കാസര്‍കോട്ട് രാജധാനി എക്‌സ്പ്രസിന് സ്‌റ്റോപ്പ് അനുവദിച്ചേക്കും

By Web Desk SNNov 9, 2017, 14:37 IST

കാസര്‍കോട്: (www.kasargodvartha.com 09/11/2017) കാസര്‍കോട് റെയില്‍വേ സ്‌റ്റേഷനില്‍ രാജധാനി എക്‌സ്പ്രസിന് സ്റ്റോപ്പ് അനുവദിച്ചേക്കും. രാജധാനി എക്‌സ്പ്രസിന് കാസര്‍കോട്ട് സ്‌റ്റോപ്പ് അനുവദിക്കണമെന്നാവശ്യപ്പെട്ട് കാസര്‍കോട് എം എല്‍ എ എന്‍.എ നെല്ലിക്കുന്ന് റെയില്‍വേ മന്ത്രി പിയൂഷ് ഗോയലിന് നിവേദനം നല്‍കിയിരുന്നു. ഇതു സംബന്ധിച്ചുള്ള നിവേദനത്തില്‍ തീരുമാനമെടുക്കാന്‍ കത്ത് റെയില്‍വേ ഡയറക്ടറേറ്റിന് നല്‍കിയതായി മന്ത്രി പിയൂഷ് ഗോയല്‍ എന്‍എ നെല്ലിക്കുന്നിനെ അറിയിച്ചിരിക്കുകയാണ്.

കാസര്‍കോട്ടെ ജനതയുടെ ഏറെ നാളത്തെ മുറവിളിയാണ് രാജധാനിക്ക് സ്‌റ്റോപ്പ് അനുവദിക്കണമെന്നത്. ഡല്‍ഹി ഉള്‍പെടെയുള്ള ഉത്തരേന്ത്യന്‍ സംസ്ഥാനങ്ങളിലേക്ക് പോകുന്ന യാത്രക്കാര്‍ മംഗളൂരു ജംഗ്ഷന്‍ റെയില്‍വേ സ്‌റ്റേഷനെയാണ് ആശ്രയിക്കുന്നത്. നിലവില്‍ കാസര്‍കോട് ജില്ലാ ആസ്ഥാനത്തില്‍ മാത്രമാണ് കേരളത്തില്‍ രാജധാനിക്ക് സ്‌റ്റോപ്പില്ലാത്തത്. മലപ്പുറം ജില്ലയിലെ തിരൂരിലും രാജധാനിക്ക് സ്റ്റോപ്പ് അനുവദിക്കണമെന്ന് ആവശ്യം ഉയര്‍ന്നിരുന്നു.