'മധൂര്‍ പഞ്ചായത്തില്‍ സംഘ് പരിവാര്‍-ഭൂമാഫിയ സംഘം ഒരു വിഭാഗത്തെ വേട്ടയാടുന്നു'
Oct 13, 2012, 22:37 IST
മധൂര്‍ പഞ്ചായത്തിലെ മതന്യൂനപക്ഷ വിഭാഗങ്ങള്‍ താമസിക്കുന്ന മേല്‍പ്രദേശങ്ങളില്‍ അകാരണമായി വീടുകള്‍ക്കും വാഹനങ്ങള്‍ക്കും നേരെ നിരന്തരം അക്രമങ്ങള്‍ നടത്തുകയും ഒരു വിഭാഗത്തിലെ ചെറുപ്പക്കാര്‍ മര്‍ദ്ദനത്തിനിരയാകുകയും കള്ളക്കേസുകളില്‍ അകപ്പെടുകയും ചെയ്യുന്നു.
കഴിഞ്ഞ മൂന്ന് വര്‍ഷത്തിനിടയില്‍ മീപ്പുഗുരി, കാളിയങ്കോട്, കൂടല്‍, രാംദാസ് നഗര്‍ എന്നിവിടങ്ങളില്‍ നടന്ന അനിഷ്ട സംഭവങ്ങളെക്കുറിച്ചും വീടുകള്‍ക്കും വാഹനങ്ങള്‍ക്കും നേരെയുണ്ടായ അക്രമങ്ങളെക്കുറിച്ചും നിക്ഷ്പക്ഷമായ അന്വേഷണം നടത്തിയാല്‍ ഇതുസംബന്ധിച്ചുള്ള സത്യാവസ്ഥ മനസ്സിലാകും.
ഇക്കാലയളവില്‍ അക്രമങ്ങളും മര്‍ദ്ദനങ്ങളും ഭീകരാന്തരീക്ഷവും ഭയന്ന് ഏകദേശം 40 ഓളം മുസ്‌ലിം കുടുംബങ്ങള്‍ക്ക് മേല്‍പ്രദേശങ്ങളില്‍നിന്നും കുടിയൊഴിഞ്ഞുപോകേണ്ടിവന്നിട്ടുണ്ട്. വാസ സ്ഥലങ്ങള്‍ ചുളുവിലക്ക് കൈക്കലാക്കാനും ഒരു വിഭാഗത്തെ ആട്ടിയോടിക്കാനും അതുവഴി സാമുദായിക ധ്രുവീകരണം നടത്തുവാനുമുള്ള സംഘ് പരിവാര്‍-മദ്യ-ഭൂമാഫിയ കൂട്ടുകെട്ടിന്റെ ഗൂഢശ്രമം തിരിച്ചറിയാനും ആവശ്യമായ നടപടി സ്വീകരിക്കാനും നിയമപാലകര്‍ക്കും ജില്ലാ അധികാരികള്‍ക്കും സാധിക്കുന്നില്ല.
മേല്‍പ്രദേശങ്ങളിലെ അക്രമങ്ങള്‍ക്കും കുടിയൊഴിപ്പിക്കലിനും കാലാകാലങ്ങളിലായി ബി.ജെ.പി. ഒറ്റക്ക് ഭരിക്കുന്ന മധൂര്‍ ഗ്രാമപഞ്ചായത്ത് ഭരണ സമിതികളുടെ ഒത്താശയുണ്ടെന്ന് ജനങ്ങള്‍ സംശയിക്കുന്നു. ഇക്കാര്യങ്ങളെ സംബന്ധിച്ച് വിശദമായ അന്വേഷണം നടത്താന്‍ പ്രത്യേക സംഘത്തെ നിയമിക്കാനും ന്യൂനപക്ഷ വിഭാഗത്തിന്റെ ജീവനും സ്വത്തിനും സംരക്ഷണം നല്‍കാനും ആവശ്യമായ നടപടി സ്വീകരിക്കണമെന്നും അദ്ദേഹം ആവശ്യപ്പെട്ടു.
നിവേദനത്തിന്റെ പകര്‍പ്പ് വ്യവസായ വകുപ്പ് മന്ത്രി പി.കെ.കുഞ്ഞാലിക്കുട്ടി, മുസ്‌ലിം ലീഗ് സംസ്ഥാന ജനറല്‍ സെക്രട്ടറി കെ.പി.എ. മജീദ്, എന്‍.എ. നെല്ലിക്കുന്ന് എം.എല്‍.എ, ഡി.ജി.പി, ഉത്തര മേഖല ഐജി, ജില്ലാ കലക്ടര്‍, ജില്ലാ പോലീസ് ചീഫ് എന്നിവര്‍ക്കും നല്‍കിയിട്ടുണ്ട്.
'ബേക്കല്‍ പോലീസ് സ്റ്റേഷന്‍ സി.പി.എം ഓഫീസായി പ്രവര്‍ത്തിക്കുന്നു'
കാസര്‍കോട്: ഉദുമ നിയോജക മണ്ഡലത്തിലെ ബേക്കല്‍ പോലീസ് സ്റ്റേഷനില്‍ യു.ഡി.എഫിന്റെ പോലീസ് നയത്തിന് വിരുദ്ധമായി അക്രമികള്‍ക്ക് സംരക്ഷണവും ഇരകള്‍ക്ക് പീഢനവും എന്ന നയം നടപ്പിലാക്കുകയാണെന്ന് മുസ്‌ലിം ലീഗ് ജില്ലാ ട്രഷറര്‍ എ.അബ്ദുര്‍ റഹ്മാന്‍ ആഭ്യന്തര മന്ത്രി തിരുവഞ്ചൂര്‍ രാധാകൃഷ്ണന് നല്‍കിയ നിവേദനത്തില്‍ പറഞ്ഞു.
ബേക്കല്‍ പോലീസ് സ്റ്റേഷന്‍ സി.പി.എം. ഏരിയ കമ്മിറ്റി ഓഫീസായി പ്രവര്‍ത്തിക്കുകയും ഏരിയ സെക്രട്ടറി സ്റ്റേഷന്‍ ഇന്‍ ചാര്‍ജ്ജ് ആവുകയും ചെയ്തതോടെ സ്റ്റേഷന്‍ പരിധിയില്‍ നീതി നിഷേധം നിത്യ സംഭവമായി മാറിയിരിക്കുകയാണ്.
ബേക്കല്‍ പോലീസ് സ്റ്റേഷനില്‍ ജോലി ചെയ്യുന്ന പോലീസുകാരില്‍ ഭൂരിഭാഗവും സി.പി.എം. അനുഭാവികളും പ്രവര്‍ത്തകരുമാണ്. യു.ഡി.എഫ്. പ്രവര്‍ത്തകര്‍ പ്രത്യേകിച്ച് മുസ്‌ലിം ലീഗ് പ്രവര്‍ത്തകരും അനുഭാവികളും സി.പി.എമ്മുകാരാല്‍ അക്രമിക്കപ്പെട്ടാല്‍ പരാതിക്കാര്‍ക്കെതിരെ വധശ്രമത്തിനും നരഹത്യക്കും കേസെടുക്കുന്ന പോലീസ് സി.പി.എം. അക്രമികള്‍ക്ക് സംരക്ഷണം നല്‍കുകയാണ്. സി.പി.എമ്മുകാര്‍ക്കുവേണ്ടി കള്ള പരാതിയും മറ്റും തയ്യാറാക്കുന്നതും കേസ് രജിസ്റ്റര്‍ ചെയ്യുന്നതും ബേക്കല്‍ പോലീസ് സ്റ്റേഷനിലെ പാര്‍ട്ടി പ്രവര്‍ത്തകരായ പോലീസുകാരാണ്.
കഴിഞ്ഞ മാസം ആറാട്ടുകടവില്‍ മകനോടൊപ്പം ബൈക്കില്‍ സഞ്ചരിക്കുകയായിരുന്ന ഖദീജ എന്ന വിട്ടമ്മയെ പതിയിരുന്ന് അക്രമിച്ച് വധിക്കാന്‍ ശ്രമിച്ച സംഭവത്തിലും സമദ് എന്ന മുസ്‌ലിംലീഗ് പ്രവര്‍ത്തകന്റെ കയ്യും കാലും തല്ലിയൊടിച്ച സംഭവത്തിലും മേല്‍പറമ്പില്‍ നടന്ന അനിഷ്ട സംഭവത്തിലും ശരിയാംവിധം മൊഴി രേഖപ്പെടുത്താനോ പ്രതികളെ പിടികൂടാനോ പോലീസ് തയ്യാറായില്ല. പോലീസിന്റെ താല്‍പര്യപ്രകാരം ദുര്‍ബലമായ വകുപ്പുകള്‍ ചേര്‍ത്ത് കേസ് രജിസ്റ്റര്‍ ചെയ്ത് പ്രതികളെ രക്ഷിക്കുകയാണ് ചെയ്തത്.
ബേക്കല്‍ പോലീസ് സ്റ്റേഷന്റെ ചുമതലയുള്ള ഉദ്യോഗസ്ഥനെ നോക്കുകുത്തിയാക്കി ചില സ്റ്റേഷനുകളില്‍നിന്നും സ്‌പെഷല്‍ ഡ്യൂട്ടിക്ക് എത്തിയവരും മാസങ്ങള്‍ക്ക് മുമ്പ് സ്ഥലംമാറ്റ ലിസ്റ്റില്‍ ഉള്‍പ്പെട്ടിട്ടും വിടുതല്‍ ചെയ്യാത്ത സി.പി.എം. അനുഭാവികളായ പോലീസുകാരാണ് സ്റ്റേഷന്‍ ഭരിക്കുന്നത്. ഇരകള്‍ക്ക് നീതി നിഷേധിക്കുകയും അക്രമികള്‍ക്ക് സംരക്ഷണം നല്‍കുകയും ചെയ്യുന്ന കാട്ടുനീതിയാണ് ബേക്കല്‍ പോലീസ് സ്റ്റേഷനില്‍ നടപ്പിലാക്കുന്നത്.
മുഴുവന്‍ ജനങ്ങളുടെയും ജീവനും സ്വത്തിനും സംരക്ഷണം നല്‍കാനും നിക്ഷപക്ഷമായ നീതി നിര്‍വ്വഹണം നടത്തുന്നതിനും ചുമതലപ്പെട്ട നീതിപാലകര്‍ നീതി നിഷേധികളായി മാറുന്നത് നാട്ടില്‍ അരാജകത്വം സൃഷ്ടിക്കും. ഇക്കാര്യങ്ങള്‍ സംബന്ധിച്ച് അന്വേഷണം നടത്തി ബേക്കല്‍ പോലീസ് സ്റ്റേഷനില്‍ ആവശ്യമായ ശുദ്ധീകരണം നടത്താന്‍ നടപടി സ്വീകരിക്കണമെന്ന് അബ്ദുര്‍ റഹ്മാന്‍ നിവേദനത്തില്‍ ആവശ്യപ്പെട്ടു.
Keywords: A. Abdul Rahman STU, Kasaragod, Muslim League, Minister, Thiruvanchoor Radhakrishnan, MLA, Police, Collector.
Tags
Share this story
