വീട്ടമ്മയെ ബന്ദിയാക്കി കവര്‍ച്ചയ്ക്ക് ശ്രമം

കാസര്‍കോട്: വീട്ടമ്മയെ ബന്ദിയാക്കി കവര്‍ച്ച നടത്താനുള്ള ശ്രമം വിഫലമായി. ചൗക്കി ആസാദ് നഗറിലെ കുന്നില്‍ ഹൗസില്‍ അബൂബക്കറിന്റെ ഭാര്യ അസ്മ(42)യെയാണ് ബന്ദിയാക്കി കവര്‍ച്ച നടത്താന്‍ ശ്രമിച്ചത്. ഇവര്‍ താമസിക്കുന്ന ക്വാര്‍ട്ടേഴ്‌സിന്റെ അടുക്കളഭാഗം കുത്തിതുറന്ന് പുലര്‍ച്ചെ ഒരുമണിയോടെ അകത്ത് കടന്ന രണ്ടംഗസംഘമാണ് ഇവരുടെ വായ പൊത്തിപിടിച്ച് ബന്ദിയാക്കി കവര്‍ച്ച നടത്താന്‍ ശ്രമിച്ചത്. മകന്‍ ഉമ്മര്‍ ശബ്ദം കേട്ട് ഉണര്‍ന്ന് നിലവിളിച്ചതോടെ തടിച്ച ഒരാളും മറ്റൊരാളും ഓടി രക്ഷപ്പെടുകയായിരുന്നു. തൊട്ടടുത്ത അഹമ്മദ് എന്നയാള്‍ താമസിക്കുന്ന ക്വാര്‍ട്ടേസിലെ വാതില്‍ പുറത്ത് നിന്ന് പൂട്ടിയിരുന്നു. ബഹളം കേട്ട് അഹമ്മദും വീട്ടുകാരും പുറത്തിറങ്ങാന്‍ ശ്രമിച്ചെങ്കിലും പുറത്തിറങ്ങാന്‍ സാധിച്ചില്ല. സംഭവുമായി ബന്ധപ്പെട്ട് അസ്മ കാസര്‍കോട് ടൗണ്‍ പോലീസില്‍ പരാതി നല്‍കിയിട്ടുണ്ട്.

തൊട്ടടുത്ത ഗള്‍ഫുകാരനായ അജ്മല്‍ ഹൗസില്‍ അഷ്‌റഫിന്റെ വീട്ടിലും കവര്‍ച്ചാ ശ്രമം നടന്നു. അഷ്‌റഫിന്റെ ഭാര്യ നജുമ ബേക്കല്‍ ഉറൂസ് നടക്കുന്നതിനാല്‍ സ്വന്തം വീട്ടില്‍ പോയതായിരുന്നു. ശനിയാഴ്ച രാവിലെ നാട്ടുകാര്‍ വിവരമറിയിച്ചതിന്റെ അടിസ്ഥാനത്തില്‍ നജുമ എത്തിയപ്പോള്‍ വീട് കുത്തിതുറന്ന നിലയില്‍ കണ്ടെത്തുകയായിരുന്നു. അലമാരയിലെ സാധനങ്ങളും മറ്റും വാരി വലിച്ചെറിഞ്ഞ നിലയിലാണ്. സാധനങ്ങളൊന്നും നഷ്ടപ്പെട്ടിട്ടില്ല.