നായ്മാര്‍മൂലയിൽ ശീതളപാനീയ ഫാക്ടറിക്ക് തീപിടിച്ചു; അഗ്നി രക്ഷാസേനയുടെ സമയബന്ധിത ഇടപെടലിൽ ഒഴിവായത് വൻ ദുരന്തം

കാസർകോട്: (KasargodVartha) ചെങ്കള പഞ്ചായത്തിലെ നായ്മാര്‍മൂലയിൽ പ്രവർത്തിക്കുന്ന ശീതളപാനീയ ഫാക്ടറിയുടെ നിർമ്മാണ യൂണിറ്റിലുണ്ടായ തീപിടിത്തം അഗ്നിരക്ഷാ സേനയുടെ സമയബന്ധിതമായ ഇടപെടലിലൂടെ നിയന്ത്രണവിധേയമാക്കി.

ചെങ്കള മൂന്നാം വാർഡ് നായ്മാര്‍മൂലയിലെ മുഹ്സിൻ (കല്പക ഹൗസ്) എന്നയാളുടെ ഉടമസ്ഥതയിലുള്ള 'ഫാക്കിയ സോഫ്റ്റ് ഡ്രിങ്ക്സ്' എന്ന സ്ഥാപനത്തിനാണ് തീപിടിച്ചത്.

തീ പടർന്നത് വിറകിനും ചകിരിക്കും

ഫെബ്രുവരി 21 ശനിയാഴ്ച പുലർച്ചെ ഒരു മണിയോടെയായിരുന്നു സംഭവം. ഫാക്ടറി പരിസരത്ത് കൂട്ടിയിട്ടിരുന്ന വിറകിനും ചകിരിക്കുമാണ് ആദ്യം തീപിടിച്ചത്. അഗ്നിശമനസേന ഉടൻ സ്ഥലത്തെത്തി രക്ഷാപ്രവർത്തനം ആരംഭിച്ചതിനാൽ തീ ഫാക്ടറിക്കുള്ളിലേക്ക് പടരാതെ നിയന്ത്രിക്കാനായി.

രക്ഷാപ്രവർത്തനത്തിന് എത്തിയത് നാല് യൂണിറ്റുകൾ

രക്ഷാപ്രവർത്തനത്തിന് കാസർകോട് സ്റ്റേഷനിൽ നിന്ന് രണ്ട് ഫയർ യൂണിറ്റുകളും ഉപ്പള, കാഞ്ഞങ്ങാട് സ്റ്റേഷനുകളിൽ നിന്ന് ഓരോ യൂണിറ്റുകളും സ്ഥലത്തെത്തി. പുലർച്ചെ ഒരു മണിയോടെ ആരംഭിച്ച രക്ഷാപ്രവർത്തനം മൂന്നു മണിയോടെയാണ് തീ നിയന്ത്രണവിധേയമാക്കാൻ കഴിഞ്ഞത്.

മൂന്നു മണിയോടെ തീ പൂർണമായും അണച്ചു. ഫയർഫോഴ്സിന്റെ കൃത്യസമയത്തുള്ള ഇടപെടലിലൂടെ ലക്ഷക്കണക്കിന് രൂപയുടെ നാശനഷ്ടങ്ങളാണ് ഒഴിവായത്. കാസർകോട് അഗ്നിരക്ഷാനിലയം അസിസ്റ്റന്റ് സ്റ്റേഷൻ ഓഫീസർ എ. ജാഫർ ഖാൻ, സീനിയർ ഫയർ ആൻഡ് റെസ്ക്യൂ ഓഫീസർ വി. സുകു എന്നിവരുടെ നേതൃത്വത്തിൽ ഇരുപത്തഞ്ചോളം സേനാംഗങ്ങൾ രക്ഷാപ്രവർത്തനത്തിൽ പങ്കെടുത്തു.

അഗ്നിരക്ഷാ സേനയുടെയും ദൃക്സാക്ഷികളുടെയും പ്രാഥമിക വിവരങ്ങളെ അടിസ്ഥാനപ്പെടുത്തിയുള്ള ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായം കമന്‍റ് ചെയ്യൂ. കാസർകോട്ടെ വാർത്തകൾ അപ്പപ്പോൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യൂ.

Article Summary: A major disaster was averted after a fire broke out at a soft drink factory in Naimarmoola, Kasaragod, early Saturday morning. The fire, which started in firewood and coconut husks outside, was quickly contained by four units of the Fire Force before it could spread inside the factory, saving lakhs of rupees in potential damages.

#KasaragodNews #FireAccident #Naimarmoola #FireForce #RescueOperation #KeralaNews #LocalNews #Emergency