കാസര്‍കോട് നഗരസഭാ ബജറ്റില്‍ ഒരുകോടി രൂപയുടെ മാലിന്യ സംസ്‌കരണ പദ്ധതി

കാസര്‍കോട്: ഉല്‍പ്പാദന മേഖലയ്ക്ക് പ്രധാന്യം നല്‍കികൊണ്ടുള്ള കാസര്‍കോട് നഗരസഭയുടെ 2012-13 വര്‍ഷത്തെ ബജറ്റ് വൈസ് ചെയര്‍പേഴ്‌സണ്‍ താഹിറ സത്താര്‍ അവതരിപ്പിച്ചു. നഗരസഭയിലെ മാലിന്യ പ്രശ്‌നത്തിന് ശാശ്വത പരിഹാരം കാണുന്നതിന് ഒരുകോടി രൂപ ചിലവില്‍ ബയോഗ്യസ്, വെര്‍മി, വിന്‍സ്രോ കംപോസ്റ്റ് പദ്ധതി നടപ്പിലാക്കുമെന്ന് ബജറ്റില്‍ എടുത്തു പറയുന്നു. കൂടാതെ വീടുകള്‍ കേന്ദീകരിച്ച് മാലിന്യ സംസ്‌കരണത്തിനായി പൈപ്പ് കംപോസ്റ്റ്, പോര്‍ട്ടബിള്‍ ബയോഗ്യാസ്, കിച്ചണ്‍ വേസ്റ്റ് കമ്പോസ്റ്റ് യൂണിറ്റ് സംവിധാനവും നടപ്പിലാക്കും.
മുനിസിപ്പില്‍ വ്യവസായ കേന്ദ്രത്തില്‍ പ്ലാസ്റ്റിക്ക് ഷ്രെഡിംഗ് യൂണിറ്റ് സ്ഥാപിക്കും. സമഗ്ര ഓവുചാല്‍ പദ്ധതിക്കായി 85ലക്ഷം രൂപയും, ബദ്രിക്കള സീഡ് ഫാം ഓവുച്ചാല്‍ പുനരുദ്ധാരണത്തിന് 40ലക്ഷം രൂപയുമടക്കം വിവിധ ഓവുചാലുകളുടെയും, റോഡുകളുടെയും വികസനത്തിന് 1.15കോടി രൂപയുടെയും, മൊത്തം 9.58 കോടി രൂപയുടെയും പദ്ധതി ആസൂത്രണം ചെയ്തിട്ടുണ്ടെന്നും ബജറ്റ് വ്യക്തമാക്കുന്നു.
നഗരപ്രദേശത്ത് സമഗ്ര ആരോഗ്യ പദ്ധതി നടപ്പിലാക്കും. നഗരസഭാ ആയൂര്‍വ്വേദ ആശുപത്രിയുടെ സൗകര്യങ്ങള്‍ വര്‍ദ്ധിപ്പിക്കുന്നതിനും താലൂക്ക് ആശുപത്രിയായി ഉയര്‍ത്തുന്നതിനും നടപടി സ്വീകരിക്കും. തളങ്കര ഹോമിയോ ആശുപത്രി മെച്ചപ്പെടുത്തുകയും മരുന്നുകള്‍ ലഭ്യമാക്കുകയും ചെയ്യും. തളങ്കര പടിഞ്ഞാര്‍, നെല്ലിക്കുന്ന് കടപ്പുറം, കേളുഗുഡ്ഡെ, ചാല തുടങ്ങിയ സ്ഥലങ്ങളില്‍ പ്രൈമറി ഹെല്‍ത്ത് സെന്ററുകള്‍ സ്ഥാപിക്കും. ബിപിഎല്‍, എപിഎല്‍ വ്യത്യാസമില്ലാതെ വയോജനമിത്രം പദ്ധതി നടപ്പാക്കും.
സാന്ത്വനചികിത്സാ പദ്ധതി ഈ വര്‍ഷം തന്നെ ആരംഭിക്കും. കുടിവെള്ള പദ്ധതിക്ക് 25ലക്ഷം രൂപ വകയിരുത്തി. വാര്‍ഡ്തല വികസനത്തിനായി 95 ലക്ഷം രൂപ അനുവദിച്ചു. നഗരത്തിലെ ജംഗ്ഷനുകളുടെ വികസനം നടപ്പിലാക്കുമെന്നും ബജറ്റ് വ്യക്തമാക്കുന്നു. ബസ്സ്റ്റാന്‍ഡ് ഷോപ്പിംഗ് കോപ്ലക്‌സും മൂത്രപ്പുരയും ആധുനിക രീതിയില്‍ നവീകരിക്കും. നഗരസഭാ ഓഫീസിനോട് ചേര്‍ന്നുള്ള വനിതാ ഭവന്‍ കെട്ടിടത്തില്‍ ആധുനിക രീതിയിലുള്ള കോണ്‍ഫറന്‍സ് ഹാള്‍ നിര്‍മ്മിക്കും. വിദ്യാനഗര്‍ മുനിസിപ്പല്‍ സ്റ്റേഡിയത്തോടനുബന്ധിച്ച് പുതിയ പാര്‍ക്കുകള്‍ നിര്‍മ്മിക്കുന്നതിനും മറ്റ് പാര്‍ക്കുകള്‍ നവീകരിക്കുന്നതിനും ബീച്ച് സൗന്ദര്യവത്കരണത്തിനും നടപടി സ്വീകരിക്കും.