റെയിൽവേ സേവന വീഴ്ച: കമ്പനികൾക്ക് പിഴ; തെറ്റായ വിവരം നൽകിയ ജീവനക്കാർക്കെതിരെ നടപടി; ട്രെയിൻ യാത്രയിലെ ദുരിതത്തില്‍ പരാതി നൽകിയ കാസർകോട് സ്വദേശിക്ക് അനുകൂല തീരുമാനവുമായി റെയിൽവേ

കാസർകോട്: (KasargodVartha) ട്രെയിൻ യാത്രയ്ക്കിടെയുണ്ടായ യാത്രക്കാരുടെ സൗകര്യങ്ങളുമായി ബന്ധപ്പെട്ട പരാതികളിൽ നടപടിയുമായി റെയിൽവേ. ക്ലീനിങ്, ഹൗസ് കീപ്പിങ് സേവനങ്ങൾ, ഉപഭോഗ സാധനങ്ങളുടെ ലഭ്യത എന്നിവയിലെ വീഴ്ചകൾ ചൂണ്ടിക്കാട്ടിയ പരാതിയെ തുടർന്ന് കരാർ സ്ഥാപനങ്ങൾക്ക് പിഴ ചുമത്തിയതായും, തെറ്റായ വിവരം നൽകിയതായി കണ്ടെത്തിയ ജീവനക്കാർക്കെതിരെ വകുപ്പ് തല നടപടി സ്വീകരിച്ചതായും റെയിൽവേ അധികൃതർ അറിയിച്ചതായി കാസർകോട്ടെ പൊതുപ്രവർത്തകൻ എം വി ശിൽപരാജ് വ്യക്തമാക്കി.

കരാർ കമ്പനികൾക്ക് പിഴ

2026 ഓഗസ്റ്റ് 29-ന് പെരമ്പൂരിൽ നിന്ന് 03252 എസ്എംവിബി - ഡിഎൻആർ പ്രത്യേക ട്രെയിനിൽ മഹാരാഷ്ട്രയിലേക്ക് യാത്ര ചെയ്യുന്നതിനിടെയാണ് ശിൽപരാജ് പരാതി നൽകിയത്. സ്ലീപ്പർ ക്ലാസിലെ എസ്3 കോച്ചിലായിരുന്നു യാത്ര. യാത്രക്കാരുടെ സൗകര്യങ്ങൾ, ശുചീകരണം, പരാതി പരിഹാര സംവിധാനം, യാത്രക്കാരുടെ സുരക്ഷ തുടങ്ങിയ വിഷയങ്ങൾ ഇദ്ദേഹം റെയിൽവേയുടെ ശ്രദ്ധയിൽപ്പെടുത്തി. പരാതികളിൽ ഈസ്റ്റ് സെൻട്രൽ റെയിൽവേയുടെ ദാനാപൂർ കോച്ചിങ് ഡിപ്പോ പരിശോധന നടത്തി മറുപടി നൽകിയതായാണ് ശിൽപരാജ് വ്യക്തമാക്കുന്നത്.

പരിശോധനയിൽ സേവന വീഴ്ചകൾ കണ്ടെത്തിയതിനെ തുടർന്ന് ഗ്രേറ്റർ നോയിഡയിലെ 'ഷൈൻ ആൻഡ് സ്റ്റാൻഡേർഡ് ഫെസിലിറ്റി മാനേജ്മെൻ്റ് പ്രൈവറ്റ് ലിമിറ്റഡ്' എന്ന സ്ഥാപനത്തിന് പിഴ ചുമത്തിയതായി റെയിൽവേ അറിയിച്ചു. ടോയ്‌ലറ്റുകളിലെ വേസ്റ്റ് ബിന്നുകളുടെ ശുചീകരണം ഉൾപ്പെടുന്ന മെക്കനൈസ്ഡ് കോച്ച് ക്ലീനിങ് കരാറുമായി ബന്ധപ്പെട്ട വീഴ്ചകൾക്ക് ഡൽഹിയിലെ 'എപിസിഒഎൻ ഇന്ത്യ' എന്ന സ്ഥാപനത്തിനും പിഴ ചുമത്തിയതായി അധികൃതർ അറിയിച്ചു.

തെറ്റായ വിവരം നൽകിയ ജീവനക്കാർക്ക് നടപടി

പരാതി പരിഹാര സംവിധാനത്തിലൂടെ യാത്രക്കാരൻ നൽകിയ വിവരത്തിൻ്റെ കൃത്യത സംബന്ധിച്ചും ശിൽപരാജ് റെയിൽവേയുടെ ശ്രദ്ധയിൽപ്പെടുത്തിയിരുന്നു. സ്ലീപ്പർ കോച്ചുകളിൽ ഹാൻഡ് വാഷിന് സംവിധാനമില്ലെന്ന തരത്തിൽ 'റെയിൽ മദദ്' വഴി മറുപടി ലഭിച്ചതാണ് ഇതിന് കാരണമായത്. ഈ മറുപടി ഏത് ചട്ടത്തിൻ്റെയോ നിർദേശത്തിൻ്റെയോ അടിസ്ഥാനത്തിലാണ് നൽകിയതെന്ന് പരിശോധിക്കണമെന്നും, വിവരം നൽകിയ ജീവനക്കാരെ കണ്ടെത്തണമെന്നും അദ്ദേഹം ആവശ്യപ്പെട്ടിരുന്നു. തുടർന്ന് നടത്തിയ പരിശോധനയിൽ തെറ്റായ വിവരങ്ങൾ നൽകിയ ജീവനക്കാർക്ക് താക്കീത് നൽകിയതായും വകുപ്പ് തല നടപടി സ്വീകരിച്ചതായും റെയിൽവേ അധികൃതർ അറിയിച്ചു.

ലഹരിവസ്തു കണ്ടെത്തി; സിസിടിവി വേണമെന്ന് ആവശ്യം

യാത്രയ്ക്കിടെ ട്രെയിനിനുള്ളിൽ സംശയാസ്പദമായ ലഹരിവസ്തു കണ്ടെത്തി ബന്ധപ്പെട്ട അധികൃതരെ വിവരം അറിയിച്ചതിനും എം വി ശിൽപരാജിനെ റെയിൽവേ അധികൃതർ അഭിനന്ദിച്ചു. നിരോധിത വസ്തുവിനെക്കുറിച്ച് വിവരം നൽകിയതിനാണ് ആർപിഎഫ് ഉദ്യോഗസ്ഥർ അഭിനന്ദിച്ചത്. ട്രെയിനുകളിലും റെയിൽവേ സ്റ്റേഷനുകളിലും നിരോധിത മേഖലകളിലെ പുകവലി തടയുന്നതിനായി പരിശോധനകൾ ശക്തമാക്കാൻ ആർപിഎഫ് ഇൻസ്പെക്ടർമാർക്ക് നിർദേശം നൽകിയതായും റെയിൽവേ വ്യക്തമാക്കി.

ട്രെയിൻ കോച്ചുകളിലെ സുരക്ഷ ശക്തിപ്പെടുത്തുന്നതിൻ്റെ ഭാഗമായി സിസിടിവി ക്യാമറകൾ സ്ഥാപിക്കുന്ന പ്രവർത്തനങ്ങൾ പുരോഗമിക്കുകയാണെന്നും ഭാവിയിൽ എല്ലാ കോച്ചുകളിലും സിസിടിവി സൗകര്യം ഏർപ്പെടുത്തുമെന്നും റെയിൽവേ ഗ്രീവൻസ് ഓഫീസർ അറിയിച്ചു. എല്ലാ യാത്രാ കോച്ചുകളിലും സമഗ്രമായ സിസിടിവി സംവിധാനം സ്ഥാപിക്കുന്നതിനായി ഫണ്ട് അനുവദിക്കണമെന്ന് ശിൽപരാജ് റെയിൽവേ മന്ത്രാലയത്തോടും ജനപ്രതിനിധികളോടും ആവശ്യപ്പെട്ടു. സിസിടിവി സംവിധാനം അന്വേഷണങ്ങൾക്ക് ആവശ്യമായ തെളിവുകൾ ലഭ്യമാക്കുന്നതിനും ആർപിഎഫ് ഉൾപ്പെടെയുള്ള ഏജൻസികളുടെ പ്രവർത്തനങ്ങൾക്ക് സഹായകരമാകുമെന്നും അദ്ദേഹം ചൂണ്ടിക്കാട്ടി.

കൂടുതല്‍ വിവരങ്ങള്‍ അറിയാന്‍ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റില്‍ കമൻ്റായി രേഖപ്പെടുത്തുക.

Article Summary: Railways fined firms after Kasaragod native complained via Rail Madad.

#KasargodVartha #IndianRailways #RailMadad #KasaragodNews #RailwayPoliceForce #MalayalamNews #RenuNews