ചാത്തങ്കൈ മേല്‍പ്പാലം: പഞ്ചായത്തിനെതിരെ നാട്ടുകാര്‍ രംഗത്ത്
Aug 11, 2012, 22:30 IST
ഗര്‍ഭിണികളേയും രോഗികളേയും അഞ്ച് കിലോ മീറ്ററോളം ചുമന്ന് പ്രധാന റോഡിലെത്തിച്ചാണ് ഇപ്പോള്‍ ആശുപത്രിയിലെത്തിക്കുന്നത്. നിരവധി തവണ വിവിധ അധികാര കേന്ദ്രങ്ങള്‍ക്ക് പരാതി നല്‍കിയെങ്കിലും ഇതു വരെയായിട്ടും ആരും തിരിഞ്ഞു നോക്കിയില്ല. ബേക്കല്‍ ടൂറിസത്തിന്റെ ഭാഗമായി ചാത്തങ്കൈയില്‍ നിര്‍മ്മാണം നടന്നു കൊണ്ടിരിക്കുന്ന റിസോര്‍ട്ടിലേക്ക് റോഡു പണിയുന്നത് ഈ പ്രദേശത്തൂടെയായിരുന്നെങ്കില്‍ പ്രധാന റോഡില്‍ നിന്നും വെറും ഒന്നര കിലോ മീറ്റര്‍ ദൂരം മാത്രമേ ഉണ്ടാവുകയുള്ളൂ. എന്നാല്‍ 19 കിലോ മീറ്ററോളം ഈ നാട്ടിലെ ജനങ്ങള്‍ക്ക് യാതൊരു പ്രയോജനവുമില്ലാത്ത രീതിയില്‍ കോടികള്‍ ചിലവഴിച്ച് കീഴൂര്‍ വഴിയാണ് പഞ്ചായത്തിന്റെ ഒത്താശയോടെ റോഡു നിര്‍മ്മാണം നടന്നു കൊണ്ടിരിക്കുന്നത്.
മുമ്പ് റോഡ് സൗകര്യമുണ്ടായിരുന്ന കുടുംബങ്ങള്‍ക്ക് അവര്‍ കൃഷി ചെയ്ത് ഉപജീവനം നടത്തിയിരുന്ന ഹെക്ടര്‍ കണക്കിന് സ്ഥലം തുച്ഛമായ വിലയ്ക്ക് റിസോര്‍ട്ടിന് വേണ്ടി നല്‍കിയിട്ടും നടവഴി പോലും കൊടുക്കാതെ കൂറ്റന്‍ മതില്‍ കെട്ടിയടച്ച് മനുഷ്യാവകാശ ധ്വംസനം നടത്തുകയായിരുന്നു റിസോര്‍ട്ടുകാര്‍. ജനങ്ങള്‍ കൈ മെയ് മറന്ന് കുറേ വര്‍ഷക്കാലം അഹോരാത്രം പ്രവര്‍ത്തിച്ചതിന്റെ ഫലമായി മൂന്ന് വര്‍ഷം മുമ്പ് റെയില്‍വേ അധികാരികള്‍ ഇവിടെ മേല്‍പ്പാലം അനുവദിച്ചിരുന്നു.
പഞ്ചായത്ത് അഞ്ച് ലക്ഷം രൂപ സെന്റേജ് ചാര്‍ജ് കെട്ടിവെക്കണമെന്ന അറിയിപ്പും ലഭിച്ചിരുന്നു. പഞ്ചായത്ത് അത് കെട്ടി വെക്കാത്തത് കൊണ്ട് അവസരം നഷ്ടമാവുകയും രണ്ടാമത് അത് 10 ലക്ഷം രൂപയായി വര്‍ധിക്കുകയും ചെയ്തു. അതും സമയത്ത് പഞ്ചായത്ത് കെട്ടിയില്ല. വീണ്ടും നാട്ടുകാര്‍ പാലക്കാട് ഡിവിഷന്‍ ഓഫീസില്‍ നിരന്തരം ബന്ധപ്പെട്ടിരുന്നു. ഇപ്പോള്‍ ഈ തുക 13,49,000 രൂപയായി വര്‍ധിച്ചിരിക്കുകയാണ്. എന്നിട്ടും പഞ്ചായത്ത് അധികൃതര്‍ പ്രസ്തുത തുക കെട്ടിവെക്കാതെ മുടന്തന്‍ ന്യായങ്ങള്‍ പറഞ്ഞ് തങ്ങളെ കബളിപ്പിക്കുകയാണ്. ബാക്കി മുഴുവന്‍ തുകയും എം.എല്‍.എ, എം.പി ഫണ്ടുകളില്‍ നിന്നും ലഭ്യമാക്കാനുള്ള സകല നടപടികളും പൂര്‍ത്തിയായി കിടക്കുകയാണ്. ഇത് കെട്ടിവെക്കാന്‍ സമ്മര്‍ദ്ദം ചെലുത്തുന്നതിനു വേണ്ടി രണ്ടു തവണ വാര്‍ഡ് ഗ്രാമസഭ നാട്ടുകാര്‍ ബഹിഷ്കരിച്ചിരുന്നു.
ഇപ്പോള്‍ യഥാര്‍ത്ഥ വാര്‍ഡ് നിവാസികളെ അറിയിക്കാതെ, വര്‍ഗീയ പ്രചാരണം നടത്തി നാട്ടില്‍ അശാന്തി പടര്‍ത്തുന്ന രീതിയില്‍ കുറേ അനര്‍ഹരെ ഏര്‍പ്പെടുത്തി പ്രശ്‌നങ്ങള്‍ ഉണ്ടാക്കാന്‍ വേണ്ടി ഏതോ ഒരു കോണില്‍ ഗ്രാമസഭ നടത്താന്‍ തീരുമാനിച്ചിരിക്കുകയാണ് പഞ്ചായത്ത് അധികൃതര്‍.
വളരെ സാഹോദര്യത്തിലും സഹവര്‍ത്തിത്വത്തിലും കഴിയുന്ന ഈ പ്രദേശത്ത് വിദ്വേഷത്തിന് കാരണമായേക്കാവുന്ന ഈ ഗ്രാമസഭ തല്‍ക്കാലം നിര്‍ത്തിവെക്കാനും മേല്‍പ്പാലത്തിനുള്ള തുക അടിയന്തിരമായി കെട്ടിവെക്കാനും അതിനു ശേഷം മാത്രം ഗ്രാമസഭ വിളിച്ചു ചേര്‍ക്കാനും വേണ്ട നടപടികള്‍ സ്വീകരിക്കണമെന്ന് നാട്ടുകാര്‍ വാര്‍ത്താസമ്മേളനത്തില്‍ ആവശ്യപ്പെട്ടു. വാര്‍ത്താ സമ്മേളനത്തില്‍ അഷ്‌റഫ് ചാത്തങ്കൈ, സി. കണ്ണന്‍, ടി. മോഹനന്‍ നായര്‍, പി.കെ. ലക്ഷ്മി, പി.കെ. സരോജിനി എന്നിവര്‍ സംബന്ധിച്ചു.
Keywords: Chemnad, Over bridge, Gramasabha, Panchayath, Kasaragod, Railway, Press meet, Press Club.
Tags
Share this story
