നിയമ വ്യവസ്ഥകള്‍ ലംഘിച്ചുള്ള മണല്‍ ലേലം നിര്‍ത്തിവെക്കണം: എസ്.ടി.യു

കാസര്‍കോട്: മണല്‍ വാരലിന് തുറമുഖ വകുപ്പ് അധികൃതര്‍ നടത്തിയ ലേല നടപടികളില്‍ വ്യാപകമായ ആക്ഷേപങ്ങള്‍ ഉയര്‍ന്ന സാഹചര്യത്തില്‍ ലേല നടപടികള്‍ നിര്‍ത്തിവെച്ച് സുതാര്യമായ രീതിയില്‍ മണല്‍ വാരുന്നതിനുള്ള അനുമതി പുനര്‍ ലേലം ചെയ്യാന്‍ നടപടി സ്വീകരിക്കണമെന്ന് എസ്.ടി.യു. സംസ്ഥാന വൈസ് പ്രസിഡണ്ട് എ.അബ്ദുർ റഹ്‌മാന്‍ സംസ്ഥാന മുഖ്യമന്ത്രി, തുറമുഖ വകുപ്പ് മന്ത്രി, വ്യവസായ വകുപ്പ് മന്ത്രി, തൊഴില്‍ വകുപ്പ് മന്ത്രി, സഹകരണ വകുപ്പ് മന്ത്രി എന്നിവര്‍ക്കയച്ച ഫാക്‌സ് സന്ദേശത്തില്‍ ആവശ്യപ്പെട്ടു.

കടല്‍ മണല്‍ വരുന്നതിന് തുറമുഖ വകുപ്പ് ഏര്‍പ്പെടുത്തിയ നിബന്ധനകള്‍ അട്ടിമറിച്ച് കടലാസ് സംഘടനകള്‍ക്ക് അനുമതി നല്‍കി ലക്ഷങ്ങളുടെ കോഴ നടത്താനാണ് ലേലത്തിന്റെ പേരില്‍ പോര്‍ട്ട് അധികൃതര്‍ ശ്രമിച്ചത്. പരമ്പരാഗത മണല്‍ വാരല്‍ തൊഴിലാളികളുടെ സഹകരണ സംഘങ്ങള്‍ക്കാണ് കടല്‍മണല്‍ വാരുന്നതിന് അനുമതി നല്‍കേണ്ടതെന്നാണ് പ്രധാന വ്യവസ്ഥയെങ്കിലും അത്തരം അപേക്ഷകരെയും സംഘങ്ങളെയും പാടെ അവഗണിച്ചുകൊണ്ടാണ് ലേല നടപടികള്‍ നടത്തിയിട്ടുള്ളത്.