സാമൂഹ്യപ്രവർത്തകന്റെ വീടാക്രമണം: ലീഗ് നേതാവടക്കം മൂന്നുപേർക്കെതിരെ കേസ്; 'കള്ളപ്പരാതി'യെന്ന് പ്രതിഭാഗം

ചട്ടഞ്ചാൽ: (KasargodVartha) സാമൂഹ്യപ്രവർത്തകനായ ബി. അബ്ദുൾ ഫജാസിന്റെ വീടിന്റെ ജനൽച്ചില്ലുകൾ തകർക്കുകയും കൊല്ലുമെന്ന് ഭീഷണിപ്പെടുത്തുകയും ചെയ്ത സംഭവത്തിൽ, രണ്ടാഴ്ചയ്ക്കുശേഷം ലീഗ് നേതാവ് ഉൾപ്പെടെ മൂന്നുപേർക്കെതിരെ പോലീസ് കേസെടുത്തു. ചട്ടഞ്ചാൽ തെക്കിൽ ബന്താട് ഹൗസിൽ താമസിക്കുന്ന ബി. അബ്ദുൾ ഫജാസ് നൽകിയ പരാതിയുടെ അടിസ്ഥാനത്തിൽ ലീഗ് നേതാവ് ടി.ഡി. കബീർ, ഹാരിസ് മാളിക, അൻസാരി എന്നിവർക്കെതിരെയാണ് മേൽപ്പറമ്പ് പോലീസ് കേസെടുത്തിരിക്കുന്നത്.

വാതിലുകൾ ചവിട്ടിത്തകർക്കാനും സംഘം ശ്രമിച്ചതായി പരാതിയിൽ പറയുന്നു. സാമൂഹ്യപ്രവർത്തനങ്ങളിൽ സജീവമായ ഫജാസിന് സുഹൃത്തുക്കൾ അഭിനന്ദിച്ചുകൊണ്ട് നാട്ടിൽ ഫ്ലെക്സ് സ്ഥാപിച്ചിരുന്നു. ഇത് നീക്കം ചെയ്യാൻ ശ്രമിച്ചതുമുതൽ ഭീഷണികൾ ആരംഭിച്ചതായി ഫജാസ് പറയുന്നു.

നാട്ടിൽ റോഡ് വികസനവുമായി ബന്ധപ്പെട്ട് താൻ നടത്തുന്ന പ്രവർത്തനങ്ങൾ ടി.ഡി. കബീർ അടക്കമുള്ള നേതാക്കൾക്ക് ഉൾക്കൊള്ളാൻ കഴിയാത്തതാണ് നിലവിലെ ആക്രമണശ്രമങ്ങൾക്ക് പിന്നിലെ വൈരാഗ്യമായി ഫജാസ് ചൂണ്ടിക്കാട്ടുന്നു. റോഡ് വികസന ഗ്രൂപ്പിന്റെ ഡി.പിയിൽ ഉദുമ എം.എൽ.എ സി.എച്ച്. കുഞ്ഞമ്പുവിന്റെ ചിത്രം വെച്ചത് മാറ്റണമെന്ന് ആവശ്യപ്പെട്ട് തന്നെ ഗ്രൂപ്പിൽ വെല്ലുവിളിക്കുകയും അസഭ്യം പറയുകയും ചെയ്തിരുന്നതായും ഫജാസ് പറയുന്നു. ഇതിനുശേഷമാണ് സംഘം രാത്രിയിൽ വീട്ടിലെത്തി ജനൽച്ചില്ലുകൾ തകർക്കുകയും വാതിലുകൾ ചവിട്ടുകയും പുറത്തുനിന്ന് അസഭ്യം പറയുകയും ചെയ്തതെന്ന് യുവാവ് ആരോപിക്കുന്നു. റോഡ് വികസനത്തിനായി സമാഹരിച്ച പണത്തിന്റെ കണക്ക് അവതരിപ്പിക്കണമെന്ന് ആവശ്യപ്പെട്ടതിന്റെ പേരിലും ഭീഷണി ഉണ്ടായതായി ഫജാസ് വെളിപ്പെടുത്തി.

ഐ.പി.സി 329(3), 324, 351, 3(5) എന്നീ വകുപ്പുകൾ പ്രകാരമാണ് മേൽപ്പറമ്പ് പോലീസ് കേസെടുത്തിരിക്കുന്നത്.

അതേസമയം, ഫജാസിന്റെ പരാതി കള്ളക്കേസാണെന്ന് ലീഗ് നേതാവ് ടി.ഡി. കബീർ കാസർകോട് വാർത്തയോട് പറഞ്ഞു. വാട്സാപ്പ് ഗ്രൂപ്പുകളുണ്ടാക്കി ആളുകളെ മോശക്കാരായി ചിത്രീകരിക്കുകയും നാട്ടിൽ പ്രശ്നങ്ങളുണ്ടാക്കുകയുമാണ് ഫജാസിന്റെ പ്രധാന ജോലിയെന്നും അദ്ദേഹം ആരോപിച്ചു. ഫജാസിനെതിരെ നിരവധി പരാതികളും കേസുകളും നിലവിലുണ്ട്. തന്റെ ഭാര്യക്കെതിരെ പോലും മോശമായി സംസാരിച്ചതിനെ തുടർന്ന് വനിതാ കമ്മീഷനിൽ പരാതി നൽകിയിരുന്നു. ഇതിന്റെ വൈരാഗ്യമാണ് നിലവിലെ കള്ളക്കേസിന് പിന്നിലെന്ന് കബീർ കൂട്ടിച്ചേർത്തു.

റോഡ് വികസനവുമായി ബന്ധപ്പെട്ട് ജനകീയ കൂട്ടായ്മ ചെലവഴിച്ച തുകയുടെ എല്ലാ കണക്കും ഔദ്യോഗിക ഗ്രൂപ്പിൽ അവതരിപ്പിച്ചതാണെന്നും, എന്നിട്ടും കണക്ക് അവതരിപ്പിച്ചില്ലെന്ന് ഫജാസ് തെറ്റിദ്ധാരണ പരത്തുകയാണെന്നും കബീർ പറഞ്ഞു. ആദ്യഘട്ടത്തിൽ പരാതി ലഭിച്ചപ്പോൾ, പരാതിക്കാരനെയും തങ്ങളെയും വിളിപ്പിക്കുകയും കള്ളപ്പരാതിയാണെന്ന് ബോധ്യപ്പെട്ടതിനാലാണ് പോലീസ് കേസെടുക്കാതിരുന്നതെന്നും കബീർ വ്യക്തമാക്കി. പിന്നീട് ജില്ലാ പോലീസ് മേധാവിക്ക് പരാതി നൽകിയതിനെ തുടർന്നുണ്ടായ നിർദ്ദേശപ്രകാരമാണ് രണ്ടാഴ്ചയ്ക്ക് ശേഷം കേസെടുത്തതെന്നും കബീർ കൂട്ടിച്ചേർത്തു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: Social activist's house attacked, police case against League leader and two others; League leader claims false complaint.

#KeralaNews #Kasargod #HouseAttack #PoliticalDispute #PoliceCase #SocialActivist