റോഡ് സുരക്ഷയ്ക്ക് 'ശുഭയാത്ര' യുമായി സ്റ്റുഡന്റ് പോലീസ്

കാസര്‍കോട്: സ്റ്റുഡന്റ് പോലീസ് കേഡറ്റ് പദ്ധതിയുടെ 'ശുഭയാത്ര' റോഡ് സുരക്ഷാ പദ്ധതി ആരംഭിച്ചു. റോഡ് സുരക്ഷാ നിയമങ്ങളെ കുറിച്ച് ഡ്രൈവര്‍മാരെയും യാത്രക്കാരെയും ബോധവാന്‍മാരാക്കുക എന്ന ലക്ഷ്യവുമായി സ്റ്റുഡന്റ് പോലീസ് രംഗത്തിറങ്ങി.

ശനിയാഴ്ച രാവിലെ കാസര്‍കോട് പുതിയ ബസ് സ്റ്റാന്‍ഡ് പരിസരത്ത് പരിപാടിയുടെ ഉദ്ഘാടനം ജില്ലാ പോലീസ് മേധാവി തോംസണ്‍ ജോസ് നിര്‍വഹിച്ചു. ക്രൈം ഡിറ്റാച്ച്‌മെന്റ് ഡി.വൈ.എസ്.പി കെ. രഘുനാഥ് അധ്യക്ഷത വഹിച്ചു. ഡി.വൈ.എസ്.പി മോഹനചന്ദ്രന്‍, വനിതാ സെല്‍ സി.ഐ ബി. ശുഭാവതി, കൃഷ്ണ പിടാരര്‍, എം. പുരുഷോത്തമന്‍ എന്നിവര്‍ പ്രസംഗിച്ചു.


ട്രാഫിക് എസ്.ഐ കെ. പ്രേംസദന്‍ സ്വാഗതം പറഞ്ഞു. 70 സ്റ്റുഡന്റ് പോലീസ് കേഡറ്റുകള്‍ നാല് ഗ്രൂപ്പുകളായി തിരിഞ്ഞ് റെയില്‍വേ സ്റ്റേഷന്‍, പഴയ ബസ് സ്റ്റാന്‍ഡ്, കറന്തക്കാട്, പുതിയ ബസ് സ്റ്റാന്‍ഡ് എന്നിവിടങ്ങളില്‍ ബോധവല്‍ക്കരണ പരിപാടികള്‍ നടത്തും. നോട്ടീസ് വിതരണവും ഉണ്ടാകും.

'ഓര്‍ക്കുക, ഞങ്ങള്‍ കുട്ടികള്‍, നിങ്ങള്‍ സുരക്ഷിതരായി വീട്ടിലത്താന്‍ ഞങ്ങള്‍ കാത്തിരിക്കുന്നു' എന്ന മുഖവചനത്തോടെ നടത്തുന്ന പരിപാടിക്ക് മുതിര്‍ന്ന പോലീസുകാരുടെ പിന്തുണയും ഉണ്ടാകും. കാല്‍നട യാത്രക്കാര്‍, ബൈക്ക് യാത്രികര്‍, ഓട്ടോറിക്ഷ ഡ്രൈവര്‍മാര്‍, കാര്‍ യാത്രക്കാര്‍, ബസ് യാത്രക്കാര്‍, മറ്റു ഡ്രൈവര്‍മാര്‍ എന്നിവര്‍ക്കിടയിലും ബോധവല്‍ക്കരണ സന്ദേശങ്ങള്‍ പ്രചരിപ്പിക്കും.

മദ്യപിച്ച് ഡ്രൈവിങ് ചെയ്യരുത്, ഡ്രൈവിങിനിടയില്‍ മൊബൈല്‍ ഫോണ്‍ ഉപയോഗിക്കരുത്, സീറ്റ് ബെല്‍റ്റ്, ഹെല്‍മെറ്റ് എന്നിവ ഉപയോഗിക്കുക് എന്നീ സന്ദേശങ്ങള്‍ പരിപാടിയില്‍ വിദ്യാര്‍ത്ഥികള്‍ ഡ്രൈവര്‍മാര്‍ക്കും യാത്രക്കാര്‍ക്കും കൈമാറുന്നു.