നാഥനില്ലാതെ ഉബൈദ് സ്മാരക ലൈബ്രറി; വൈദ്യുതി വിച്ഛേദിച്ചിട്ട് ഒന്നര മാസം, കെട്ടിടം ഇടിഞ്ഞുപൊളിഞ്ഞുവീഴാറായിട്ടും തിരിഞ്ഞുനോക്കാതെ നഗരസഭ

കാസര്‍കോട്: (www.kasargodvartha.com 26.02.2019) പ്രശസ്ത കവി ടി ഉബൈദിന്റെ സ്മരണാര്‍ത്ഥം നിര്‍മിക്കപ്പെട്ട തെരുവത്ത് ഉബൈദ് സ്മാരക ലൈബ്രറിയോട് നഗരസഭയ്ക്ക് അയിത്തം. ഇവിടുത്തെ വൈദ്യുതിബന്ധം വിച്ഛേദിച്ച് ഒന്നര മാസം കഴിഞ്ഞിട്ടും വൈദ്യുതി ബന്ധം പുന:സ്ഥാപിക്കാനുള്ള യാതൊരു നടപടിയും നഗരസഭ സ്വീകരിച്ചിട്ടില്ല. ഇടിഞ്ഞുപൊളിഞ്ഞുവീഴാറായ കെട്ടിടമാണ് ഇവിടെ ഇപ്പോഴുള്ളത്. ഇത് നന്നാക്കാനോപുതുക്കിപ്പണിയാനോ നഗരസഭ നടപടി സ്വീകരിക്കുന്നില്ല. ഇത് കാസര്‍കോടിന്റെ സ്വന്തം കവിയോട് കാട്ടുന്ന അവഗണനയാണെന്നാണ് നാട്ടുകാര്‍ കുറ്റപ്പെടുത്തുന്നത്.

പണമടക്കാത്തതിനാലാണ് ഒന്നര മാസം മുമ്പ് കെ എസ് ഇ ബി അധികൃതര്‍ വൈദ്യുതി ബന്ധം വിച്ഛേദിച്ചത്. ബില്ല് തങ്ങള്‍ക്ക് ലഭിക്കാത്തതു കൊണ്ടാണ് പണമടക്കാതിരുന്നതെന്നാണ് നഗരസഭ അധികൃതര്‍ നല്‍കുന്ന വിശദീകരണം. ഒന്നിനും നാഥനില്ലാത്ത അവസ്ഥയാണ് ലൈബ്രറിക്കുള്ളത്. എത്രയും പെട്ടെന്ന് ലൈബ്രറിയുടെ വൈദ്യുതി ബന്ധം പുന:സ്ഥാപിക്കണമെന്നും ശോചനിയാവസ്ഥ പരിഹരിക്കണമെന്നുമാണ് പ്രദേശവാസികളും കവിയെ സ്‌നേഹിക്കുന്നവരും ആവശ്യപ്പെടുന്നത്.