ട്രെയിൻ സ്റ്റോപ്പുകൾക്ക് വേണ്ടിയുള്ള പോരാട്ടം; നീലേശ്വരം നഗരസഭ റെയിൽവേ അധികൃതരുമായി ചർച്ച നടത്തി

നീലേശ്വരം: (KasargodVartha) റെയിൽവേ സ്റ്റേഷന്റെ വികസനകാര്യങ്ങൾ വിലയിരുത്താനായി സ്റ്റേഷൻ സന്ദർശിച്ച പാലക്കാട് റെയിൽവേ ഡിവിഷൻ മാനേജർക്ക്, വികസനവുമായി ബന്ധപ്പെട്ട പ്രായോഗിക നിർദേശങ്ങളടങ്ങിയ നിവേദനം നഗരസഭാ ചെയർപേഴ്സൺ ടി.വി. ശാന്ത കൈമാറി. 

പല ദീർഘദൂര ട്രെയിനുകൾക്കും നിലവിൽ നീലേശ്വരത്ത് സ്റ്റോപ്പില്ലാത്തതിനാൽ കിഴക്കൻ മലയോരപ്രദേശങ്ങളടക്കമുള്ള ഏഴ് പഞ്ചായത്തുകളിലെയും നീലേശ്വരം നഗരസഭയിലെയും ജനങ്ങൾ യാത്രാക്ലേശം നേരിടുന്നുണ്ട്. ഈ വിഷയം പരിഹരിക്കാൻ മുൻകൈയെടുക്കണമെന്നും, ചെന്നൈ മെയിലിന് സ്റ്റോപ്പ് അനുവദിക്കണമെന്നും നിവേദനത്തിൽ ആവശ്യപ്പെട്ടു. 

പ്ലാറ്റ്‌ഫോം വികസിപ്പിക്കണമെന്നും യാത്രക്കാർക്ക് മഴയും വെയിലുമേൽക്കാതെ നിൽക്കാൻ മുഴുവൻ പ്ലാറ്റ്‌ഫോമിലും മേൽക്കൂര സ്ഥാപിക്കണമെന്നും സൂചിപ്പിച്ചു. റെയിൽവേയുടെ അധീനതയിലുള്ള പടിഞ്ഞാറ് ഭാഗത്തെ വെള്ളക്കെട്ട് ഒഴിവാക്കുന്നതിനായി റെയിൽവേയുമായി സഹകരിച്ച് സംയുക്തമായി ഡ്രെയിനേജ് കം ഫുട്പാത്ത് നിർമ്മിക്കാൻ നഗരസഭ തയ്യാറാണെന്നും അധികൃതരെ അറിയിച്ചു. 

വൈസ് ചെയർമാൻ പി.പി. മുഹമ്മദ് റാഫി, വാർഡ് കൗൺസിലർ പി. വത്സല, ടി.കെ. അനീഷ്, ശൈലേഷ് ബാബു, കെ. സതീശൻ, സി. മോഹനൻ എന്നിവർ നിവേദക സംഘത്തിലുണ്ടായിരുന്നു.

പുതുതായി ചുമതലയേറ്റ പാലക്കാട് ഡിവിഷണൽ റെയിൽവേ മാനേജർ മധുക്കർ റാവുത്ത് ഇന്ന് നീലേശ്വരം റെയിൽവേ സ്റ്റേഷൻ സന്ദർശിച്ചു. ഈ മാസം അവസാനം തുടങ്ങാനിരിക്കുന്ന റെയിൽവേ സ്റ്റേഷൻ നവീകരണ പ്രവർത്തനങ്ങൾ ഉൾപ്പെടെയുള്ള കാര്യങ്ങൾ വിലയിരുത്തുന്നതിന്റെ ഭാഗമായാണ് അദ്ദേഹം എത്തിയത്. 

രണ്ടാം പ്ലാറ്റ്‌ഫോമിനും എഫ്.സി.ഐ. ഗോഡൗണിനും ഇടയിലുള്ള മലിനജലം കെട്ടിക്കിടക്കുന്നത് ഒഴിവാക്കാൻ എഫ്.സി.ഐ. യാർഡ് കോൺക്രീറ്റ് ചെയ്യുന്നതിനുള്ള ടെൻഡർ നടപടികൾ പൂർത്തിയായതായി അദ്ദേഹം അറിയിച്ചു. നിലവിലുള്ള പാർക്കിംഗ് ഏരിയ വിപുലീകരിക്കുന്നതിനുള്ള പ്രവർത്തനങ്ങൾ ഉടൻ ആരംഭിക്കുമെന്നും അദ്ദേഹം സൂചന നൽകി. 

നീലേശ്വരം റെയിൽവേ സ്റ്റേഷനിൽ ആദ്യമായി എത്തിയ ഡിവിഷണൽ റെയിൽവേ മാനേജരെ എൻ.ആർ.ഡി.സി. ഭാരവാഹികൾ പൂച്ചെണ്ട് നൽകി സ്വീകരിച്ചു. അഡീഷണൽ ഡിവിഷണൽ റെയിൽവേ മാനേജർ എസ്. ജയകൃഷ്ണൻ, സീനിയർ ഡിവിഷണൽ കൊമേഴ്‌സ്യൽ മാനേജർ അരുൺ തോമസ്, സീനിയർ ഡിവിഷണൽ ഓപ്പറേഷൻസ് മാനേജർ ബാലമുരളി, സ്റ്റേഷൻ നവീകരണ പ്രവർത്തനങ്ങൾക്ക് മേൽനോട്ടം വഹിക്കുന്ന ഇൻസ്‌പെക്ടർ ഓഫ് വർക്ക്‌സ് പ്രവീൺകുമാർ എന്നിവരും സംഘത്തിലുണ്ടായിരുന്നു. 

ഡിവിഷണൽ റെയിൽവേ മാനേജരുടെ നേതൃത്വത്തിലുള്ള സംഘത്തെ എൻ.ആർ.ഡി.സി. പ്രസിഡന്റ് എൻ. സദാശിവൻ, സെക്രട്ടറി എം. വിനീത്, വൈസ് പ്രസിഡന്റ് പി.യു.
ചന്ദ്രശേഖരൻ, ജോയിന്റ് സെക്രട്ടറി കെ. ബാബുരാജ്, ട്രഷറർ സി.എം. സുരേഷ് കുമാർ, എം. ബാലകൃഷ്ണൻ എന്നിവരുടെ നേതൃത്വത്തിൽ സ്വീകരിച്ചു.

നീലേശ്വരത്തിന്റെ റെയിൽവേ വികസനത്തെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Nileshwaram Municipality seeks new train stops and station upgrades.

#Nileshwaram, #Railway, #StationDevelopment, #Kerala, #PublicDemand, #Kasargod