ഓടിക്കൊണ്ടിരുന്ന ബസിൽ നിന്ന് പുകയുയർന്നു; ഉളിയത്തടുക്കയിൽ യാത്രക്കാർ ഇറങ്ങിയോടി; വൻ ദുരന്തം ഒഴിവായത് തലനാരിഴയ്ക്ക്

കാസർകോട്: (KasargodVartha) ഉളിയത്തടുക്ക എസ്.പി നഗറിൽ ഓടിക്കൊണ്ടിരുന്ന സ്വകാര്യ ബസിൽ നിന്ന് പെട്ടെന്ന് പുകയുയർന്നത് യാത്രക്കാരെയും നാട്ടുകാരെയും പരിഭ്രാന്തിയിലാഴ്ത്തി. കാസർകോട് നിന്ന് സീതാംഗോളിയിലേക്ക് സർവീസ് നടത്തുന്ന കെ.എൽ 14 എ.സി 7477 നമ്പർ 'വീര ഹനുമാൻ' ബസിലാണ് ശനിയാഴ്ച ഉച്ചയ്ക്ക് 12.15-ഓടെ സംഭവം നടന്നത്. ഡ്രൈവറുടെയും കണ്ടക്ടറുടെയും സമയോചിതമായ ഇടപെടൽ മൂലം വൻ ദുരന്തം ഒഴിവായി.

യാത്രക്കാർ ഇറങ്ങിയോടി 

എസ്.പി നഗറിൽ എത്തിയപ്പോഴാണ് ബസിന്റെ എഞ്ചിൻ ഭാഗത്തുനിന്ന് ശക്തമായ പുക ഉയരുന്നത് ശ്രദ്ധയിൽപ്പെട്ടത്. ഉടൻ തന്നെ ഡ്രൈവർ ബസ് റോഡരികിലേക്ക് ഒതുക്കി നിർത്തി. ബസിനുള്ളിൽ പുക പടർന്നതോടെ പരിഭ്രാന്തരായ യാത്രക്കാർ വെപ്രാളത്തോടെ പുറത്തേക്ക് ഇറങ്ങിയോടി. സ്ത്രീകളും കുട്ടികളും ഉൾപ്പെടെയുള്ള യാത്രക്കാർ ബസിലുണ്ടായിരുന്നു. ആർക്കും പരിക്കുകളില്ലെന്ന് പോലീസ് സ്ഥിരീകരിച്ചു.

കാരണം ടർബോ ജാം 

സംഭവം നടന്ന ഉടൻ തന്നെ ബസ് ജീവനക്കാർ കാസർകോട് ഫയർ സ്റ്റേഷനിൽ വിവരമറിയിച്ചു. സീനിയർ ഫയർ ആൻഡ് റെസ്ക്യൂ ഓഫീസർ വി.എം. സതീശന്റെ നേതൃത്വത്തിലുള്ള അഗ്നിരക്ഷാസേനാ യൂണിറ്റ് അതിവേഗം സ്ഥലത്തെത്തി. വെള്ളം പമ്പ് ചെയ്ത് പുക നിയന്ത്രണവിധേയമാക്കി. ബസിന്റെ ടർബോ ജാം (Turbo) ആയതാണ് പുക ഉയരാൻ കാരണമെന്നാണ് ഫയർ ഫോഴ്സിന്റെ പ്രാഥമിക നിഗമനം. എഞ്ചിൻ ഓയിൽ ലീക്കായി ചൂടായ ഭാഗങ്ങളിൽ വീണ് പുകയുണ്ടാകുന്ന അവസ്ഥയാണിത്.

രക്ഷാപ്രവർത്തകർ 

സീനിയർ ഫയർ ഓഫീസർ വി.എം. സതീശനെ കൂടാതെ ഫയർ ആൻഡ് റെസ്ക്യൂ ഓഫീസർമാരായ പ്രജിത്, അഭിലാഷ്, ജിതിൻ കൃഷ്ണൻ, അശ്വിൻ, ഹോം ഗാർഡ് രാജു എന്നിവരും രക്ഷാപ്രവർത്തനത്തിൽ പങ്കെടുത്തു. സംഭവത്തെ തുടർന്ന് ഈ റൂട്ടിൽ അൽപ്പസമയം ഗതാഗതം തടസ്സപ്പെട്ടെങ്കിലും പിന്നീട് പുനഃസ്ഥാപിച്ചു.

Article Summary: A major tragedy was averted in Kasaragod when smoke emitted from a moving private bus due to a turbo jam. Passengers escaped unharmed.

#KasaragodNews #BusAccident #FireForce #KeralaNews #Uliyathadukka #VeeraHanumanBus