ജനറല്‍ ആശുപത്രിയില്‍ ഓക്‌സിജന്‍ സിലിണ്ടര്‍ സൂക്ഷിക്കുന്ന മുറിയിലും പോലീസിന്റെ വിശ്രമ മുറിയിലും വിഷപാമ്പ്

കാസര്‍കോട്: (www.kasargodvartha.com 23.09.2017) കാസര്‍കോട് ജനറല്‍ ആശുപത്രിയില്‍ ഓക്‌സിജന്‍ സിലിണ്ടര്‍ സൂക്ഷിക്കുന്ന മുറിയിലും പോലീസിന്റെ വിശ്രമ മുറിയിലും വിഷപാമ്പുകളെ കണ്ടെത്തി. ഇതിനു മുമ്പും മൂന്നു തവണ വിഷപാമ്പുകളെ കണ്ടിരുന്നതായി ജീവനക്കാരും ഡ്യൂട്ടിക്കുള്ള പോലീസുകാരും പറയുന്നു. വിഷപാമ്പിനെ കണ്ടെത്തിയതിനെ തുടര്‍ന്ന് പോലീസ് ഉദ്യോഗസ്ഥര്‍ രാത്രി പുറത്താണ് കൊതുകടി കൊണ്ട് കിടന്നത്.

പഴയ എം എസ് വാര്‍ഡിലാണ് പോലീസിന്റെ വിശ്രമമുറി. പുതിയ കെട്ടിടത്തിലാണ് ഓക്‌സിജന്‍ സിലിണ്ടര്‍ സൂക്ഷിക്കുന്ന മുറി പ്രവര്‍ത്തിക്കുന്നത്. കെട്ടിടങ്ങള്‍ക്കു പിറകില്‍ മാലിന്യങ്ങള്‍ കുന്നുകൂടിയതിനാലും കെട്ടിടത്തിനോട് ചേര്‍ന്ന് മരങ്ങള്‍ വളര്‍ന്നതിനാലും ഇതു വഴിയായിരിക്കാം പാമ്പുകള്‍ എത്തുന്നതെന്നാണ് സംശയിക്കുന്നതെന്ന് ജീവനക്കാര്‍ പറയുന്നു.