റഫീഖിന്റെ മരണം: ആക്ഷന്‍ കമ്മിറ്റി പ്രക്ഷോഭത്തിലേക്ക്
Sep 6, 2012, 23:35 IST
മൃതദേഹത്തില്‍ ബ്ലേഡ് കൊണ്ട് കീറിയ മുറിവും മൃതദേഹം കിടന്ന സാഹചര്യവും റഫീഖിന്റെ ചെരുപ്പുകള്‍ കണ്ടു കിട്ടാത്തതും കൊലപാതകമാണെന്ന സംശയം ബലപ്പെടുത്തിയിരുന്നു. റഫീഖിന് ബിസിനസ്സ് സംബന്ധമായി എതിരാളികളും ശത്രുക്കളും ഉണ്ടെന്നും ഇവര്‍ റഫീഖിനെ അപായപ്പെടുത്തിയിരിക്കാമെന്നും ബന്ധുക്കള്‍ പരാതിപ്പെട്ടിരുന്നു.
ബന്ധുക്കളുടെ പരാതിയില്‍ ലോക്കല്‍ പോലീസ് കേസെടുത്തെങ്കിലും, വ്യക്തമായ അന്വേഷണം നടത്താനോ ബന്ധുക്കളും സുഹൃത്തുക്കളും സംശയമുണ്ടെന്ന് ചൂണ്ടിക്കാണിച്ച പലരേയും ചോദ്യം ചെയ്യാനോ ശ്രമിച്ചിരുന്നില്ല. കേസന്വേഷിച്ച ഉദ്യോഗസ്ഥന്‍ അന്വേഷണപുരോഗതിയറിയാന്‍ ചെന്ന ബന്ധുക്കളോട് മറ്റ് ഏജന്‍സിയെക്കൊണ്ട് അന്വേഷിപ്പിക്കാന്‍ നിര്‍ദേശിക്കുകയായിരുന്നു.
ലോക്കല്‍ പോലീസിന്റെ അന്വേഷണം തൃപ്തികരമല്ലാത്തതിനാല്‍ ഉന്നത ഏജന്‍സിയെക്കൊണ്ട് അന്വേഷിപ്പിക്കണമെന്നാവശ്യവുമായി നാട്ടുകാര്‍ ആക്ഷന്‍ കമ്മിറ്റി രൂപീകരിക്കുകയായിരുന്നു. എം.എല്‍.എമാരായ എന്‍.എ.നെല്ലിക്കുന്ന്, പി.ബി. അബ്ദുര്‍ റസാഖ് എന്നിവരുടെ നേതൃത്വത്തില്‍ ആക്ഷന്‍ കമ്മിറ്റിഭാരവാഹികള്‍ മുഖ്യമന്ത്രിയേയും, ആഭ്യന്തരമന്ത്രിയേയും മൂന്ന് മാസങ്ങള്‍ക്ക് മുമ്പ് തിരുവനന്തപുരത്ത് നേരില്‍ കണ്ട് നിവേദനം നല്‍കിയിരുന്നു. ക്രൈംബ്രാഞ്ചിലെ പ്രത്യേക സംഘത്തെക്കൊണ്ട് അന്വേഷിപ്പിക്കാമെന്ന് അന്ന് ഉറപ്പ് ലഭിച്ചിരുന്നു.
എന്നാല്‍ മൂന്ന് മാസമായിട്ടും അന്വേഷണം ആരംഭിക്കാത്തതില്‍ പ്രതിഷേധിച്ച് ശക്തമായ സമരപരിപാടികളുമായി നീങ്ങാനാണ് ആക്ഷന്‍ കമ്മിറ്റി തീരുമാനിച്ചിരിക്കുന്നത്. ഹൈകോടതിയെ സമീപിക്കാനും തീരുമാനിച്ചതായി ആക്ഷന്‍ കമ്മിറ്റി ചെയര്‍മാന്‍ ജി. നാരായണനും കണ്‍വീനര്‍ എ. ഷാഫി നെല്ലിക്കുന്നും അറിയിച്ചു.
Keywords: Committee, Death, Railway-Track, Police, Kasaragod, Mogral puthur, Case, Rafeeque
Tags
Share this story
