വെള്ളക്കെട്ടും ചെളിയും നിറഞ്ഞ് നീലേശ്വരം മാർക്കറ്റ് ജംഗ്ഷൻ; യാത്ര ദുസ്സഹമായി, നിർമാണ കമ്പനിക്കെതിരെ പ്രതിഷേധം

നീലേശ്വരം: (KasargodVartha) കാലവർഷത്തിൻ്റെ മുന്നോടിയായി മഴ കനത്തതോടെ നീലേശ്വരം മാർക്കറ്റ് ജംഗ്ഷനിൽ വെള്ളക്കെട്ടും ചെളിയും രൂപപ്പെട്ടു. പൊട്ടിപ്പൊളിഞ്ഞ സർവീസ് റോഡുകളിലൂടെ ഗതാഗതം സുതാര്യമായി നടക്കാത്തതിനാൽ വാഹനങ്ങളുടെ നീണ്ടനിരയാണ് പ്രദേശത്ത് രൂപപ്പെടുന്നത്. ആംബുലൻസുകൾ പോലും വാഹനക്കുരുക്കിൽപ്പെടുന്ന സാഹചര്യമാണുള്ളത്. പ്രശ്നത്തിന് അധികൃതർ പരിഹാരം കാണാത്തതിൽ പ്രദേശവാസികള്‍ പ്രതിഷേധത്തിലാണ്.

യാത്ര ദുഷ്കരം

കാലവർഷം പൂർണമായും ആരംഭിച്ചാൽ മാർക്കറ്റ് ജംഗ്ഷനിലെ രണ്ട് സർവീസ് റോഡുകളിലൂടെയും യാത്ര ഏറെ ദുഷ്കരമാകുമെന്നാണ് പ്രദേശവാസികളുടെ ആശങ്ക. ആകാശപാത ആവശ്യം അംഗീകരിക്കാതെ ദേശീയപാതാ പദ്ധതിയുടെ ഭാഗമായി മണ്ണിട്ട് നികത്തി വൻ മതിലുകൾ നിർമിച്ചെങ്കിലും വാഹനങ്ങൾക്ക് സഞ്ചരിക്കാവുന്ന സർവീസ് റോഡുകളുടെ നിർമാണം ഇതുവരെ പൂർണമായിട്ടില്ലെന്നാണ് ആരോപണം.

മാർക്കറ്റ് ജംഗ്ഷനിലെ മീൻ മാർക്കറ്റിന് സമീപം വെള്ളം ഒഴുകിപ്പോകാൻ സൗകര്യമില്ലാത്തതിനാൽ വെള്ളക്കെട്ടാണ് രൂപപ്പെട്ടിരിക്കുന്നത്. ദേശീയപാത വികസന പ്രവർത്തനങ്ങൾക്ക് മുൻപ് ഓവുചാലുകളിലൂടെ വെള്ളം പുഴയിലേക്ക് ഒഴുകിപ്പോകുന്നതിനാൽ ഇത്ര പ്രതിസന്ധി മുൻപ് ഉണ്ടായിരുന്നില്ലെന്ന് പ്രദേശവാസികള്‍ പറയുന്നു.

അപകടഭീതിയിൽ യാത്രക്കാർ

ഓവുചാലിൻ്റെ നിർമാണം പാതിവഴിയിൽ നിർത്തിയതിനാൽ മഴവെള്ളം ഒഴുകിപ്പോകാതെ മീൻ മാർക്കറ്റിന് സമീപം കെട്ടിക്കിടക്കുകയാണ്. സർവീസ് റോഡുകൾ പല ഭാഗങ്ങളിലും തകർന്ന നിലയിലായതിനാൽ ഇരുചക്ര വാഹനയാത്രികർ അപകടഭീതിയിലാണ്.

അതേസമയം, നീലേശ്വരം പോലീസ് സ്റ്റേഷനു സമീപമുള്ള അണ്ടർപ്പാസിന് സമീപവും വെള്ളക്കെട്ടും ഗതാഗത സ്‌തംഭനവുമാണ് അനുഭവപ്പെടുന്നത്. തെരു റോഡിൽ നിന്ന് ഇറങ്ങിവരുന്ന ഭാഗങ്ങളിലടക്കം മഴവെള്ളം കെട്ടിക്കിടക്കുന്നത് യാത്രക്കാർക്ക് ബുദ്ധിമുട്ടുണ്ടാക്കുന്നുണ്ട്.

പ്രശ്നങ്ങൾ പരിഹരിക്കുന്നതിൽ നഗരസഭയും ബന്ധപ്പെട്ട വകുപ്പുകളും വേണ്ടത്ര ശ്രദ്ധ ചെലുത്തുന്നില്ലെന്നാണ് ആക്ഷേപം.

തുടരുന്ന സമരങ്ങൾ

ആകാശപാത വേണമെന്നാവശ്യപ്പെട്ട് നഗരസഭയുടെ നേതൃത്വത്തിലുള്ള കർമസമിതി ഒരുഭാഗത്തും, 57 ദിവസം പിന്നിട്ട ജനകീയ സമിതി മറുഭാഗത്തുമായി സമരങ്ങൾ തുടരുകയാണ്.

ഇതിനിടെ സമരങ്ങളാണ് നിർമാണം തടസ്സപ്പെടാൻ കാരണമെന്നാരോപിച്ച് ദേശീയപാത നിർമാണ കമ്പനിയായ മേഘ കൺസ്ട്രക്ഷൻ പ്രവൃത്തികൾ നിർത്തിവെച്ച നിലയിലുമാണ്. ഇതോടെ നിർമാണ കമ്പനിക്കെതിരെ പ്രതിഷേധമുയർന്നു.

യാത്രാദുരിതം അധികാരികളുടെ ശ്രദ്ധയിലെത്തിക്കാൻ ഈ വാർത്ത നിങ്ങളുടെ വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. കൂടുതൽ വാർത്തകൾ അറിയാൻ ഞങ്ങളുടെ ഫേസ്ബുക്ക് പേജും വാട്സ് ആപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജില്‍ ഈ വാര്‍ത്തയുടെ താഴെ കമൻ്റായി രേഖപ്പെടുത്തുക.

Article Summary: Severe waterlogging and muddy conditions at Nileshwaram Market Junction due to incomplete national highway service roads have caused major traffic blocks, sparking protests against the construction company and authorities.

#Nileshwaram #KasaragodNews #NationalHighway #Waterlogging #TrafficBlock #LocalProtest