മണല്‍ കടത്തിന് പിടിയിലായ ലോറി ഡ്രൈവര്‍മാര്‍ക്കെതിരെ മോഷണ കുറ്റത്തിനും കേസെടുത്തു
Jul 31, 2012, 14:05 IST
കെ. എല്‍ 14 എച്ച് 9542 നമ്പര്‍ ലോറി ഡ്രൈവര്‍ മൂലടുക്കത്തെ അബ്ദുല്‍ നിസാര്‍(25), കെ. എല്‍ 14 എച്ച് 6059 നമ്പര്‍ ലോറി ഡ്രൈവര്‍ അട്ടേങ്ങാനത്തെ രഞ്ജിത്ത്(26) എന്നിവര്‍ക്കെതിരെയാണ് ആദൂര്‍ പോലീസ് മണല്‍കടത്തിയതിന് മോഷണ കുറ്റവും പി.ഡി.പി.പി ആക്ട് പ്രകാരം പൊതുമുതല്‍ നശീകരണത്തിനും കേസെടുത്തിരിക്കുന്നത്.
നേരത്തേ മണല്‍ കടത്ത് പിടികൂടിയാല്‍ കലക്ടര്‍ക്ക് റിപ്പോര്‍ട്ട് നല്‍കുക മാത്രമാണ് പോലീസ് ചെയ്തുവന്നിരുന്നത്. എന്നാല്‍ മണല്‍ മാഫിയയ്‌ക്കെതിരെ ശക്തമായ നടപടി സ്വീകരിക്കുന്നതിന്റെ ഭാഗമായാണ് മണല്‍ കടത്തുക്കാര്‍ക്കെതിരെ മോഷണകുറ്റവും പൊതുമുതല്‍ നശീകരണ കുറ്റവും ചുമത്തിയിട്ടുള്ളത്.
പുഴയുടെ അരികും മറ്റും ഭാഗങ്ങളും ജെ.സി.ബി ഉപയോഗിച്ച് കുഴിച്ചെടുത്ത് മണല്‍ കടത്തുകയാണ് ചെയ്യുന്നത്. മണല്‍കടത്ത് തടയാന്‍ ആദൂര്‍ പോലീസ് സ്‌റ്റേഷന്‍ പരിധിയില്‍പ്പെട്ട മുണ്ടക്കൈ, ആലൂര്‍ എന്നിവിടങ്ങളില്‍ പോലീസ് പിക്കറ്റ് പോസ്റ്റ് ഏര്‍പ്പെടുത്തിയിട്ടുണ്ട്. പോലീസ് പിക്കറ്റ് പോസ്റ്റ് ഉണ്ടായിട്ടും മറ്റ് പല സ്ഥലങ്ങളില്‍ നിന്ന് ഇടറോഡുകളുണ്ടാക്കിയും മറ്റും ജെ.സി.ബിയും ലോറികളും കൊണ്ടുവന്ന് മണല്‍ കടത്തികൊണ്ടുപോകുകയാണ് ചെയ്യുന്നത്. പോലീസിന്റെ കണ്ണുവെട്ടിച്ചാണ് ഇത്തരത്തില്‍ മണല്‍ കടത്തുന്നത്.
ആദൂര്‍ മുണ്ടക്കൈയില്‍ നിന്നും മണല്‍കടത്തുമ്പോഴാണ് തിങ്കളാഴ്ച വൈകിട്ട് രണ്ട് ലോറികളും പോലീസ് പിടികൂടിയത്. മണല്‍ലോറി പിടികൂടിയ സംഭവത്തില്‍ ജില്ലാ കലക്ടര്‍ക്ക് റിപ്പോര്‍ട്ട് നല്‍കിട്ടുണ്ടെന്നും മോഷണകുറ്റത്തിനും മറ്റും കേസെടുത്ത് കോടതിയില്‍ എഫ്.ഐ.ആര്‍ സമര്‍പ്പിച്ചുവെന്നും ആദൂര്‍ പോലീസ് അറിയിച്ചു.
അതേസമയം തിങ്കളാഴ്ച വൈകിട്ട് മൂന്ന് മണിക്ക് മൂലടുക്കത്ത് നിന്നും രണ്ട് ടിപ്പര്‍ ലോറികള്‍ ഓട്ടോയിലെത്തിയ രണ്ട് പോലീസുകാരുടെ നിര്‍ദ്ദേശ പ്രകാരം പോലീസ് സ്റ്റേഷനിലേക്ക് കൊണ്ടുപോകുകയായിരുന്നുവെന്നും പിന്നീട് ഈ ലോറി കടവില്‍ കൊണ്ടുപോയി മണല്‍ കടത്തിന് പിടികൂടുകയുമായിരുന്നുവെന്ന് മണല്‍ വില്‍പ്പനക്കാരായ ഇര്‍ഷാദ് ബോവിക്കാനവും ഹനീഫ ബോവിക്കാനവും പറഞ്ഞു.
Keywords: Kasaragod, Sand mafia, Driver, Theft, Police case
Tags
Share this story
