റവന്യൂ ജില്ലാ സ്കൂൾ കലോത്സവത്തിന് അഞ്ച് നാൾ മാത്രം: കാട് നിറഞ്ഞ സ്കൂൾ റോഡിനോട് മുഖം തിരിച്ച് പൊതുമരാമത്ത് വകുപ്പ്

മൊഗ്രാൽ: (KasargodVartha) റവന്യൂ ജില്ലാ സ്കൂൾ കലോത്സവം മൊഗ്രാൽ ഗവൺമെന്റ് വൊക്കേഷണൽ ഹയർ സെക്കൻഡറി സ്കൂളിൽ ഈ മാസം 29, 30, 31 തീയതികളിലായി നടക്കാനിരിക്കെ, കാട് നിറഞ്ഞും മണ്ണുകൾ കൂട്ടിയിട്ടും ശോചനീയാവസ്ഥയിലുള്ള സ്കൂൾ റോഡ് നന്നാക്കണമെന്ന ആവശ്യത്തിൽ മുഖം തിരിച്ച് പൊതുമരാമത്ത് വകുപ്പ് (PWD). കലോത്സവത്തിന് ഇനി അഞ്ച് ദിവസങ്ങൾ മാത്രമാണ് അവശേഷിക്കുന്നത്.

കലോത്സവ നഗരിയുടെ പ്രധാന കവാടമായ മൊഗ്രാൽ ടൗൺ മുതൽ യൂനാനി ഡിസ്പെൻസറി വരെയുള്ള സ്കൂൾ റോഡിന്റെ ഇടതുവശം കാടുകൾ നിറഞ്ഞും മണ്ണുകൾ കൂട്ടിയിട്ടും വികൃതമായി കിടക്കുകയാണ്. മാസങ്ങൾക്ക് മുമ്പ് തന്നെ സ്കൂൾ പിടിഎയും സന്നദ്ധ സംഘടനകളും ഈ വിവരം പിഡബ്ല്യുഡി അധികൃതരുടെ ശ്രദ്ധയിൽപ്പെടുത്തുകയും നിവേദനം നൽകുകയും ചെയ്തിരുന്നു. 

റോഡ് നന്നാക്കുമെന്ന് അസിസ്റ്റന്റ് എക്സിക്യൂട്ടീവ് എഞ്ചിനീയർ അന്ന് ഉറപ്പ് നൽകിയതുമാണ്. എന്നാൽ കലോത്സവത്തിന് അഞ്ച് നാൾ മാത്രം ബാക്കി നിൽക്കുമ്പോഴും അധികൃതരുടെ ഭാഗത്ത് നിന്ന് യാതൊരു നടപടിയും ഉണ്ടായിട്ടില്ല. ഇത് വലിയ പ്രതിഷേധത്തിനാണ് വഴിതെളിച്ചിരിക്കുന്നത്.

ഈ മാസം ആദ്യം നടന്ന ഓഫ് സ്റ്റേജ് മത്സരങ്ങൾക്ക് മുമ്പ് തന്നെ സ്കൂൾ റോഡ് ശുചീകരിക്കാൻ നടപടി സ്വീകരിക്കണമെന്ന് സംഘാടകർ ആവശ്യപ്പെട്ടിരുന്നതാണ്. ഇപ്പോൾ സ്കൂൾ അധികൃതരും സബ് കമ്മിറ്റി ഭാരവാഹികളും അസിസ്റ്റന്റ് എഞ്ചിനീയറെയും പിഡബ്ല്യുഡി ഓഫീസിനെയും ഫോണിൽ ബന്ധപ്പെടാൻ ശ്രമിക്കുന്നുണ്ടെങ്കിലും ആരും ഫോൺ എടുക്കുന്നില്ലെന്നാണ് പരാതി. വിവരം സംഘാടക സമിതി അംഗങ്ങൾ വകുപ്പ് മേധാവികളെ അറിയിച്ചിട്ടുണ്ട്.

കലോത്സവം എത്താറായിട്ടും അധികൃതരുടെ ഈ അനാസ്ഥ ശരിയാണോ? നിങ്ങളുടെ അഭിപ്രായം പങ്കുവെക്കൂ. ഈ വാർത്ത ഷെയർ ചെയ്ത് അധികൃതരുടെ ശ്രദ്ധയിൽപ്പെടുത്തൂ.

Article Summary: PWD faces criticism for not clearing bushes and soil on the road leading to Mogral GVHSS, the venue for the Kasaragod District School Kalolsavam starting in 5 days.

#Kasaragod #Kalolsavam2025 #PWD #Mogral #SchoolKalolsavam #RoadIssues