പ്രതികൂല കാലാവസ്ഥ: പാദൂർ ട്രോഫി ഫുട്ബോൾ മത്സരങ്ങൾക്ക് താൽക്കാലിക വിരാമം

കാസർകോട്: (KasargodVartha) ചന്ദ്രഗിരി ഗവൺമെൻ്റ് ഹയർ സെക്കൻഡറി സ്കൂൾ ഗ്രൗണ്ടിൽ ‘വെൽഫിറ്റ് ഇൻ്റർനാഷണൽ’ സ്റ്റേഡിയത്തിൽ ചന്ദ്രഗിരി മേൽപ്പറമ്പും തമ്പ് മേൽപ്പറമ്പും സംയുക്തമായി സംഘടിപ്പിക്കുന്ന എസ്.എഫ്.എ. അഖിലേന്ത്യാ സൂപ്പർ സെവൻസ് ഫുട്ബോൾ ടൂർണമെൻ്റായ പ്രഥമ ‘പാദൂർ ട്രോഫി’ മത്സരങ്ങൾ പ്രതികൂല കാലാവസ്ഥയെ തുടർന്ന് താൽക്കാലികമായി നിർത്തിവച്ചതായി സംഘാടകർ വാർത്താ സമ്മേളനത്തിൽ അറിയിച്ചു. 

കനത്ത മഴയെത്തുടർന്ന് ജില്ലയിൽ തുടർച്ചയായി റെഡ് അലേർട്ട് പ്രഖ്യാപിച്ചിരിക്കുന്ന സാഹചര്യത്തിലും പൊതുജനങ്ങളുടെയും കളിക്കാരുടെയും സുരക്ഷ പരിഗണിച്ചും മേൽപറമ്പ് പോലീസിൻ്റെ നിർദേശാനുസരണവുമാണ് ടൂർണമെൻ്റ് താൽക്കാലികമായി നിർത്തിവയ്ക്കാൻ തീരുമാനിച്ചത്. 

കാലാവസ്ഥ അനുകൂലമാകുന്ന പക്ഷം പാദൂർ ട്രോഫി ഫുട്ബോൾ മത്സരങ്ങൾ പുനരാരംഭിക്കുമെന്ന് ടൂർണമെൻ്റ് ചെയർമാൻ ജലീൽ കോയ, ജനറൽ കൺവീനർ അഫ്‌സൽ സീസ്ലു, ട്രഷറർ യൂസഫ് മേൽപറമ്പ്, തമ്പ് ജനറൽ സെക്രട്ടറി പുരുഷു ചെമ്പിരിക്ക എന്നിവർ വാർത്താസമ്മേളനത്തിൽ അറിയിച്ചു.

ടൂർണമെൻ്റിൽ ഇനി ശേഷിക്കുന്നത് രണ്ട് ക്വാർട്ടർ ഫൈനൽ മത്സരങ്ങളും സെമി ഫൈനലുകളും ഫൈനൽ മത്സരവുമാണ്. ടൂർണമെൻ്റുമായി ബന്ധപ്പെട്ട പുതിയ അറിയിപ്പുകൾ ഉടൻതന്നെ ലഭ്യമാക്കുമെന്നും സീസൺ ടിക്കറ്റ് കൈവശമുള്ളവർക്ക് ടൂർണമെൻ്റ് പുനരാരംഭിക്കുമ്പോൾ അവ ഉപയോഗിക്കാമെന്നും സംഘാടകർ അറിയിച്ചു.

കാസർകോട്ടെ പാദൂർ ട്രോഫി ഫുട്ബോൾ മത്സരങ്ങളെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Summary: Padoor Trophy football matches in Kasaragod have been temporarily suspended due to adverse weather conditions and a red alert, prioritizing safety.

#PadoorTrophy #FootballKerala #Kasaragod #WeatherAlert #SuperSevens #KeralaFootball