ഓർമ്മയാവുന്നു കടൽഭിത്തി; ശാസ്ത്രീയമല്ലാത്ത നിർമ്മാണത്തിൽ കോടികൾ കടലിൽ! പെർവാഡ് തീരം ഒറ്റപ്പെടുന്നു

കുമ്പള: (KasargodVartha) കനത്ത കാലവർഷത്തിൽ കുമ്പളയിലെ പെർവാഡ് കടപ്പുറത്ത് കടലാക്രമണം അതിരൂക്ഷമായി. തീരസംരക്ഷണത്തിനായി സ്ഥാപിച്ചിരുന്ന അവശേഷിച്ച 100 മീറ്റർ കടൽഭിത്തിയും ശക്തമായ തിരമാലകളിൽ ഒലിച്ചുപോയതോടെ, തീരദേശം പൂർണ്ണമായും ഒറ്റപ്പെട്ട അവസ്ഥയിലാണ്. പതിറ്റാണ്ടുകളായിട്ടും ശാസ്ത്രീയമായ തീരസംരക്ഷണ പദ്ധതികൾ നടപ്പാക്കാത്തത് ഈ മേഖലയിലെ ജനങ്ങളെ ദുരിതത്തിലാഴ്ത്തുന്നു.

കഴിഞ്ഞ രണ്ട് പതിറ്റാണ്ടിനിടെ കുമ്പളയിലെ തീരമേഖലയിൽ നിർമ്മിച്ച ചെറിയ കരിങ്കൽ ഭിത്തികൾക്കൊന്നും കാര്യമായ ആയുസ്സുണ്ടായിട്ടില്ല. അശാസ്ത്രീയമായ നിർമ്മാണം കാരണം കോടികളാണ് ഓരോ വർഷവും പാഴാക്കുന്നത്. 

ഞായറാഴ്ച പെർവാഡ് കടപ്പുറത്ത് അവശേഷിച്ചിരുന്ന ഏക ആശ്രയമായിരുന്ന കടൽഭിത്തിയും കടലെടുത്തതോടെ, കടൽക്ഷോഭം നേരിടാൻ ഒരു സംവിധാനവുമില്ലാതെ തീരം നിസ്സഹായമായി നിൽക്കുകയാണ്.

പെർവാഡിന് പുറമെ നാങ്കി കടപ്പുറം, ഗാന്ധിനഗർ എന്നിവിടങ്ങളിലും അതിരൂക്ഷമായ കടൽക്ഷോഭമാണ് അനുഭവപ്പെടുന്നത്. കഴിഞ്ഞ വർഷം ഈ പ്രദേശങ്ങളിലെ സ്വകാര്യ റിസോർട്ടുകൾ ഭാഗികമായി കടലെടുത്തിരുന്നു.

നിലവിൽ, ടെട്രാപോഡ് ഉപയോഗിച്ചുള്ള ശാസ്ത്രീയമായ കടൽഭിത്തി നിർമ്മാണമാണ് പ്രദേശവാസികൾ ആവശ്യപ്പെടുന്നത്. ഈ പദ്ധതിക്കായി കുമ്പള തീരദേശം ഉൾപ്പെടെ ജില്ലയിലെ വിവിധ സ്ഥലങ്ങളിലേക്ക് ചെറുകിട ജലസേചന വകുപ്പ് സർക്കാരിന് ശുപാർശ സമർപ്പിച്ചിട്ടുണ്ടെങ്കിലും, അതിലുണ്ടാകുന്ന കാലതാമസം തീരദേശവാസികളിൽ കടുത്ത ആശങ്കയാണ് സൃഷ്ടിക്കുന്നത്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക 

Article Summary (English): Perwad coast in Kumbala is isolated after its last seawall collapsed due to severe sea erosion, caused by decades of unscientific construction.

#Perwad #Kumbala #SeaErosion #CoastalErosion #KeralaFloods #UnscientificConstruction