'പ്രഭാകരന്‍ കമ്മീഷന്‍ നിര്‍ദേശങ്ങള്‍ ബജറ്റില്‍ ഉള്‍പ്പെടുത്തണം'

Advt. P.P. Shyamala Devi

കാസര്‍കോട്: ജില്ലയുടെ സമഗ്രവികസനത്തിനായി സമര്‍പിച്ച പ്രഭാകരന്‍ കമ്മീഷന്‍ റിപോര്‍ട്ടിലെ നിര്‍ദേശങ്ങള്‍ കൂടി സംസ്ഥാന ബജറ്റില്‍ ഉള്‍പ്പെടുത്തുന്നതിനുളള നടപടി സ്വീകരിക്കണമെന്ന് ജില്ലാ പഞ്ചായത്ത് പ്രസിഡന്റ് അഡ്വ.പി.പി.ശ്യാമളാദേവി മുഖ്യമന്ത്രിയോട് ആവശ്യപ്പെട്ടു.

സംസ്ഥാന സര്‍ക്കാറിന്റെ പ്രത്യേക താല്‍പര്യ പ്രകാരം കാസര്‍കോട് ജില്ലയുടെ വികസനത്തിനായി പദ്ധതികള്‍ തയ്യാറാക്കുന്നതിന് പി.പ്രഭാകരന്‍, റിട്ട.ചീഫ് സെക്രട്ടറിയെ കമ്മീഷനായി നിയോഗിച്ചിരുന്നു. പ്രഭാകരന്‍ കമ്മീഷന്‍ ജില്ലയുടെ സമഗ്രമായ വികസനം ലക്ഷ്യമിട്ട് ജില്ലയിലെ ജനപ്രതിനിധികള്‍ വകുപ്പുതല ഉദ്യോഗസ്ഥര്‍, രാഷ്ട്രീയ- സാംസ്‌ക്കാരിക- സാമൂഹിക മേഖലകളിലെ പ്രഗത്ഭര്‍ എന്നിവരുമായി ഏതാണ്ട് നാലു മാസക്കാലം വിശദമായ കൂടിക്കാഴ്ചകളും ചര്‍ച്ചകളും നടത്തി സമഗ്രമായ റിപോര്‍ട്ട് സര്‍ക്കാറിലേക്ക് സമര്‍പിക്കുകയുണ്ടായി.

എന്നാല്‍ 2013-14 ലെ സംസ്ഥാന ബജറ്റില്‍ പ്രഭാകരന്‍ കമ്മീഷന്‍ സമര്‍പിച്ച നിര്‍ദേശങ്ങള്‍ ഒന്നും തന്നെ നടപ്പിലാക്കാന്‍ തുക വകയിരുത്തിയിട്ടില്ല എന്നുളളത് അങ്ങേയറ്റം ഖേദകരമാണെന്ന് മുഖ്യമന്ത്രിക്കുളള ഫാക്‌സ് സന്ദേശത്തില്‍ ജില്ലാ പഞ്ചായത്ത് പ്രസിഡന്റ് ചൂണ്ടിക്കാട്ടി.