ന സി കെ സുനിൽകുമാർ ചടങ്ങിൽ മുഖ്യപ്രഭാഷണം നടത്തി.

നീലേശ്വരം പോലീസ് ഇൻസ്‌പെക്ടർ നിബിൻ ജോയ് ചടങ്ങിൽ അധ്യക്ഷത വഹിച്ചു. ജനമൈത്രി ജില്ലാ നോഡൽ ഓഫീസറായ സബ് ഇൻസ്പെക്ടർ കെ പി വി രാജീവൻ, സോഷ്യൽ പോലീസിംഗ് ഡിവിഷൻ ജില്ലാ കോർഡിനേറ്റർ സബ് ഇൻസ്പെക്ടർ പി കെ രാമകൃഷ്ണൻ എന്നിവർ സംസാരിച്ചു. എസ്.പി.സി കോർ കമ്മിറ്റി അംഗങ്ങളായ പ്രദീപൻ കോതോളി, കമ്മ്യൂണിറ്റി പോലീസ് ഓഫീസർ കെ വി ബിജു മാസ്റ്റർ, ഡി ഡാഡ് കോഡിനേറ്റർ ഫാത്തിമ എന്നിവരും പരിപാടിയിൽ ആശംസകൾ അർപ്പിച്ചു.

കേഡറ്റുകൾക്ക് ആവശ്യമായ സാങ്കേതികവും മനഃശാസ്ത്രപരവുമായ അറിവുകൾ പകർന്നുനൽകാൻ പ്രശസ്ത മോട്ടിവേഷൻ സ്പീക്കർ അനുരാഗ് മുണ്ടക്കൈ, സൈക്കോളജിസ്റ്റ് ഡോ. ശ്രീജിത്ത്‌, സൈബർ പോലീസ് സ്റ്റേഷൻ സബ് ഇൻസ്പെക്ടർ രവീന്ദ്രൻ പി എന്നിവർ വിവിധ വിഷയങ്ങളിൽ ക്ലാസുകൾ നയിച്ചു. 

എസ്.പി.സി ജില്ലാ അസിസ്റ്റൻ്റ് നോഡൽ ഓഫീസർ ടി തമ്പാൻ സ്വാഗതവും ഡി ഡാഡ് സൈക്കോളജിക്കൽ കൗൺസിലർ ശ്രീഷ്മ നന്ദിയും രേഖപ്പെടുത്തി. പരിപാടിയിൽ 200 ഓളം എസ്പിസി കേഡറ്റുകളും അധ്യാപകരും പങ്കെടുത്തു.

മൊബൈൽ അഡിക്ഷൻ തടയാനുള്ള ഈ പദ്ധതിയെക്കുറിച്ച് മറ്റുള്ളവരിലേക്കും എത്തിക്കാൻ വാർത്ത ഷെയർ ചെയ്യൂ. 

Article Summary: Kasaragod police launch D-DAD project involving SPC cadets to identify and treat digital addiction among children.

#DigitalAddiction #StudentPoliceCadet #Kasaragod #DDAD #ChildSafety #KeralaPolice