എസ് കെ എസ് എസ് എഫ് സര്‍ഗലയം: സര്‍ഗപ്രതിഭ തെളിയിച്ച് സഹോദരങ്ങള്‍

ബദിയടുക്ക: (www.kasargodvartha.com 27/04/2015) ബദിയടുക്ക മേഖല സംഘടിപ്പിച്ച എസ് കെ എസ് എസ് എഫ് സര്‍ഗലയത്തില്‍ സര്‍ഗപ്രതിഭയറിയിച്ച് സഹോദരങ്ങള്‍. അഹ്മദ് തന്‍സീഫ്, സര്‍ഫ്രാസ്, ശിബിന്‍ മഹ്‌റൂഫ് എന്നീ സഹോദരങ്ങളാണ് ശ്രദ്ധേയരായി മാറിയത്. ബാറഡുക്കയിലെ ഹനീഫ-സുബൈദ ദമ്പതികളുടെ മക്കളാണ് ഇവര്‍.

ബാറഡുക്ക ഖുവ്വത്തുല്‍ ഇസ്‌ലാം മദ്‌റസ പത്താം ക്ലാസ് വിദ്യാര്‍ത്ഥിയായ തന്‍സീഫ് സീനിയര്‍ വിഭാഗം പടപ്പാട്ട്, അറബിഗാനം എന്നീ മത്സരങ്ങളില്‍ എ ഗ്രേഡോടെ ഒന്നാം സ്ഥാനവും കലാപ്രതിഭാ പട്ടവും കരസ്ഥമാക്കി.

ഏഴാം ക്ലാസ് വിദ്യാര്‍ത്ഥിയായ സര്‍ഫാസ് ജൂനിയര്‍ വിഭാഗം ഹിഫ്‌ള് മത്സരത്തില്‍ എ ഗ്രേഡോടെ ഒന്നാം സ്ഥാനവും അഞ്ചാം ക്ലാസ് പഠിതാവായ ശിബിന്‍ മഹ്‌റൂഫ് ഖുര്‍ആന്‍ പാരായണ മത്സരത്തില്‍ ഒന്നാം സ്ഥാനവും സബ്ജൂനിയര്‍ വിഭാഗം കലാപ്രതിഭാ പട്ടവും നേടി. വിദ്യാര്‍ത്ഥികളെ എസ് കെ എസ് എസ് എഫ് ബാറഡുക്ക ശാഖയും ജമാഅത്ത് കമ്മിറ്റിയും അഭിനന്ദിച്ചു.