ഏഴാമത് സയ്യിദ് ത്വഹിറുൽ അഹ്‌ദൽ പുരസ്‌കാരം പള്ളങ്കോട് അബ്ദുൽ ഖാദിർ മദനിക്ക്; കാന്തപുരം സമ്മാനിക്കും

കാസർകോട്: (KasarodVartha) മാലിക് ദീനാർ കൾച്ചറൽ ഫോറം ഏർപ്പെടുത്തിയ ഏഴാമത് സയ്യിദ് ത്വഹിറുൽ അഹ്‌ദൽ അവാർഡിന് കേരള മുസ്ലിം ജമാഅത്ത് കാസർകോട് ജില്ലാ ജനറൽ സെക്രട്ടറിയും സുന്നി പ്രസ്ഥാനത്തിന്റെ സമുന്നത സാരഥിയുമായ പള്ളങ്കോട് അബ്ദുൽ ഖാദിർ മദനിയെ തിരഞ്ഞെടുത്തു. പ്രശസ്തി പത്രവും അവാർഡ് തുകയും അടങ്ങുന്ന പുരസ്‌കാരം ഈ മാസം അവസാനം മുഹിമ്മാത്തിൽ വെച്ച് സമ്മാനിക്കുമെന്ന് ബന്ധപ്പെട്ടവർ വാർത്താ സമ്മേളനത്തിൽ അറിയിച്ചു.

മുഹിമ്മാത്തിൽ നടക്കുന്ന ത്വാഹിർ തങ്ങൾ ഇരുപതാമത് ഉറൂസ് മുബാറക്ക് വേദിയിൽ വെച്ച് ഇന്ത്യൻ ഗ്രാൻഡ് മുഫ്തി കാന്തപുരം എ പി അബൂബക്കർ മുസ്ലിയാരാണ് അവാർഡ് ദാനം നിർവഹിക്കുക. വിവിധ രാജ്യങ്ങളിൽ ജോലി ചെയ്യുന്ന കാസർകോട് ജില്ലക്കാരുടെ കൂട്ടായ്‌മയാണ് മാലിക് ദീനാർ കൾച്ചറൽ ഫോറം. സയ്യിദ് ത്വാഹിറുൽ അഹ്‌ദൽ തങ്ങളുടെ സ്മരണാർത്ഥം കഴിഞ്ഞ ആറ് വർഷമായി മത, വിദ്യാഭ്യാസ, സാംസ്‌കാരിക മേഖലയിൽ ശ്രദ്ധേയമായ പ്രവർത്തനങ്ങൾ കാഴ്ചവെക്കുന്നവർക്ക് ഫോറം അവാർഡ് നൽകി വരുന്നുണ്ട്.

കർമ്മപഥത്തിലെ മികവ്

1986 മുതൽ എസ് എസ് എഫ്, എസ് വൈ എസ് സംഘടനകളുടെ യൂണിറ്റ് തലം മുതൽ സംസ്ഥാന ഘടകം വരെ വിവിധ ഭാരവാഹിത്വങ്ങൾ വഹിച്ച പള്ളങ്കോട് അബ്ദുൽ ഖാദിർ മദനി ജില്ലയിലെ സുന്നി പ്രസ്ഥാനത്തിന്റെ മുഖമായാണ് അറിയപ്പെടുന്നത്. നിലവിൽ കേരള മുസ്ലിം ജമാഅത്ത് ജില്ലാ ജനറൽ സെക്രട്ടറി, സഅദിയ്യ ക്യാബിനറ്റ് അംഗം, മുഹിമ്മാത്ത് ഉപാധ്യക്ഷൻ, മദനീസ് അസോസിയേഷൻ ഭാരവാഹി എന്നീ നിലകളിൽ പ്രവർത്തിക്കുന്നു.

മുഹിമ്മാത്തിന്റെ തുടക്കം മുതൽ ത്വാഹിർ തങ്ങൾക്കൊപ്പം പ്രവർത്തിച്ചിട്ടുള്ള അദ്ദേഹം ജില്ലയിലെ സയ്യിദുമാരുമായും പണ്ഡിതരുമായും അടുത്ത ബന്ധം പുലർത്തുന്നുണ്ട്. കൂടാതെ രാഷ്ട്രീയ, സാംസ്‌കാരിക രംഗത്തുള്ളവരുമായും അദ്ദേഹം നല്ലൊരു സൗഹൃദം സൂക്ഷിക്കുന്നു.

മുൻ ജേതാക്കളും പ്രവർത്തനങ്ങളും

വൈ.എം അബ്ദുൽ റഹ്മാൻ അഹ്‌സനി, എം അന്തുഞ്ഞി മൊഗർ, ബി എസ് അബ്ദുല്ലകുഞ്ഞി ഫൈസി, സി.എൻ അബ്ദുൽ ഖാദിർ മാസ്റ്റർ, ഹാജി അമീറലി ചൂരി, സി അബ്ദുല്ല ഹാജി ചിത്താരി, ഇത്തിഹാദ് മുഹമ്മദ് ഹാജി എന്നിവർക്കാണ് മുൻ വർഷങ്ങളിൽ ഈ അവാർഡ് ലഭിച്ചത്. ഇതിനു പുറമെ മദ്രസാധ്യാപക മേഖലകളിലെ പ്രമുഖരെ ആദരിക്കുന്നതിന് 'നൂറുൽ ഉലമാ' അവാർഡും, വിവിധ ജീവകാരുണ്യ പ്രവർത്തനങ്ങളും മാലിക് ദീനാർ കൾച്ചറൽ ഫോറം ഏറ്റെടുത്ത് നടത്തിവരുന്നു.

വാർത്താസമ്മേളനത്തിൽ മാലിക് ദീനാർ കൾച്ചറൽ ഫോറം ചെയർമാൻ അബ്ദുൽ ലത്തീഫ് സഅദി ഉറുമി, എസ് വൈ എസ് ജില്ലാ ജനറൽ സെക്രട്ടറി ബയാർ സിദ്ദീഖ് സഖാഫി, കൺവീനർ ബഷീർ കുമ്പോൽ, എം സാദിഖ് ഉറുമി എന്നിവർ സംബന്ധിച്ചു.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യു

Article Summary: Pallangod Abdul Khader Madani, General Secretary of Kerala Muslim Jamath Kasaragod District, has been selected for the 7th Sayyid Thahirul Ahdal Award instituted by the Malik Deenar Cultural Forum.

#Kasaragod #Award #PallangodMadani #Kanthapuram #Muhimmath #MalikDeenarForum #SunniNews