ഫസല്‍ ഗഫൂറിന്റെ നിലപാടിനെതിരെ പ്രതിഷേധം; എം ഇ എസ് കാസര്‍കോട് ജില്ലാ ജനറല്‍ സെക്രട്ടറിയും ട്രഷററും രാജിവെച്ചു

കാഞ്ഞങ്ങാട്: (www.kasargodvartha.com 17.07.2019) ഇസ്ലാമിക മതപരമായ വിഷയങ്ങളില്‍ പ്രമാണത്തിന്റെ പിന്‍ബലമില്ലാതെ സ്വന്തം അഭിപ്രായങ്ങളും വീക്ഷണവും അവതരിപ്പിച്ച് കൊണ്ട് എം ഇ എസ് പ്രസിഡണ്ട് ഡോ. ഫസല്‍ ഗഫൂര്‍ വിശ്വാസികള്‍ക്കിടയില്‍ തെറ്റിദ്ധാരണ പരത്തിയെന്ന കാരണം പറഞ്ഞ് എം ഇ എസ് കാസര്‍കോട് ജില്ലാ ജനറല്‍ സെക്രട്ടറി സി മുഹമ്മദ് കുഞ്ഞി, ട്രഷറര്‍ എ ഹമീദ് ഹാജി എന്നിവര്‍ തല്‍സ്ഥാനം രാജിവെച്ചു.

മതപരമായ വിഷയങ്ങള്‍ കൈകാര്യം ചെയ്യാന്‍ ഇവിടെ പണ്ഡിതന്മാരുണ്ട്. അവരാണ് ശരീഅത്ത് പോലുള്ള കാര്യങ്ങളില്‍ അഭിപ്രായം പറയാന്‍ ആധികാരികമായി അര്‍ഹതയുള്ളവര്‍. എന്നാല്‍ വിദ്യാഭ്യാസ മേഖലയില്‍ മാത്രം ശ്രദ്ധ കേന്ദ്രീകരിച്ച് കൊണ്ട് പ്രവര്‍ത്തിക്കുന്ന എം ഇ എസ് അത്തരം വിഷയങ്ങളില്‍ അഭിപ്രായം പറഞ്ഞ് വിവാദമുണ്ടാക്കുന്നത് പൊതു സമൂഹത്തില്‍ ആദരണീയരായ മത പണ്ഡിതന്മാരെക്കുറിച്ച് അവമതിപ്പുണ്ടാക്കുവാന്‍ മാത്രമെ ഉപകരിക്കുകയുളളൂവെന്നും മുഹമ്മദ് കുഞ്ഞിയും ഹമീദ് ഹാജിയും അറിയിച്ചു.