പ്രാദേശിക മാധ്യമ പ്രവർത്തകർക്കായി കേന്ദ്ര വാർത്താവിതരണ പ്രക്ഷേപണ മന്ത്രാലയത്തിന് കീഴിലുള്ള പിഐബി സംഘടിപ്പിക്കുന്ന മാധ്യമ ശില്പശാല വ്യാഴാഴ്ച കാസർകോട് നടക്കും; കലക്ടർ അർജുൻ പാണ്ഡ്യൻ ഉദ്ഘാടനം ചെയ്യും

കാസർകോട്: (KasargodVartha) പ്രാദേശിക മാധ്യമ പ്രവർത്തകർക്കായി കേന്ദ്ര വാർത്താവിതരണ പ്രക്ഷേപണ മന്ത്രാലയത്തിന് കീഴിലുള്ള കൊച്ചി പ്രസ് ഇൻഫർമേഷൻ ബ്യൂറോ (പിഐബി) സംഘടിപ്പിക്കുന്ന മാധ്യമ ശില്പശാല ജൂലൈ 23 വ്യാഴാഴ്ച കാസർകോട് നടക്കും. രാവിലെ 9:30 ന് കാസർകോട് ഹൈവേ കാസിൽ ഹോട്ടലിൽ കാസർകോട് ജില്ലാ കലക്ടർ അർജുൻ പാണ്ഡ്യൻ ഐഎഎസ് പരിപാടി ഉദ്ഘാടനം ചെയ്യും. 

പിഐബി കേരള-ലക്ഷദ്വീപ് മേഖല അഡീഷണൽ ഡയറക്ടർ ജനറൽ വി പളനിച്ചാമി ഐഐഎസ് ചടങ്ങിൽ അധ്യക്ഷത വഹിക്കും. കാസർകോട് പ്രസ് ക്ലബ് പ്രസിഡന്റ് സിജു കണ്ണൻ മുഖ്യപ്രഭാഷണം നടത്തും. പിഐബി കൊച്ചിയുടെയും കൊച്ചി ഓൾ ഇന്ത്യ റേഡിയോയുടെയും ഡയറക്ടർ ധന്യ സനൽ കെ ഐഐഎസ് ചടങ്ങിൽ പങ്കെടുക്കും. പരിപാടിയുടെ ഭാഗമായി രാജ്യം പത്മശ്രീ നൽകി ആദരിച്ച സത്യനാരായണ ബെളേരി, മുതിർന്ന മാധ്യമ പ്രവർത്തകൻ എം ഒ വർഗീസ് എന്നിവരെ ചടങ്ങിൽ ആദരിക്കും.

വിവിധ വിഷയങ്ങളിൽ ക്ലാസുകൾ

പരിപാടിയുടെ ഭാഗമായി പ്രമുഖർ വിവിധ വിഷയങ്ങളിൽ ക്ലാസുകൾ നയിക്കും. 'കത്തുകൾക്കപ്പുറം: ആഗോള വ്യാപാരത്തിലും ഗ്രാമീണ സാമ്പത്തിക വളർച്ചയിലും തപാൽ വകുപ്പിന്റെ പങ്ക്' എന്ന വിഷയത്തിലുള്ള പ്രാഥമിക സെഷനിൽ പോസ്റ്റ്മാസ്റ്റർ ജനറൽ ഓഫീസ് നോർത്തേൺ റീജിയൺ കോഴിക്കോട് അസിസ്റ്റന്റ് ഡയറക്ടർ (സ്റ്റാഫ്) കെ മനോജ് ക്ലാസ് നയിക്കും. 'കേന്ദ്ര സഹകരണ മന്ത്രാലയത്തിന്റെ ബോധവൽക്കരണ-ശേഷി വികസന സംരംഭങ്ങൾ' എന്ന വിഷയത്തിൽ കണ്ണൂർ ഇൻസ്റ്റിറ്റ്യൂട്ട് ഓഫ് കോ-ഓപ്പറേറ്റീവ് മാനേജ്മെന്റ് ഡയറക്ടർ ഡോ. എ കെ സാക്കിർ ഹുസൈൻ ആശയവിനിമയം നടത്തും. 

തുടർന്ന് 'സൈബർ അവബോധം: പുതിയ ഭീഷണികളും സുരക്ഷിതമായ രീതികളും' എന്ന വിഷയത്തിൽ കാസർകോട് സൈബർ ക്രൈം പൊലീസ് സ്റ്റേഷൻ സബ് ഇൻസ്പെക്ടർ ഷീനു കെ ബി ക്ലാസ് നയിക്കും. ശേഷം മീഡിയ പ്രൊഫഷണലും ഫാക്ട് ചെക്കറും എഐ പരിശീലകനുമായ ഹബീബ് റഹ്മാൻ വൈ പി 'എഐ-അധിഷ്ഠിത മാധ്യമ പ്രവർത്തനം: റിപ്പോർട്ടിങ്ങിനും എഴുത്തിനുമുള്ള ടൂളുകൾ' എന്ന വിഷയത്തിൽ ക്ലാസ് നയിക്കും.

കേന്ദ്ര പദ്ധതികളെക്കുറിച്ചുള്ള വിശദീകരണം

പിഐബി കൊച്ചി അസിസ്റ്റന്റ് ഡയറക്ടർ ലക്ഷ്മിപ്രിയ എസ് എസ് ഐഐഎസ്, കേന്ദ്ര വാർത്താവിതരണ പ്രക്ഷേപണ മന്ത്രാലയത്തിന് കീഴിലുള്ള വിവിധ മാധ്യമ യൂണിറ്റുകളുടെ പ്രവർത്തനങ്ങളെ കുറിച്ച് വിശദീകരിക്കും. കാസർകോട് ജില്ലയിൽ കേന്ദ്ര വാർത്ത വിതരണ പ്രക്ഷേപണ മന്ത്രാലയത്തിന് കീഴിലുള്ള വിവിധ മാധ്യമ യൂണിറ്റുകളിലെ പ്രതിനിധികളും ചടങ്ങിനെ അഭിസംബോധന ചെയ്യും. 

കേന്ദ്ര ഗവൺമെന്റിന്റെ വിവിധ പദ്ധതികളെക്കുറിച്ച് പ്രാദേശിക പത്രപ്രവർത്തകർക്ക് അറിവ് പകരുക എന്ന ലക്ഷ്യത്തോടെയാണ് പിഐബി വിവിധ ജില്ലകളിൽ ഇത്തരം ശില്പശാലകൾ സംഘടിപ്പിക്കുന്നത്. കാസർകോട് പ്രസ് ക്ലബ്ബുമായി ചേർന്ന് സംഘടിപ്പിക്കുന്ന ശില്പശാലയിൽ പ്രസ് ക്ലബ് സെക്രട്ടറി പ്രദീപ് നാരായണൻ, കൊച്ചി പിഐബിയിലെ മീഡിയ ആൻഡ് കമ്മ്യൂണിക്കേഷൻ ഓഫീസർ ഷാമില കെ വൈ എന്നിവരും സംസാരിക്കും.

ഈ വാർത്ത നിങ്ങളുടെ സുഹൃത്തുക്കൾക്കും വാട്സ്ആപ്പ് ഗ്രൂപ്പുകളിലും പങ്കുവെക്കുക. പുതിയ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: PIB Kochi is organizing a media workshop for local journalists in Kasaragod on July 23.

#PIBWorkshop #KasaragodNews #MediaWorkshop #AIJournalism #CyberAwareness #LocalJournalists #KeralaNews #CentralGovtSchemes #AparnaNews