ആനച്ചാൽ–ഉച്ചൂളിക്കുതിർ റോഡിലെ വെള്ളക്കെട്ടിന് ശാശ്വത പരിഹാരം; അടിയന്തര നടപടിയുമായി നീലേശ്വരം നഗരസഭ

നീലേശ്വരം: (KasargodVartha) നഗരസഭയിലെ 23-ാം വാർഡിൽ ഉൾപ്പെടുന്ന ആനച്ചാൽ–ഉച്ചൂളിക്കുതിർ (ആനച്ചാൽ മടം) റോഡിലെ രൂക്ഷമായ വെള്ളക്കെട്ടിനും യാത്രാദുരിതത്തിനും ശാശ്വത പരിഹാരം കാണാൻ അടിയന്തര നടപടി സ്വീകരിക്കുമെന്ന് നഗരസഭാ ചെയർമാൻ പി പി മുഹമ്മദ് റാഫി അറിയിച്ചു. വെള്ളക്കെട്ട് ബാധിച്ച പ്രദേശം നേരിട്ട് സന്ദർശിച്ച ശേഷമാണ് അദ്ദേഹം ഇക്കാര്യം വ്യക്തമാക്കിയത്.

ഭൂമിശാസ്ത്രപരമായി താഴ്ന്ന പ്രദേശമായതിനാൽ റോഡ് നിർമിച്ച കാലം മുതൽ എല്ലാ മഴക്കാലത്തും ഇവിടെ ഗുരുതരമായ വെള്ളക്കെട്ട് രൂപപ്പെടുന്നുണ്ടെന്ന് ചെയർമാൻ പറഞ്ഞു. നൂറുകണക്കിന് കുടുംബങ്ങളും വിദ്യാർഥികളും ദിവസേന ആശ്രയിക്കുന്ന റോഡായതിനാൽ വർഷങ്ങളായി തുടരുന്ന യാത്രാദുരിതത്തിന് ശാശ്വത പരിഹാരം കാണാൻ നഗരസഭ ആത്മാർഥമായി ഇടപെടുകയാണെന്നും അദ്ദേഹം കൂട്ടിച്ചേർത്തു. ജനങ്ങളുടെ നിരന്തരമായ പരാതികളെ തുടർന്നാണ് നഗരസഭ വിഷയത്തിൽ അടിയന്തരമായി ഇടപെട്ടിരിക്കുന്നത്.

രണ്ട് ബദൽ പദ്ധതികൾ

വെള്ളക്കെട്ട് ഒഴിവാക്കുന്നതിനായി നഗരസഭ രണ്ട് പ്രധാന നിർദേശങ്ങളാണ് നിലവിൽ പരിശോധിക്കുന്നത്. നിലവിൽ മൂന്ന് മീറ്റർ മാത്രം വീതിയുള്ള റോഡിൽ ആവശ്യമായ ഭൂമി ലഭ്യമാക്കാൻ കഴിഞ്ഞാൽ ഇരുവശങ്ങളിലും ഓവുചാൽ നിർമിക്കുക എന്നതാണ് ഒന്നാമത്തെ നിർദേശം. നിലവിലെ റോഡ് നിലനിർത്തിക്കൊണ്ട് അതിനുള്ളിൽ തന്നെ ഡ്രെയിനേജ് സംവിധാനം ഒരുക്കി, അതിന് മുകളിലൂടെ വാഹനങ്ങൾക്ക് സുഗമമായി സഞ്ചരിക്കാവുന്ന രീതിയിൽ റോഡ് സജ്ജമാക്കുക എന്നതാണ് രണ്ടാമത്തെ കാര്യം.

സാങ്കേതിക സാധ്യതകൾ വിലയിരുത്തും

വരും ദിവസങ്ങളിൽ തന്നെ നഗരസഭയുടെ എൻജിനീയറിങ് വിഭാഗം സ്ഥലം സന്ദർശിച്ച് സാങ്കേതിക സാധ്യതകൾ വിലയിരുത്തുമെന്ന് ചെയർമാൻ അറിയിച്ചു. വലിയ സാമ്പത്തിക ബാധ്യതയില്ലാതെ ഡ്രെയിനേജ് സംവിധാനം ഒരുക്കി പ്രശ്നത്തിന് പരിഹാരം കാണാനാകുമെന്നാണ് പ്രതീക്ഷയെന്നും, ജനങ്ങൾ തിങ്ങിപ്പാർക്കുന്ന പ്രദേശത്തിൻ്റെ യാത്രാദുരിതം നഗരസഭ ഏറെ ഗൗരവത്തോടെയാണ് കാണുന്നതെന്നും അദ്ദേഹം വ്യക്തമാക്കി. സ്ഥലം സന്ദർശനത്തിൽ വാർഡ് കൗൺസിലറും നഗരസഭ ക്ഷേമകാര്യ സ്ഥിരംസമിതി ചെയർപേഴ്സനുമായ ഷമീന മുഹമ്മദ്, റാഷിദ് പൂമാടം, അഫ്സർ അഫ്സി എന്നിവരും ഉണ്ടായിരുന്നു.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പ്രാദേശിക വാർത്തകളും വിവരങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം.

Article Summary: The Nileshwaram Municipality has initiated urgent steps to find a permanent solution to the severe waterlogging on the Anachal-Uchoolikuthi road in the 23rd ward.

#NileshwaramMunicipality #KasaragodNews #WaterloggingIssue #LocalNews #KeralaNews #RoadDevelopment #AparnaNews