ഉപ്പളയിൽ അതിരൂക്ഷമായ കടലാക്രമണം; റോഡ് തകർന്നതോടെ 60 കുടുംബങ്ങൾ ഒറ്റപ്പെട്ടു, മൂന്ന് വീടുകളുടെ അടിത്തറ ഇളകി; അധികാരികൾ തിരിഞ്ഞുനോക്കിയില്ലെന്ന് പരാതി

ഉപ്പള: (KasargodVartha) അതിരൂക്ഷമായ കടലാക്രമണത്തെ തുടർന്ന് ഉപ്പളയിലെ അറുപതോളം തീരദേശ കുടുംബങ്ങൾ പൂർണമായും ഒറ്റപ്പെട്ടു. ജനങ്ങൾ കടുത്ത ദുരിതവും ആശങ്കയും അനുഭവിക്കുമ്പോഴും ജില്ലാ ഭരണകൂടം തിരിഞ്ഞുനോക്കിയില്ലെന്ന് നാട്ടുകാർ കാസർകോട് വാർത്തയോട് പറഞ്ഞു.

മഴക്കാലത്ത് ഫിഷറീസ് വകുപ്പ് നിർമ്മിച്ച റോഡ് പൂർണ്ണമായി തകർന്നതോടെയാണ് പ്രദേശവാസികൾക്ക് യാത്രാമാർഗം അടഞ്ഞത്. ബംഗ്ലാ, ഐല കടപ്പുറം, അയൂർ, കുതുപുള്ളു പ്രദേശങ്ങളിലെ ജനങ്ങൾ വർഷങ്ങളായി കടലാക്രമണ ഭീഷണിയിലാണ്. 

നേരത്തെ 100 മീറ്ററിലേറെ അകലമുണ്ടായിരുന്ന തീരം ഇപ്പോൾ വീടുകളുടെ മുറ്റത്തെത്തി. കഴിഞ്ഞ രണ്ടു വർഷത്തിനുള്ളിൽ തെങ്ങുകൾ, കാറ്റാടി മരങ്ങൾ, താത്കാലിക കടൽഭിത്തി, റോഡ് തുടങ്ങിയ പല അടിസ്ഥാന സൗകര്യങ്ങളും കടലെടുത്തു.

റോഡ് തകർന്നതോടെ, ഒരുഭാഗത്ത് കടലും മറുഭാഗത്ത് റെയിൽവേ പാതയും കാരണം വാഹനഗതാഗതം പൂർണ്ണമായി നിലച്ചു. പ്രായമായവരെ ആശുപത്രിയിലെത്തിക്കാൻ കഴിയാത്ത അവസ്ഥയാണെന്ന് നാട്ടുകാർ പറയുന്നു. നിരവധി വീടുകൾ കടലാക്രമണ ഭീഷണി നേരിടുന്ന ഈ സാഹചര്യത്തിൽ, കഴിഞ്ഞ ദിവസങ്ങളിൽ രണ്ട് വീടുകളുടെ അടുക്കളഭാഗം അടക്കം കടലെടുത്തിരുന്നു.

കടലിനോട് ചേർന്ന് നിർമ്മിച്ച പുലിമുട്ടുകൾ അശാസ്ത്രീയമായതിനാലാണ് കടൽഭിത്തിയില്ലാത്ത സ്ഥലങ്ങളിലെ സ്ഥിതി വഷളാക്കിയതെന്ന് നാട്ടുകാർ ആരോപിച്ചു. രാജീവി, ജയന്ത, വാസന്തി എന്നിവരുടെ വീടുകളുടെ അടിത്തറയാണ് തകർന്ന നിലയിലുള്ളത്. 

ഇവർ രാത്രിയിൽ ബന്ധുവീടുകളിലാണ് അഭയം തേടുന്നത്. വീടിന്റെ അടുക്കളയും കുളിമുറിയും, മീൻ സൂക്ഷിക്കാൻ ഉപയോഗിക്കുന്ന ഷെഡും കടലെടുത്തതായി ഇവർ പറയുന്നു.

അധികൃതരും ജനപ്രതിനിധികളും നടപടി സ്വീകരിക്കാത്തതിനാൽ, പ്രദേശവാസികൾ സ്വന്തം നിലയിൽ താൽക്കാലിക റോഡ് നിർമ്മിച്ച് നടന്നുപോകാനുള്ള വഴിയൊരുക്കി. അധികാരികൾ അടിയന്തരമായി ഇടപെട്ടില്ലെങ്കിൽ അടുത്ത തിരഞ്ഞെടുപ്പിൽ വോട്ട് ചെയ്യുന്നത് ബഹിഷ്കരിക്കുമെന്ന് അവർ മുന്നറിയിപ്പ് നൽകി.

മഞ്ചേശ്വരം എം.എൽ.എ. എ.കെ.എം. അഷറഫും വില്ലേജ് ഉദ്യോഗസ്ഥരും സ്ഥലം സന്ദർശിച്ച് ഫോട്ടോയെടുത്ത് പോയതല്ലാതെ കാര്യമായ ഒരു നടപടിയും സ്വീകരിച്ചിട്ടില്ലെന്ന് ഇവർ കുറ്റപ്പെടുത്തി. ഈ പ്രദേശത്തേക്ക് അനുവദിക്കുന്ന ഫണ്ട് പോലും മറ്റ് സ്ഥലങ്ങളിലേക്ക് മാറ്റുകയാണെന്നും ഇവർ ആരോപിക്കുന്നു.

പഞ്ചായത്ത് നിർമ്മിച്ച ശ്മശാനവും തകർന്ന് കിടക്കുകയാണ്. മത്സ്യതൊഴിലാളികൾക്ക് തോണി കയറ്റിയിടാൻ നിർമ്മിച്ച ഷെഡിന്റെ പകുതി ഭാഗവും കടലെടുത്തു. കളക്ടറും ജനപ്രതിനിധികളും അടിയന്തരമായി സ്ഥലത്തെത്തി തുടർനടപടി സ്വീകരിച്ചില്ലെങ്കിൽ ദേശീയപാത ഉപരോധം അടക്കമുള്ള പ്രക്ഷോഭ പരിപാടികൾ ആലോചിക്കുമെന്നും ഇവർ മുന്നറിയിപ്പ് നൽകി. 

കുട്ടികളെ സ്കൂളിലെത്തിക്കാനും പ്രായമായവരെയും രോഗികളെയും ആശുപത്രിയിൽ കൊണ്ടുപോകാനും ഏറെ കഷ്ടത അനുഭവിക്കുകയാണെന്ന് സ്ത്രീകളും അമ്മമാരും സങ്കടത്തോടെ പറയുന്നു. അടിയന്തരമായി കടൽഭിത്തി നിർമ്മിച്ചില്ലെങ്കിൽ ഈ മഴക്കാലത്തുതന്നെ പത്തോളം വീടുകൾ കടലെടുക്കുമെന്ന ആശങ്കയിലാണ് പ്രദേശവാസികൾ.

ഉപ്പളയിലെ ദുരിതമനുഭവിക്കുന്ന കുടുംബങ്ങൾക്ക് നിങ്ങളുടെ പിന്തുണ അറിയിക്കൂ. ഈ വാർത്ത ഷെയർ ചെയ്ത് അധികാരികളുടെ ശ്രദ്ധയിൽപ്പെടുത്താൻ സഹായിക്കൂ.

Article Summary: Coastal erosion isolates 60 families in Uppala, destroying homes and roads.

#Kerala #Uppala #CoastalErosion #Monsoon #Kasargod #KeralaNews