എസ്ഐആർ ഫോം പൂരിപ്പിച്ചു നൽകുന്നത് തദ്ദേശ തിരഞ്ഞെടുപ്പിൽ സ്ഥാനാർഥികൾക്ക് തുറുപ്പുചീട്ടാകുന്നു

കുമ്പള: (KasargodVartha) തദ്ദേശ സ്വയംഭരണ തിരഞ്ഞെടുപ്പിന്റെ ചിത്രം തെളിഞ്ഞതോടെ സ്ഥാനാർഥികളുടെ വീട് വീടാന്തരമുള്ള പ്രചാരണത്തിന് തുടക്കമായി. ആദ്യ ഘട്ടത്തിൽ സ്ഥാനാർഥികൾ മാത്രമാണ് വീടുകയറിയുള്ള വോട്ട് പിടിത്തം നടത്തുന്നത്.

സമഗ്ര വോട്ടർ പട്ടിക പരിഷ്കരണവുമായി ബന്ധപ്പെട്ട് തിരഞ്ഞെടുപ്പ് കമ്മീഷൻ എസ്ഐആർ (SIR) എന്യൂമറേഷൻ ഫോമുകൾ ബിഎൽഒമാർ വഴി വിതരണം ചെയ്യുകയും, അത് തിരിച്ചു വാങ്ങുകയും ചെയ്യുന്നതിനിടയിലാണ് തദ്ദേശ തിരഞ്ഞെടുപ്പിന്റെ കേളികൊട്ടുയർന്നത്. ഇത് തിരഞ്ഞെടുപ്പിൽ മത്സരിക്കുന്ന സ്ഥാനാർഥികൾക്ക് ഒരു പിടിവള്ളിയായി മാറുകയായിരുന്നു.

പ്രാദേശിക വിഷയങ്ങൾ ഏറെ ചർച്ച ചെയ്യപ്പെടുന്ന തദ്ദേശ തിരഞ്ഞെടുപ്പിൽ, വോട്ട് തേടി വീട്ടിലെത്തുന്ന സ്ഥാനാർഥി ആദ്യം ചോദിക്കുന്നത് എസ്ഐആർ ഫോം പൂരിപ്പിച്ചു നൽകിയോ എന്നാണ്. പൂരിപ്പിച്ചു നൽകിയിട്ടില്ലെങ്കിൽ സ്ഥാനാർഥി തന്നെ അത് പൂർത്തിയാക്കി നൽകും. പകരമായി തനിക്കുള്ള വോട്ട് അഭ്യർഥിക്കുകയും ചെയ്യും.

ഫോം പൂരിപ്പിച്ചു നൽകുക വഴി അത് തങ്ങൾക്ക് വോട്ടായി മാറുമെന്ന പ്രതീക്ഷയാണ് സ്ഥാനാർഥികൾക്കുള്ളത്. ഇതിനിടയിൽ, വോട്ടർമാർ പ്രാദേശിക വിഷയങ്ങൾ മറക്കുന്നത് സ്ഥാനാർഥികൾക്ക് അനുഗ്രഹമായി മാറിയിട്ടുമുണ്ട്.

നിങ്ങളുടെ വീട്ടിൽ വോട്ട് ചോദിക്കാൻ വരുന്ന സ്ഥാനാർത്ഥി എസ്ഐആർ ഫോം പൂരിപ്പിച്ചു തന്നോ? നിങ്ങളുടെ അഭിപ്രായം കമൻ്റ് ചെയ്യുക. സുഹൃത്തുക്കളുമായി പങ്കുവെക്കൂ. 

Article Summary: SIR forms for voter list revision are being used by candidates in local elections as a tactic to gain votes.

#LBElection #Kasaragod #SIRForm #ElectionTactic #KeralaPolitics #LocalBodyPolls