ബൈക്ക് തടഞ്ഞ് യുവാവിനെ കുത്തിയ സംഭവം; പ്രതിയുടെ സഹായത്തോടെ ആക്രമിക്കാനുപയോഗിച്ച സൂചി കണ്ടെടുത്തു

കാസര്‍കോട്: (www.kasargodvartha.com 12.07.2017) ബൈക്കില്‍ സഞ്ചരിക്കുകയായിരുന്ന യുവാവിനെ കുത്തിപ്പരിക്കേല്‍പ്പിച്ച സംഭവത്തില്‍ ആക്രമിക്കാനുപയോഗിച്ച സൂചി കണ്ടെടുത്തതായി കാസര്‍കോട് ടൗണ്‍ എസ്‌ഐ അജിത് കുമാര്‍ പറഞ്ഞു. മൊഗ്രാല്‍ പുത്തൂര്‍ കോട്ടക്കുന്നിലെ എ കെ അന്‍സാറി (19)നെ കുത്തിപ്പരിക്കേല്‍പിച്ച കേസിലെ പ്രതി മണികണ്ഠന്‍ എന്ന നിവിന്റെ സഹായത്തോടെയാണ് ആക്രമിക്കാനുപയോഗിച്ച സൂചി സംഭവ സ്ഥലത്തു നിന്നും കണ്ടെടുത്തത്.

സംഭവം നടന്നയുടനെ തന്നെ പ്രതി മണികണ്ഠനെ പോലീസ് കസ്റ്റഡിയിലെടുത്തിരുന്നു. ചോദ്യം ചെയ്തപ്പോഴാണ് കുത്താനുപയോഗിച്ച സൂചി അവിടെ തന്നെ വലിച്ചെറിഞ്ഞതായി പ്രതി മൊഴി നല്‍കിയത്. പ്രതിയെയും കൊണ്ട് സ്ഥലത്തെത്തിയ പോലീസ് പരിശോധന നടത്തിയാണ് സാമാന്യം വലിപ്പത്തിലുള്ള സൂചി കണ്ടെടുത്തത്. അന്‍സാറിനെ മണികണ്ഠന്റെ നേതൃത്വത്തിലുള്ള സംഘം തടഞ്ഞുനിര്‍ത്തി സൂചി കൊണ്ട് തോളിലും കൈത്തണ്ടയിലും കുത്തിവലിക്കുകയായിരുന്നുവെന്ന് പോലീസ് പറഞ്ഞു.

പ്രതി മണികണ്ഠനും കൂട്ടുപ്രതികള്‍ക്കുമെതിരെ 308 വകുപ്പ് പ്രകാരം നരഹത്യാശ്രമത്തിനാണ് പോലീസ് കേസെടുത്തിരിക്കുന്നത്. മറ്റു പ്രതികള്‍ക്കു വേണ്ടിയുള്ള അന്വേഷണം പോലീസ് ഉൗര്‍ജിതമാക്കിയിട്ടുണ്ട്. കോടതിയില്‍ ഹാജരാക്കിയ പ്രതി മണികണ്ഠനെ രണ്ടാഴ്ചത്തേക്ക് റിമാന്‍ഡ് ചെയ്തു.

Related News:
ബൈക്ക് തടഞ്ഞ് യുവാവിനെ കുത്തിയത് സൂചി കൊണ്ട്; മുഖ്യപ്രതി അറസ്റ്റില്‍

ബൈക്കില്‍ സഞ്ചരിക്കുകയായിരുന്ന യുവാവിനെ തടഞ്ഞുനിര്‍ത്തി കുത്തിപ്പരിക്കേല്‍പ്പിച്ചു