Achievement | ശാരീരിക വെല്ലുവിളി അവഗണിച്ച് 3000 പുസ്തകങ്ങൾ വായിച്ച് ആസ്വാദന കുറിപ്പ് തയ്യാറാക്കി; 2 പുസ്തക സമാഹാരങ്ങളും പുറത്തിറക്കി; സതി കൊടക്കാടിന് 'സ്ത്രീശക്തി' പുരസ്കാരം

കാസർകോട്: (KasargodVartha) ശാരീരിക വെല്ലുവിളികളെ അവഗണിച്ച് 3000 പുസ്തകങ്ങൾ വായിച്ച് ആസ്വാദന കുറിപ്പ് തയ്യാറാക്കുകയും, രണ്ട് പുസ്തക സമാഹാരങ്ങൾ പുറത്തിറക്കുകയും ചെയ്ത സതി കൊടക്കാടിന് സംസ്ഥാന വനിതാ കമ്മീഷൻ്റെ സ്ത്രീശക്തി പുരസ്കാരം. മാർച്ച് ഒന്നിന് തിരുവനന്തപുരത്ത് വച്ച് മന്ത്രി വീണാ ജോർജ് പുരസ്കാരം സമ്മാനിക്കും.

സ്പൈനൽ മസ്കുലാർ അട്രോഫി ടൈപ് 2 രോഗം ബാധിതയാണ് കൊടക്കാട് പൊള്ളപ്പൊയിൽ സ്വദേശിനിയായ എം വി സതിക്ക്. ഈ രോഗം കാരണം പേന പോലും ശരിക്ക് പിടിക്കാൻ സാധിക്കാത്ത അവസ്ഥയിലാണ് സതി. എന്നാൽ തന്റെ ശാരീരിക പരിമിതികളെ മറികടന്ന് സതി രണ്ട് പുസ്തകങ്ങൾ എഴുതിയിട്ടുണ്ട്. 'ഗുളിക വരച്ച ചിത്രങ്ങൾ' എന്ന കഥാസമാഹാരവും 'കാൽവരയിലെ മാലാഖ' എന്ന കവിതാസമാഹാരവുമാണ് അവ.

ജന്മനാ രോഗം തളർത്തിയ സതിക്ക് നടക്കാനോ കൈകൾ ശരിയായി ഉപയോഗിക്കാനോ കഴിയില്ല. നാലാം ക്ലാസിനു ശേഷം സ്കൂൾ പഠനം അവസാനിപ്പിക്കേണ്ടിവന്നു. തുടർന്ന് സാമൂഹിക പ്രവർത്തകനും അധ്യാപകനുമായിരുന്ന അച്ഛൻ സിവിക് കൊടക്കാടാണ് സതിയെ പുസ്തകങ്ങളുമായി അടുപ്പിച്ചത്. അദ്ദേഹം സ്ഥാപക സെക്രട്ടറിയായ ബാലകൈരളി വായനശാലയിൽനിന്ന് സതിക്ക് പുസ്തകങ്ങൾ നൽകി. അങ്ങനെ വായന ഒരു ശീലമായി മാറി.

മുറിയുടെ നാലു ചുവരിനുള്ളിൽ ഒതുങ്ങേണ്ടി വന്ന സതിയുടെ ഭാവനാലോകം വായനയിലൂടെ വികസിച്ചു. സതി തന്റെ അച്ഛനെ പോലും അത്ഭുതപ്പെടുത്തിക്കൊണ്ട് വായനശാലയിലെ മൂവായിരത്തോളം പുസ്തകങ്ങൾ വായിച്ചു. മാത്രമല്ല, അവക്കെല്ലാം ആസ്വാദനക്കുറിപ്പ് തയ്യാറാക്കുകയും ചെയ്തു.

സതിയുടെ എഴുത്തിനോടുള്ള ആവേശം കണ്ടറിഞ്ഞ അച്ഛൻ കഥകൾ എഴുതാൻ പ്രോത്സാഹിപ്പിച്ചു. അങ്ങനെയാണ് സതി കഥാരചനയിലേക്ക് കടന്നത്. 2008ൽ പരിഷ്കരിച്ച മലയാളം, കന്നഡ മൂന്നാം ക്ലാസിലെ പാഠപുസ്തകത്തിൽ 'വായിച്ചു വായിച്ചു വേദന മറന്നു' എന്ന സതിയുടെ അനുഭവക്കുറിപ്പ് കുട്ടികൾക്ക് പഠിക്കാൻ ഉൾപ്പെടുത്തിയിരുന്നു.

ഗാനരചനയിലും സതി തന്റെ കഴിവ് തെളിയിച്ചിട്ടുണ്ട്. കരിവെള്ളൂർ ആദി മുച്ചിലോട്ടുകാവിലെ പെരുങ്കളിയാട്ടത്തോടനുബന്ധിച്ച് പുറത്തിറക്കിയ 'തിരുമംഗല്യം' എന്ന സിഡിയിൽ സതി എഴുതിയ ഗാനം ഉൾപ്പെടുത്തിയിരുന്നു. ഈ ഗാനം കെ.എസ്. ചിത്ര ആലപിച്ചത് സതി നിറകണ്ണുകളോടെയാണ് കേട്ടത്. 'വയലോരം', 'കുഞ്ഞോളം' എന്നീ വിഡിയോ ആൽബങ്ങൾക്കായും സതി പാട്ടുകൾ രചിച്ചിട്ടുണ്ട്.

സതിയുടെ ഈ നേട്ടങ്ങൾക്കുള്ള അംഗീകാരമായി നിരവധി പുരസ്കാരങ്ങൾ ലഭിച്ചിട്ടുണ്ട്. കേന്ദ്രസർക്കാരിന്റെ ദേശീയ സർഗ പ്രതിഭാ പുരസ്കാരം രാഷ്ട്രപതിയിൽ നിന്ന് ഏറ്റുവാങ്ങിയിട്ടുണ്ട്. 2021ൽ സംസ്ഥാന ഭിന്നശേഷി കമ്മീഷണറേറ്റിന്റെ പുരസ്കാരവും സതിക്ക് ലഭിച്ചു. ഇപ്പോഴിതാ സംസ്ഥാന വനിതാ കമ്മീഷൻ്റെ സ്ത്രീശക്തി പുരസ്കാരവും സതിയെ തേടിയെത്തിയിരിക്കുകയാണ്.

ഈ വാർത്ത പങ്കുവെക്കുകയും അഭിപ്രായങ്ങൾ രേഖപ്പെടുത്തുകയും ചെയ്യുക

Sathi Kodakkad, despite physical challenges, has read over 3000 books and written two collections, earning the 'Sree Shakti' award from the Kerala Women's Commission.

#WomenEmpowerment #KasaragodNews #SathiKodakkad #BookLover #InspirationalStory #WomenPower