Closure | അടച്ച വഴി തുറന്നില്ലെന്ന് മാത്രമല്ല, ഷീറ്റ് വെച്ച് പൂർണമായും അടച്ചു; തായലങ്ങാടി റെയിൽവേ ക്രോസിൽ വഴിമുട്ടി പ്രദേശവാസികൾ

കാസർകോട്: (KasargodVartha) തായലങ്ങാടി റെയിൽവേ ഗേറ്റ് കാൽനട യാത്രക്കാർക്കായി തുറക്കണമെന്ന ആവശ്യം ശക്തമാകുന്നതിനിടെ കൂടുതൽ ദുരിതത്തിലാക്കി വഴി പൂർണമായും അടച്ചു. നേരത്തെ ഇരുമ്പ് കുറ്റികളിട്ട് അടച്ചിരുന്ന ഈ ഗേറ്റ് ഇപ്പോൾ ഷീറ്റ് വെച്ച് പൂർണമായും അടക്കുകയായിരുന്നു. റെയിൽവേ സുരക്ഷയെന്ന പേരിൽ നടപ്പാക്കിയ ഈ നടപടി പ്രദേശവാസികളെ ഒന്നടങ്കം ബാധിച്ചിരിക്കുകയാണ്. 

ഈ വർഷം ആദ്യം ബദൽ സംവിധാനം ഒരുക്കാതെ റെയിൽവേ അധികൃതർ ഈ ക്രോസ് അടച്ചതോടെ, നൂറുകണക്കിന് വീടുകളും ക്ഷേത്രങ്ങളും പള്ളികളും സ്ഥിതി ചെയ്യുന്ന ഈ പ്രദേശത്തെ ജനങ്ങളുടെ  ദൈനംദിന ജീവിതം ദുസ്സഹമായിരിക്കുകയാണ്. വിദ്യാർഥികൾ, വൃദ്ധർ, രോഗികൾ തുടങ്ങി എല്ലാ വിഭാഗത്തിലുമുള്ള ആളുകൾക്ക് റെയിൽവേ ക്രോസ് അടച്ചത് വലിയ പ്രതിസന്ധിയാണ് സൃഷ്ടിച്ചിരിക്കുന്നത്. 

ആശുപത്രിയിലേക്കും ആരാധനാലയങ്ങളിലേക്കും സ്കൂളിലേക്കും മറ്റും പോകാൻ അര കിലോമീറ്റർ അധികം നടക്കേണ്ട അവസ്ഥയാണ്. മരണപ്പെട്ടവരെ ശ്മശാനത്തിലേക്കും ഖബർസ്ഥാനിലേക്കും കൊണ്ടുപോകാൻ വലിയ ബുദ്ധിമുട്ടുകൾ നേരിടേണ്ടി വരുന്നു. വർഷങ്ങൾക്ക് മുമ്പ് ഈ പ്രദേശത്ത് വാഹനങ്ങൾക്ക് സഞ്ചരിക്കാൻ ഗേറ്റുകൾ തുറന്നു പ്രവർത്തിച്ചിരുന്നു. എന്നാൽ പിന്നീട് ഗേറ്റ് അടച്ചിടുകയായിരുന്നു. 

അവസാനമായി നടന്നുപോകാൻ അനുവദിച്ച വഴിയും അടച്ചത് പ്രദേശവാസികളെ കടുത്ത പ്രതിസന്ധിയിലാക്കി. നേരത്തെ ഈ പ്രശ്നം ജനപ്രതിനിധികളുടെ ശ്രദ്ധയിൽപ്പെടുത്തിയിട്ടുണ്ടെങ്കിലും ഇതുവരെ ഫലപ്രദമായ ഒരു നടപടിയും ഉണ്ടായിട്ടില്ല. രാജ്മോഹൻ ഉണ്ണിത്താൻ എംപി ഉൾപ്പെടെയുള്ളവർ സന്ദർശിച്ചിട്ടും സ്ഥിതിഗതികളിൽ മാറ്റമൊന്നും വന്നിട്ടില്ല.

പ്രദേശത്തുകാർക്കും മറ്റും കാസർകോട് ടൗണിലേക്കും തളങ്കരയിലേക്കും കാൽ‌നടയായി പോകാൻ പതിവായി ഉപയോഗിച്ചിരുന്ന വഴിയാണിത്. റെയിൽവേ ക്രോസിന് മുകളിൽ നടപ്പാലം നിർമിക്കണമെന്നാണ് പ്രദേശവാസികളുടെ പ്രധാന ആവശ്യം. സുരക്ഷ ഉറപ്പാക്കേണ്ടത് റെയിൽവേയുടെ ഉത്തരവാദിത്തമാണെങ്കിലും, ജനങ്ങളുടെ ദുരിതം കണക്കിലെടുത്ത് ഒരു ബദൽ സംവിധാനം ഒരുക്കേണ്ടത് അനിവാര്യമാണെന്ന് നാട്ടുകാർ ചൂണ്ടിക്കാട്ടുന്നു.

#Thayilangadi #railwaygateclosure #Kasargod #Kerala #protest #community #transportation