എന്‍ഡോസള്‍ഫാന്‍ പീഡിതമുന്നണിക്കാരെ മുഖ്യമന്ത്രിയും മന്ത്രിമാരും തിരിഞ്ഞുനോക്കിയില്ല
Jul 21, 2012, 13:15 IST
എന്‍ഡോസള്‍ഫാന്‍ രോഗികളുടെ പുനരധിവാസം കാര്യക്ഷമമാക്കണമെന്നാവശ്യപ്പെട്ടാണ് എന്‍ഡോസള്‍ഫാന്‍ പീഡിതമുന്നണി ദിവസങ്ങളായി കലക്ട്രേറ്റിനു മുന്നില്‍ നിരാഹാരസമരത്തിലേര്‍പ്പെട്ടിരിക്കുന്നത്. മുഖ്യമന്ത്രിയും മന്ത്രിമാരും തങ്ങളുടെ സമരപന്തല്‍ സന്ദര്‍ശിച്ച് സമരം അവസാനിപ്പിക്കുന്നതിനുള്ള അഭ്യര്‍ത്ഥന നടത്തുമെന്നാണ് ഇവര്‍ പ്രതീക്ഷിച്ചത്. എന്നാല്‍ സ്റ്റേറ്റ് കാറില്‍ ചീറി പാഞ്ഞ മുഖ്യമന്ത്രിയും മന്ത്രിമാരായ എം.കെ മുനീറും, കെ. പി മോഹനനും സമരക്കാരെ അവഗണിച്ചാണ് കടന്നുപോയത്. മുഖ്യമന്ത്രിയും മന്ത്രിമാരും എത്തുന്ന വിവരമറിഞ്ഞ് കറുത്ത തുണി കൊണ്ട് വായ മൂടിക്കെട്ടിയാണ് സമരക്കാര്‍ നിരാഹത്തിലേര്‍പ്പെട്ടത്.
സ്ത്രീകളും കുട്ടികളടക്കമുള്ളവര്‍ ദിവസങ്ങളായി അധികാരികളില്‍ നിന്ന് നീതി പ്രതീക്ഷിച്ച് കഴിയുകയായിരുന്നു. നേരത്തേ സമരക്കാരുടെ ആവശ്യങ്ങള്‍ ചര്‍ച്ച ചെയ്യാന്‍ നേതാക്കളെ തിരുവന്തപുരത്തേക്ക് വിളിപ്പിച്ചിരുന്നുവെങ്കിലും പെട്ടെന്ന് പോകാന്‍ ആവശ്യപ്പെട്ടതിനാല്‍ തിരുവനന്തപുരത്തെത്താന്‍ ഇവര്‍ക്ക് കഴിഞ്ഞിരുന്നില്ല. പിന്നീട് കലക്ട്രറെ സമരക്കാരുമായി ചര്‍ച്ച ചെയ്യാന്‍ നിയോഗിച്ചിരുന്നുവെങ്കിലും ഇനിയും ചര്‍ച്ച നടന്നിട്ടില്ല. മുഖ്യമന്ത്രിയുടെ പരിപാടിക്ക് തൊട്ടടുത്താണ് പീഡിതമുന്നണി പ്രവര്‍ത്തകര്‍ നിരാഹാരമിരിക്കുന്നത്.
Keywords: Kasaragod, Endosulfan-victim, Strike, Oommen Chandy
Tags
Share this story
