ലൈംഗികാതിക്രമങ്ങള്‍ക്കും സദാചാര വാദങ്ങള്‍ക്കുമെതിരെ പ്രതിരോധം തീര്‍ത്ത് തെരുവ് നാടകം

By Webdesk ViMar 17, 2017, 10:45 IST

കാസര്‍കോട്: (www.kasargodvartha.com 17/03/2017) മലയാളക്കരയില്‍ കൊച്ചു കുട്ടികളടക്കം പീഡനങ്ങള്‍ക്കിരയാവുന്ന ഘട്ടത്തില്‍ പ്രതിരോധത്തിന്റെ നാടകം തീര്‍ത്ത് ചിലമ്പൊലി നാടന്‍ കലാസംഘം പ്രവര്‍ത്തകര്‍. നാടന്‍ പാട്ടും തെരുവ് നാടകവുമൊക്കെയുള്ള കലാപരിപാടിയുമായാണ് ചിലമ്പൊലി തെരുവരങ്ങ് തീര്‍ത്തത്.

സൗമ്യ, ജിഷ, മിഷേല്‍ തുടങ്ങിയ പ്രതീകങ്ങളെ ഉയര്‍ത്തി പിടിച്ച നാടകത്തില്‍ സമൂഹത്തിലെ വിപത്തിനെതിരെയാണ് വിരല്‍ ചൂണ്ടുന്നത്. ശിവസേനക്കാരുടെ മറൈന്‍ഡ്രൈവിലെ ചൂരല്‍ പ്രയോഗത്തെയും ചുംബനസമരക്കാരെയും നാടകത്തില്‍ തുറന്ന് കാട്ടുന്നു.

പരസ്യമായി ചുംബിക്കാനല്ല മറിച്ച് പെണ്‍കുട്ടികള്‍ക്ക് ഭയക്കാതെ വഴിനടക്കാനുള്ള അവകാശമാണ് വേണ്ടതെന്നും നാടകം കാണികളോട് വിളിച്ച് പറയുന്നു. കൊട്ടിയൂര്‍ പീഡനമടക്കം നാടകത്തില്‍ പരാമര്‍ശിച്ചിട്ടുണ്ട്. സമൂഹത്തില്‍ നന്മ വറ്റാത്ത കുറേയേറെ പേര്‍ ഇനിയും ജീവിക്കുന്നുണ്ടെന്നും, ജാതി മത ചിന്തക്കപ്പുറം കൊടിയുടെ നിറം നോക്കാതെ ഇനിയൊരു ഹാഷ് ടാഗ് പിറക്കാതിരിക്കാന്‍ ഞങ്ങളുണ്ട് എന്ന മുദ്രാവാക്യം ഉയര്‍ത്തിയാണ് തെരുവ് നാടകം അവസാനിച്ചത്.