Donation News | യുക്തിവാദി എച്ച് കറുവന്റെ ഭൗതിക ശരീരം മെഡിക്കൽ കോളജിന് കൈമാറി
● പരിയാരം മെഡിക്കൽ കോളജിലെ അനാട്ടമി വിഭാഗം മേധാവി ബീന നമ്പ്യാരുടെ നേതൃത്വത്തിലുള്ള സംഘം മൃതദേഹം ഏറ്റുവാങ്ങി.
● കേരള യുക്തിവാദി സംഘം അദ്ദേഹത്തിന്റെ ആഗ്രഹത്തെ അംഗീകരിച്ചു.
ഉദുമ: (KasargodVartha) കഴിഞ്ഞ ദിവസം അന്തരിച്ച പ്രമുഖ യുക്തിവാദിയും സാമൂഹിക, വിദ്യാഭ്യാസ മേഖലയിലെ ഉന്നത വ്യക്തിത്വവുമായിരുന്ന ഉദുമ ബേവൂരിയിലെ എച്ച് കറുവന്റെ ഭൗതിക ശരീരം വൈദ്യ വിദ്യാർത്ഥികളുടെ പഠനത്തിനായി പരിയാരം മെഡിക്കൽ കോളജിലെ അനാട്ടമി വിഭാഗത്തിന് വിട്ടുനൽകി.
തന്റെ ജീവിതകാലം മുഴുവൻ യുക്തിബോധവും മാനവിക മൂല്യങ്ങളും പ്രചരിപ്പിച്ച കറുവൻ, മരണശേഷവും തന്റെ ശരീരം മനുഷ്യകുലത്തിന്റെ ഉന്നമനത്തിനായി ഉപയോഗിക്കണമെന്ന ആഗ്രഹം പ്രകടിപ്പിച്ചു.
പരിയാരം മെഡിക്കൽ കോളജിലെ അനാട്ടമി വിഭാഗം മേധാവി ബീന നമ്പ്യാരുടെ നേതൃത്വത്തിലുള്ള സംഘം മൃതദേഹം ഏറ്റുവാങ്ങി. കേരള യുക്തിവാദി സംഘം സംസ്ഥാന പ്രസിഡണ്ട് ഗംഗൻ അഴീക്കോട്, സെക്രട്ടറി അശോക് കുമാർ, ട്രഷറർ ഉണ്ണികൃഷ്ണൻ ചെറുവത്തൂർ, മാധവൻ കുറ്റിക്കോൽ, മോഹനൻ മാങ്ങാട്, കെ ടി ജയൻ, കെ ടി രാജ്കുമാർ, എച്ച് കറുവന്റെ മക്കൾ, സഹോദരങ്ങൾ, ബന്ധുമിത്രാദികൾ എന്നിവർ ചടങ്ങിൽ സംബന്ധിച്ചു.
മാനവീകതയും ശാസ്ത്രബോധവും സാമൂഹിക പ്രതിബദ്ധതയും മുൻനിർത്തി മരണാനന്തരം തന്റെ ഭൗതിക ശരീരം വൈദ്യ പഠനത്തിനായി ദാനം ചെയ്യാൻ തയ്യാറായ എച്ച് കറുവന്റെ ആഗ്രഹത്തെയും തീരുമാനത്തെയും കേരള യുക്തിവാദി സംഘം സംസ്ഥാന കമ്മിറ്റി അഭിനന്ദിച്ചു. തുടർന്ന് മെഡികൽ കോളജ് പരിസരത്ത് അനുശോചന യോഗം ചേർന്നു.
#HKaruvan #BodyDonation #MedicalEducation #Rationalism #SocialCommitment #Kerala
