ഭക്ഷണവും വെള്ളവും ലഭിക്കാതെ വൃദ്ധ മരിച്ച സംഭവത്തില്‍ അന്വേഷണം ആരംഭിച്ചു

ബേക്കല്‍: വീട്ടിനകത്തെ അടച്ചിട്ട മുറിയില്‍ ഒരു വര്‍ഷക്കാലം ഭക്ഷണവും വെള്ളവും ലഭിക്കാതെ വൃദ്ധ ദാരുണമായി മരണപ്പെട്ട സംഭവത്തില്‍ ബേക്കല്‍ പോലീസ് കേസെടുത്ത് അന്വേഷണം തുടങ്ങി. മയിലാട്ടി സബ് സ്റ്റേഷന് സമീപത്തെ വീട്ടിലെ ഇരുട്ട് മുറിയില്‍ പട്ടിണി കിടക്കേണ്ടി വന്ന 58കാരിയായ കാര്‍­ത്ത്യായനി മരണപ്പെടാന്‍ ഇടയായ സംഭവത്തിലാണ് പോലീസ് അസ്വാഭാവിക മരണത്തിന് കേസെടുത്ത് അന്വേഷണം ആരംഭിച്ചത്.

സെപ്തംബര്‍ 17 ന് വൈകുന്നേരമാണ് കാര്‍­ത്ത്യായനി ആശുപത്രിയിലേക്കുള്ള യാത്രാമദ്ധ്യേ മരണപ്പെട്ടത്. സഹോദരന്‍ രാഘവനാണ് കാര്‍­ത്ത്യായനിയെ ഭക്ഷണവും വെള്ളവും നല്‍കാതെ വീട്ടിനകത്തെ മുറിയില്‍ പൂട്ടിയിട്ടത്. കഴിഞ്ഞ ദിവസം വൈകുന്നേരം നാട്ടുകാരെത്തിയാണ് മുറിക്കകത്ത് അവശയായി കിടക്കുകയായിരുന്ന കാര്‍­ത്ത്യായനിയെ ആശുപത്രിയിലേക്ക് കൊണ്ടുപോയത്.

ആശുപത്രിയിലെത്തുംമുമ്പ് തന്നെ വൃദ്ധ മരണപ്പെടുകയായിരുന്നു. ഇതുസംബന്ധിച്ച് സാമൂഹ്യ പ്രവര്‍ത്തകനായ മോഹനന്‍ മാങ്ങാട് ബേക്കല്‍ പോലീസില്‍ പരാതി നല്‍കിയിരുന്നു. ഇതിന്റെ അടിസ്ഥാനത്തിലാണ് പോലീസ് കേസെടുത്ത് അന്വേഷണം ആരംഭിച്ചത്. കാര്‍­ത്ത്യായനിയുടെ 15 ലക്ഷത്തിന്റെ സ്വത്ത് തട്ടിയെടുക്കാനാണ് സഹോദരന്‍ രാഘവന്‍ സ്ത്രീയെ പട്ടിണിക്കിട്ടതെന്ന് പോലീസ് സംശയിക്കുന്നു. രാഘവനെ അടുത്ത ദിവസം തന്നെ പോലീസ് ചോദ്യം ചെയ്യും. സംസ്ഥാന മനുഷ്യാവകാശ കമ്മീഷനും പരാതി നല്‍കി.