സ്കൂൾ മൈതാനവും ദേശീയപാത സർവീസ് റോഡും കന്നുകാലികൾ കയ്യടക്കി; ദുരിതത്തിലായി വിദ്യാർഥികളും നാട്ടുകാരും

മൊഗ്രാൽ: (KasargodVartha) ഉടമസ്ഥർ കയറൂരി വിടുന്ന കന്നുകാലികൾ മൊഗ്രാൽ സ്കൂൾ മൈതാനവും ദേശീയപാത സർവീസ് റോഡും കയ്യടക്കിയതോടെ ദുരിതത്തിലായി വിദ്യാർഥികളും നാട്ടുകാരും. അലഞ്ഞുതിരിയുന്ന കന്നുകാലികളുടെ അന്തിയുറക്കവും ഇപ്പോൾ സ്കൂൾ മൈതാനത്ത് തന്നെയാണ്. രാവിലെ സ്കൂളിൽ എത്തുന്ന വിദ്യാർഥികളെ മൈതാനത്ത് വരവേൽക്കുന്നത് ചാണകമാണ്. മൈതാനമാകെ ചാണകം നിറഞ്ഞ് വൃത്തികേടായി കിടക്കുന്നതു കാരണം കുട്ടികൾക്ക് പി.ടി. സമയത്ത് കളിക്കാൻ പോലും കഴിയാത്ത അവസ്ഥയാണുള്ളത്.

പ്രഭാത സവാരിക്കും ഗതാഗതത്തിനും തടസ്സം

വിദ്യാർഥികൾക്ക് പുറമെ നാട്ടുകാരുടെ പ്രഭാത സവാരിക്കും വൈകുന്നേരങ്ങളിലെ ഫുട്ബോൾ കളിക്കും ഈ കന്നുകാലിക്കൂട്ടം വലിയ തടസ്സമാണ് സൃഷ്ടിക്കുന്നത്. നാട്ടുകാർ ഇവയെ മൈതാനത്ത് നിന്നും ഓടിച്ചു വിട്ടാലും വീണ്ടും തിരികെ എത്തുകയാണ് പതിവ്. ഇവിടെ നിന്നും പോകുന്ന കന്നുകാലികൾ പിന്നീട് എത്തുന്നത് ദേശീയപാത സർവീസ് റോഡിലേക്കാണ്. അവിടെ വാഹനങ്ങൾക്ക് തടസ്സമുണ്ടാക്കുന്ന രീതിയിൽ ഇവ കൂട്ടംകൂടി നിൽക്കുന്നത് പതിവ് കാഴ്ചയായി മാറി.

ഉടമകളെ കണ്ടെത്താനാകാതെ പ്രതിസന്ധി

കന്നുകാലികളെ കയറൂരി മേയാൻ വിടുന്ന ഉടമസ്ഥർ അവ തിരികെ വീട്ടിൽ എത്തിയോ എന്ന് ശ്രദ്ധിക്കാറില്ല. കന്നുകാലികളുടെ ഉടമസ്ഥരെ നാട്ടുകാർ അന്വേഷിക്കുന്നുണ്ടെങ്കിലും ആരെയും കണ്ടെത്താൻ കഴിഞ്ഞിട്ടില്ല. പ്രദേശത്തെ ക്ഷീര കർഷകരെയൊക്കെ നാട്ടുകാർ വിവരമറിയിച്ചിട്ടും യാതൊരു ഫലവുമുണ്ടായില്ല. 

കുമ്പള ഗ്രാമപഞ്ചായത്ത് പരിധിയിൽ കന്നുകാലി കടത്തും മറ്റും ഇടയ്ക്കിടെ റിപ്പോർട്ട് ചെയ്യപ്പെടുമ്പോഴാണ്, കെട്ടിയിട്ട് പോറ്റാൻ നിവൃത്തിയില്ലാത്ത ഉടമസ്ഥർ കന്നുകാലികളെ ഇത്തരത്തിൽ തെരുവിലേക്ക് കയറൂരി വിടുന്നതെന്നാണ് ആരോപണം.

പഴയകാലത്ത് കൃഷി നശിപ്പിച്ചിരുന്ന ഇത്തരം കന്നുകാലികളെ പിടികൂടി പൂട്ടാൻ കൃഷിവകുപ്പിന് കീഴിൽ 'ദൊഡ്ഢി' എന്നൊരു സംവിധാനം ഉണ്ടായിരുന്നു. എന്നാൽ നാട്ടിൽ നിന്നും കൃഷി അന്യമായതോടെ ആ സംവിധാനവും നിലച്ചു. കന്നുകാലിക്കൂട്ടം പ്രദേശത്ത് വലിയ ശല്യമായി തീർന്നതോടെ, ഇതിന് പരിഹാരം കാണാൻ അധികൃതർക്ക് പരാതി നൽകാനുള്ള തയ്യാറെടുപ്പിലാണ് സ്കൂൾ അധികൃതരും നാട്ടുകാരും.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക. കൂടുതൽ വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക.

Article Summary: Stray cattle have occupied the Mogral school ground and national highway service road, causing severe inconvenience to students, morning walkers, and motorists, prompting locals to seek official intervention.

#Mogral #StrayCattle #SchoolGround #HighwayTraffic #CivicIssue #KasaragodNews #AparnaNews