ശില്‍പ മികവില്‍ പവിത്രന്‍

ഓട്ടുപാത്രത്തിന്റെ രൂപത്തില്‍ പവിത്രന്‍ ചെങ്കല്ല് ശില്‍പം കൊത്തിയെടുക്കുന്നു.

കൊടക്കാട്: പവിത്രന്റെ കരവിരുതില്‍ ചെങ്കല്ലില്‍ വിരിയുന്നത് ജീവസുറ്റ ശില്‍പങ്ങള്‍. കെട്ടിട നിര്‍മാണ തൊഴിലാളിയായ പവിത്രന്റെ ശില്‍പ വിദ്യയിലുള്ള മികവ് ശ്രീകോവിലുകള്‍ക്കും വീടിനും അലങ്കാരമാകുന്നു. കൊടക്കാട് പടിഞ്ഞാറക്കരയിലെ വീട്ടില്‍ ചെങ്കല്ലില്‍ തീര്‍ക്കുന്ന ദാരുശില്‍പങ്ങള്‍ കാണാനും വാങ്ങാനും നിരവധിയാളുകളാണെത്തുന്നത്. ശ്രീകോവില്‍ നിര്‍മാണത്തിലെ പവിത്രന്റെ നിപുണതക്ക് തെളിവാണ് മുംബൈയിലെ വസായിലും രത്‌നഗിരിയിലെ ചിപ്ലൂലും ചിത്രപ്പണിയില്‍ തീര്‍ത്ത മുത്തപ്പന്‍ ക്ഷേത്രങ്ങള്‍.

കുടക്, ഇരിട്ടി, തളിപ്പറമ്പ് മേഖലകളിലും ശ്രീകോവില്‍ നിര്‍മിച്ചിട്ടുണ്ട്. മൂന്ന് അടി ഉയരവും മൂന്നുമീറ്റര്‍ ചുറ്റളവിലുമുള്ള ചെങ്കല്ല് പാത്രം നിര്‍മിക്കുന്ന തിരക്കിലാണിപ്പോള്‍. മഞ്ഞ നിറത്തിലുള്ള കല്ലില്‍ ഉളി ഉപയോഗിച്ചാണ് മിനുക്ക്. 150 കല്ലുകളാണ് പാത്രത്തിനായി ആവശ്യമായത്. മേലാശാരി ഒളവറ കുഞ്ഞിരാമനാണ് ഗുരു. നാട്ടുകാരായ പി വി പവിത്രനും മധുവും സഹായികളാണ്.

-പി. മഷൂദ്