SSF സംസ്ഥാന സമ്മേളനം: ഒരു കുമ്പിള്‍ പഞ്ചസാര ശേഖരണത്തിന് തുടക്കമായി

ഒരു കുമ്പിള്‍ പഞ്ചസാര ശേഖരിക്കുന്ന പദ്ധതിയില്‍ സമസ്ത മുശാവറ അംഗം എം. ആലി കുഞ്ഞി മുസ്‌ലിയാര്‍ ഷിറിയ, സമസ്ത താലൂക്ക് പ്രസിഡന്റ് എന്‍.എം. അബ്ദുര്‍ റഹ്മാന്‍ മുസ്‌ലിയാര്‍, എസ്.വൈ.എസ്. ജില്ലാ ട്രഷറര്‍ ചിത്താരി അബ്ദുല്ല ഹാജി എന്നിവര്‍ കണ്ണിചേരുന്നു.

കാസര്‍കോട്: എറണാകുളത്ത് നടക്കുന്ന എസ്.എസ്.എഫ്. സംസ്ഥാന സമ്മേളനത്തിലേക്ക് ഒരു വീട്ടില്‍ നിന്ന് ഒരു കുമ്പിള്‍ പഞ്ചസാര ശേഖരിക്കുന്ന പദ്ധതിക്ക് ജില്ലയില്‍ ആവേശകരമായ തുടക്കം. സമ്മേളനത്തിന് ഐക്യദാര്‍ഢ്യം പകര്‍ന്ന് സ്‌നേഹ മധുരം കൈമാറുകയാണ് പഞ്ചസാര സംഭാവനയിലൂടെ ഓരോ കുടുംബവും. നാടിളക്കി നടക്കുന്ന സമ്മേളന പ്രചാരണത്തിന് ഒരു തരി മധുരം പകര്‍ന്ന് പങ്കാളികളാവുകയാണ് നാട്ടുകാരൊന്നാകെ.

ജില്ലയില്‍ 350 ലേറെ യൂണിറ്റുകളില്‍ നിന്ന് 37 സെക്ടറുകളിലൂടെയാണ് പഞ്ചസാര ശേഖരിക്കുന്നത്. തുടര്‍ന്ന് ആറ് ഡിവിഷന്‍ കേന്ദ്രങ്ങളില്‍ ഇവ സമാഹരിച്ച് സമ്മേളന ചിലവിലേക്ക് വിഭവമായി ഉപയോഗിക്കും. പഞ്ചസാര ശേഖരണത്തിന് ഐ.ടീം അംഗങ്ങള്‍ നേതൃത്വം നല്‍കും.

ഇതു സംബന്ധിച്ച് ജില്ലാ ഓഫീസില്‍ ചേര്‍ന്ന യോഗത്തില്‍ പ്രസിഡന്റ് അബ്ദുല്‍ റസാഖ് സഖാഫി കോട്ടക്കുന്ന് അധ്യക്ഷത വഹിച്ചു. റഫീഖ് സഖാഫി സി.എം., ജമാലുദ്ദീന്‍ സഖാഫി ആദൂര്‍, അബ്ദുല്‍ റഹീം സഖാഫി ചിപ്പാര്‍, ഫാറൂഖ് കുബണൂര്‍, സിദ്ദീഖ് പൂത്തപ്പലം പ്രസംഗിച്ചു. ജാഫര്‍ സി.എന്‍ സ്വാഗതം പറഞ്ഞു.