ഓണം സ്പെഷ്യൽ വണ്ടിക്ക് നീലേശ്വരത്ത് സ്റ്റോപ്പില്ല; പ്രതിഷേധം ശക്തമാകുന്നു

നീലേശ്വരം: (KasargodVartha) മണ്ഡലത്തിലെ പ്രധാന റെയിൽവേ സ്റ്റേഷനായ നീലേശ്വരത്ത് സ്വാതന്ത്ര്യദിന വണ്ടിക്ക് പുറമെ ഓണം സ്പെഷ്യൽ വണ്ടിക്കും സ്റ്റോപ്പ് അനുവദിക്കാത്തതിൽ ശക്തമായ പ്രതിഷേധം. വരുമാനത്തിൽ മുന്നിൽ നിൽക്കുന്ന നീലേശ്വരം സ്റ്റേഷനോട് റെയിൽവേ അവഗണന കാണിക്കുകയാണെന്ന് യാത്രക്കാർ ആരോപിക്കുന്നു. വാഹന സൗകര്യമില്ലാത്ത ചെറിയ സ്റ്റേഷനുകളിൽ പോലും സ്പെഷ്യൽ വണ്ടികൾക്ക് സ്റ്റോപ്പ് അനുവദിക്കുമ്പോൾ നീലേശ്വരം സ്റ്റേഷനെ അവഗണിക്കുന്നതായാണ് പരാതി.

ചിലർ സ്റ്റേഷനെതിരെ പ്രവർത്തിക്കുന്നു

നീലേശ്വരം റെയിൽവേ സ്റ്റേഷൻ്റെ വളർച്ചയിൽ അസൂയ പൂണ്ട ചില വ്യക്തികൾ സ്റ്റേഷനെതിരെ പ്രവർത്തിക്കുന്നതായി യാത്രക്കാർ ആരോപിക്കുന്നു. ഇവർ ഉയർന്ന റെയിൽവേ ഉദ്യോഗസ്ഥർക്ക് മെയിൽ അയച്ചും സാമൂഹ്യ മാധ്യമ അക്കൗണ്ടുകളിൽ കയറിയും സ്റ്റേഷനെതിരെ തെറ്റായ വിവരങ്ങൾ പ്രചരിപ്പിക്കുന്നുണ്ടെന്നും പരാതിയുണ്ട്. കഴിഞ്ഞ സാമ്പത്തിക വർഷം യാത്രക്കാരുടെ എണ്ണത്തിലും വരുമാനത്തിലും നീലേശ്വരം സ്റ്റേഷൻ മുൻപന്തിയിലാണ്.

പ്രതിഷേധത്തിന് എംപി മുന്നോട്ട് വരണം

മലയോര, തീരദേശ പഞ്ചായത്തുകളിലെ ജനങ്ങളുടെ ഏക ആശ്രയമാണ് നീലേശ്വരം റെയിൽവേ സ്റ്റേഷൻ. എട്ടോളം പഞ്ചായത്തുകളിലെയും രണ്ട് മുൻസിപ്പാലിറ്റികളിലെയും ജനങ്ങൾ യാത്രയ്ക്കായി ഈ സ്റ്റേഷനെയാണ് ആശ്രയിക്കുന്നത്. റെയിൽവേയുടെ അവഗണനക്കെതിരെ മെയിൽ അയക്കുന്നതിന് പുറമെ എംപി ശക്തമായ പ്രതിഷേധം ഉയർത്തണമെന്ന് നാട്ടുകാർ ആവശ്യപ്പെടുന്നു. നീലേശ്വരത്തെയും പരിസരത്തുമുള്ള തദ്ദേശ സ്വയം ഭരണ സ്ഥാപനങ്ങളിലെ ജനപ്രതിനിധികളെയും സന്നദ്ധ സംഘടനകളെയും ഉൾപ്പെടുത്തി റെയിൽവേ സ്റ്റേഷൻ മാർച്ച് ഉൾപ്പെടെയുള്ള പ്രതിഷേധം സംഘടിപ്പിക്കാൻ എംപി മുന്നോട്ട് വരണമെന്നും നാട്ടുകാർ അഭ്യർത്ഥിച്ചു. ചെന്നൈ-മംഗലാപുരം-ചെന്നൈ മെയിൽ, മംഗലാപുരം-തിരുവനന്തപുരം അന്ത്യോദയ എക്സ്പ്രസ്, ഓഖ എക്സ്പ്രസ് തുടങ്ങിയ വണ്ടികൾക്ക് നീലേശ്വരത്ത് സ്റ്റോപ്പ് അനുവദിക്കണമെന്ന ആവശ്യം ശക്തമായിരിക്കുമ്പോഴാണ് റെയിൽവേ വീണ്ടും യാത്രക്കാരെ വെല്ലുവിളിക്കുന്നത്.

നീലേശ്വരത്തെ റെയിൽവേ അവഗണനയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Protests against railways for ignoring Nileshwaram station.

#Nileshwaram #Railways #KeralaNews #SpecialTrain #Protest #Kasargod