കരിങ്കല്ല് പൊടി റോഡിലേക്ക് ഇറക്കി; മൂന്ന് വാഹനങ്ങള്‍ അപകടത്തില്‍പെട്ടു, യൂത്ത് ലീഗ് പ്രവര്‍ത്തകര്‍ റോഡ് ഉപരോധിച്ചു

കാസര്‍കോട്: (www.kasargodvartha.com 12.03.2019) റോഡിന്റെ നവീകരണ പ്രവര്‍ത്തനവുമായി ബന്ധപ്പെട്ട് റോഡിന് മധ്യത്തില്‍ കരിങ്കല്‍പൊടി ഇറക്കിയതിനെതുടര്‍ന്ന് മൂന്ന് വാഹനങ്ങള്‍ അപകടത്തില്‍പെട്ടു. ഇതേതുടര്‍ന്ന് യൂത്ത് ലീഗ് പ്രവര്‍ത്തകര്‍ റോഡ് ഉപരോധിച്ചു. ചെമ്മനാട് ചളിയങ്കോട്ടാണ് റോഡ് നവീകരണത്തിന്റെ ഭാഗമായി കരിങ്കല്‍പൊടി റോഡിന് നടുവില്‍ ഇറക്കിയത്.

വാഹനങ്ങള്‍ക്ക് ഇത് പെട്ടന്നുകാണാന്‍ കഴിയാത്തതിനാല്‍ മൂന്ന് വാഹനങ്ങള്‍ കരിങ്കല്‍പൊടിയില്‍ കയറി അപകടത്തില്‍പെട്ടു. ഇതോടെയാണ് യൂത്ത് ലീഗ് പ്രവര്‍ത്തകര്‍ ചൊവ്വാഴ്ച രാത്രി 8.30 മണിയോടെ റോഡ് ഉപരോധിച്ചത്.

റോഡില്‍നിന്നും കരിങ്കല്‍പൊടി നീക്കംചെയ്യാതെ ഉപരോധം അവസാനിപ്പിക്കില്ലെന്നറിച്ചതോടെ പോലീസും ബന്ധപ്പെട്ട അധികൃതരും സ്ഥലത്തെത്തി. പ്രതിഷേധക്കാരുമായി നടത്തിയ ചര്‍ച്ചയ്‌ക്കൊടുവില്‍ ജെസിബി ഉപയോഗിച്ച് കരിങ്കല്‍പൊടി നീക്കം ചെയ്തു.