അമൃത് ഭാരത് പദ്ധതിയിൽ വികസിപ്പിക്കുന്ന സ്റ്റേഷനോട് കടുത്ത വിവേചനം; കാസർകോട് റെയിൽവേ സ്റ്റേഷനിലെ പാഴ്സൽ സർവീസ് നിർത്തലാക്കുന്നു; തീരുമാനം പിൻവലിക്കണമെന്ന് കല്ലട്ര മാഹിൻ എംഎൽഎയും പാസൻജേർസ് അസോസിയേഷനും

പാലക്കാട്: (KasargodVartha) കാസർകോട്, തലശ്ശേരി റെയിൽവേ സ്റ്റേഷനുകളിൽ നിന്നുള്ള ഇൻവേർഡ്, ഔട്ട്‌ വേർഡ് പാഴ്സൽ സർവീസുകൾ പൂർണമായും നിർത്തലാക്കുന്നു. ദക്ഷിണ റെയിൽവേയുടെ ഈ തീരുമാനം പ്രതിഷേധാർഹമാണെന്ന് കാസർകോട് എം എൽ എ കല്ലട്ര മാഹിനും റെയിൽവേ പാസഞ്ചേഴ്സ് അസോസിയേഷനും വ്യക്തമാക്കി. ജൂലൈ 25 മുതൽ പ്രാബല്യത്തിൽ വരുന്ന ഈ ഉത്തരവ് അടിയന്തരമായി പിൻവലിക്കണമെന്ന് അവർ ആവശ്യപ്പെട്ടു. പ്രതിദിനം ആയിരക്കണക്കിന് യാത്രക്കാർ ആശ്രയിക്കുന്ന ജില്ലയിലെ പ്രധാന റെയിൽവേ സ്റ്റേഷനാണ് കാസർകോട്.

വികസനത്തിന് വിരുദ്ധമായ തീരുമാനം

ജൂലൈ 21 ന് പുറപ്പെടുവിച്ച 'അഡ്വാൻസ് റേറ്റ്സ് നോട്ടിഫിക്കേഷൻ' (No 07 of 2026 / Coaching No 33/2026) പ്രകാരമാണ് കാസർകോട്, തലശ്ശേരി സ്റ്റേഷനുകൾ പാഴ്സൽ ഗതാഗതത്തിനായി അടച്ചുപൂട്ടുന്നത്. വർഷത്തിൽ 49.70 കോടി രൂപയിലധികം വരുമാനം നൽകുന്ന കാസർകോടിനോട് കാണിക്കുന്ന ഈ വിവേചനം യാതൊരു ന്യായീകരണവുമില്ലാത്തതാണെന്ന് എംഎൽഎ പറഞ്ഞു.

കേന്ദ്ര സർക്കാരിന്റെ അമൃത് ഭാരത് സ്റ്റേഷൻ പദ്ധതിയിൽ ഉൾപ്പെടുത്തി കോടികൾ ചെലവഴിച്ച് അന്താരാഷ്ട്ര നിലവാരത്തിലേക്ക് വികസിപ്പിക്കുന്ന ഒരു സ്റ്റേഷനിൽ നിന്ന് പാഴ്സൽ ഗതാഗതം നിർത്തലാക്കുന്നത് വികസന കാഴ്ചപ്പാടിന് തികച്ചും നിരക്കാത്തതാണെന്ന് അദ്ദേഹം കൂട്ടിച്ചേർത്തു. വടക്കെ മലബാറിലെ വ്യാപാര മേഖലയ്ക്ക് വലിയൊരു തിരിച്ചടിയാകുന്നതാണ് റെയിൽവേയുടെ ഈ പുതിയ തീരുമാനം.

ജനങ്ങളെയും വ്യാപാരികളെയും പ്രതികൂലമായി ബാധിക്കും

ജില്ലയിലെ നൂറുകണക്കിന് വിദ്യാർഥികളും സർക്കാർ-സ്വകാര്യ ജീവനക്കാരും ഇരുചക്ര വാഹനങ്ങൾ ഉൾപ്പെടെ കടത്താൻ പ്രധാനമായും ആശ്രയിക്കുന്നത് ഈ പാഴ്സൽ കേന്ദ്രത്തെയാണ്. സർവീസ് നിർത്തലാക്കുന്നതോടെ ഇവർ മംഗളൂരിനെയോ കണ്ണൂരിനെയോ ആശ്രയിക്കേണ്ടി വരുന്നത് കടുത്ത ദുരിതമുണ്ടാക്കും. കൂടാതെ വ്യാപാരികൾ, കർഷകർ, ചെറുകിട വ്യവസായങ്ങൾ എന്നിവരുടെ ചരക്ക് നീക്കത്തെ ഇത് സാരമായി ബാധിക്കുമെന്നും, സ്വകാര്യ റോഡ് മാർഗമുള്ള ഗതാഗതത്തിലേക്ക് മാറേണ്ടി വരുന്നത് സാധനങ്ങളുടെ വിലക്കയറ്റത്തിന് വഴിവെക്കുമെന്നും കാസർകോട് റെയിൽവേ പാസഞ്ചേഴ്സ് അസോസിയേഷൻ പ്രസിഡന്റ് പ്രശാന്ത് കുമാർ നൽകിയ നിവേദനത്തിൽ ചൂണ്ടിക്കാട്ടുന്നു. പാഴ്സൽ സേവനങ്ങൾ ഇല്ലാതാകുന്നത് വഴി സാധാരണക്കാരായ യാത്രക്കാർക്ക് തങ്ങളുടെ ഇരുചക്ര വാഹനങ്ങളും മറ്റ് അവശ്യ സാധനങ്ങളും ട്രെയിനിൽ കൊണ്ടുപോകാനുള്ള സൗകര്യമാണ് ഒറ്റയടിക്ക് ഇല്ലാതാകുന്നത്.

അടിയന്തര ഇടപെടൽ ആവശ്യപ്പെട്ട് നിവേദനം

ജൂലൈ 21 ന് ഉത്തരവിറക്കി ജൂലൈ 25 മുതൽ നടപ്പിലാക്കുന്നത് ബദൽ മാർഗങ്ങൾ കണ്ടെത്താൻ വ്യാപാരികൾക്കും പൊതുജനങ്ങൾക്കും സമയം നൽകാതെയുള്ള തികച്ചും ഏകപക്ഷീയമായ നീക്കമാണ്. സർവീസ് നിർത്തിവെക്കാനുള്ള നീക്കത്തിൽ നിന്ന് റെയിൽവേ അടിയന്തരമായി പിന്മാറണമെന്നും, അടിസ്ഥാന സൗകര്യങ്ങളും ജീവനക്കാരുടെ എണ്ണവും വർധിപ്പിക്കുകയാണ് വേണ്ടതെന്നും ആവശ്യപ്പെട്ട് കേന്ദ്ര റെയിൽവേ മന്ത്രി, ദക്ഷിണ റെയിൽവേ ജനറൽ മാനേജർ, പിസിസിഎം, പാലക്കാട് ഡിആർഎം എന്നിവർക്ക് കത്തയച്ചതായി ബന്ധപ്പെട്ടവർ അറിയിച്ചു.

തീരുമാനം പുനഃപരിശോധിച്ചില്ലെങ്കിൽ ശക്തമായ ബഹുജന പ്രക്ഷോഭങ്ങൾക്ക് നേതൃത്വം നൽകുമെന്ന് എംഎൽഎ മുന്നറിയിപ്പ് നൽകി. ജില്ലയിലെ ജനപ്രതിനിധികളെയും പൊതുജനങ്ങളെയും സഘടിപ്പിച്ച് വരും ദിവസങ്ങളിൽ റെയിൽവേ സ്റ്റേഷനിലേക്ക് മാർച്ച് ഉൾപ്പെടെയുള്ള സമര പരിപാടികൾ സംഘടിപ്പിക്കാനാണ് ആലോചിക്കുന്നത്.

ഈ സുപ്രധാന വാർത്ത നിങ്ങളുടെ സുഹൃത്തുക്കൾക്കും പങ്കുവെക്കുക. പുതിയ വിവരങ്ങൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമന്റായി രേഖപ്പെടുത്തുക.

Article Summary: Kallatra Mahin MLA and passengers strongly protested Southern Railway's decision to stop parcel services at Kasaragod.

#Kasaragod #SouthernRailway #KeralaNews #ParcelService #KallatraMahin #IndianRailways #AparnaNews