മീന്‍ ലോറിക്കും കെ എസ് ആര്‍ ടി സി ബസിനും നേരെ കല്ലേറ്; ബസ് ഡ്രൈവര്‍ക്ക് പരിക്ക്

കുമ്പള: (www.kasargodvartha.com 05.10.2017) മീന്‍ ലോറിക്കും കെ എസ് ആര്‍ ടി സി ബസിനും നേരെ കല്ലേറ്. കല്ലേറില്‍ ബസ് ഡ്രൈവര്‍ക്ക് പരിക്കേറ്റു. ബുധനാഴ്ച രാത്രിയാണ് ഷിറിയയില്‍ വെച്ച് മീന്‍ ലോറിക്ക് നേരെ കല്ലേറുണ്ടായത്. വ്യാഴാഴ്ച രാവിലെ 7.30 മണിയോടെയാണ് കുക്കാര്‍ പാലത്തിനു സമീപത്തു വെച്ച് കേരളാ എസ് ആര്‍ ടി സി ബസിനു നേരെ കല്ലേറുണ്ടായത്.

പരിക്കേറ്റ ബസ് ഡ്രൈവര്‍ കാഞ്ഞങ്ങാട് പുല്ലൂരിലെ അനീഷ് കുമാറി (41)നെ കുമ്പളയിലെ ആശുപത്രിയില്‍ പ്രവേശിപ്പിച്ചു. കാസര്‍കോട് നിന്ന് മംഗളൂരുവിലേക്ക് പോവുകയായിരുന്നു ബസ്. ബൈക്കിലെത്തിയ സംഘമാണ് കല്ലേറ് നടത്തിയതെന്ന് ഡ്രൈവര്‍ പരാതിപ്പെട്ടു. സംഭവത്തില്‍ കുമ്പള പോലീസ് കണ്ടാലറിയാവുന്ന രണ്ട് പേര്‍ക്കെതിരെ നരഹത്യാശ്രമത്തിന് കേസെടുത്തു.