ദേശീയപാത വികസനം; ചെർക്കള - തളിപ്പറമ്പ് റീച്ചുകൾ അവസാന ഘട്ടത്തിൽ, ജൂണിന് മുമ്പ് പണി തീർക്കാൻ മേഘ കൺസ്ട്രക്ഷൻ

കുഞ്ഞിക്കണ്ണൻ മുട്ടത്ത്

കാസർകോട്: (KasargodVartha) ദേശീയപാത 66 വികസന പദ്ധതിയുടെ ഭാഗമായി മേഘ കൺസ്ട്രക്ഷൻ കമ്പനി ഏറ്റെടുത്ത രണ്ട് പ്രധാന റീച്ചുകളിലെ നിർമ്മാണ പ്രവർത്തനങ്ങൾ അവസാന ഘട്ടത്തിലേക്ക്. ചെർക്കള–നീലേശ്വരം, നീലേശ്വരം–തളിപ്പറമ്പ് എന്നീ റീച്ചുകളിലാണ് പണി അതിവേഗം പുരോഗമിക്കുന്നത്. വരാനിരിക്കുന്ന മഴക്കാലത്തിന് മുമ്പ് തന്നെ പ്രധാന നിർമ്മാണങ്ങൾ പൂർത്തിയാക്കാൻ കഴിയുമെന്ന പ്രതീക്ഷയിലാണ് കമ്പനി അധികൃതർ. 

ചെർക്കള–നീലേശ്വരം റീച്ചിൽ 90 ശതമാനം പൂർത്തി

ചെർക്കള മുതൽ നീലേശ്വരം വരെയുള്ള റീച്ചിൽ ഇതിനകം 90 ശതമാനം പ്രവൃത്തികളും പൂർത്തിയായിട്ടുണ്ട്. ചില സർവ്വീസ് റോഡുകളുടെയും ഏതാനും പാലങ്ങളുടെയും അവസാന ഘട്ട മിനുക്കുപണികൾ മാത്രമാണ് ഇനി അവശേഷിക്കുന്നത്. 

ചെങ്കള വയൽ ഭാഗത്ത് റോഡിന്റെ ഒരു വശത്തെ നിർമ്മാണം മാത്രമാണ് ഇപ്പോൾ ബാക്കിയുള്ളത്. ജൂൺ മാസത്തിന് മുമ്പ് അധികമായി വരുന്ന ചെറിയ ജോലികൾ ഒഴികെയുള്ളവ പൂർത്തിയാക്കി ഗതാഗതത്തിന് സജ്ജമാക്കാനാണ് കമ്പനിയുടെ നീക്കം.

നീലേശ്വരം–തളിപ്പറമ്പ് റീച്ചിലെ സ്ഥിതി

നീലേശ്വരം മുതൽ തളിപ്പറമ്പ് വരെയുള്ള റീച്ചിലും നിർമ്മാണം 87 ശതമാനം പിന്നിട്ടു കഴിഞ്ഞു. ഈ മാസം അവസാനത്തോടെ 90 ശതമാനം പ്രവൃത്തി പൂർത്തിയായതായി റിപ്പോർട്ട് സമർപ്പിക്കാൻ സാധിക്കുമെന്ന് അധികൃതർ കരുതുന്നു. എന്നാൽ ചെറുവത്തൂരിൽ നടക്കുന്ന അടിപ്പാത സമരം ഈ ഭാഗത്തെ പണികളെ ബാധിച്ചിട്ടുണ്ട്. 

നിലവിലുള്ള മേൽപ്പാലത്തിന്റെ ഇരുവശത്തും 50 മീറ്റർ വീതം ഒഴിവാക്കി സർവ്വീസ് റോഡ് രണ്ട് ട്രാക്ക് ആക്കി നിർമ്മിക്കാമെന്ന കമ്പനിയുടെ നിർദ്ദേശം സമരസമിതി തള്ളിയിരുന്നു. എങ്കിലും ചെറുവത്തൂർ അടിപ്പാതയ്ക്കായി കേന്ദ്ര സർക്കാരിന്റെ പ്രത്യേക ഉത്തരവ് ഉടൻ ഉണ്ടാകുമെന്നാണ് സൂചന.

വൈകുന്നതിന് പിഴയുമായി അതോറിറ്റി

യഥാർത്ഥ കരാർ പ്രകാരം കഴിഞ്ഞ വർഷം ഡിസംബറിൽ പണി പൂർത്തിയാക്കേണ്ടതായിരുന്നു. സാങ്കേതിക തടസ്സങ്ങൾ കാരണം മൂന്ന് മാസം കൂടി കാലാവധി നീട്ടി നൽകിയെങ്കിലും നിർമ്മാണം പൂർണ്ണമായി തീർന്നിട്ടില്ല. ഈ സാഹചര്യത്തിൽ കാലാവധി ലംഘിച്ച റീച്ചുകളിൽ കരാർ കമ്പനികളിൽ നിന്ന് ദിവസേന കുറഞ്ഞത് 60,000 രൂപ വീതം പിഴ ഈടാക്കാൻ ദേശീയപാതാ അതോറിറ്റി നടപടി തുടങ്ങിയിട്ടുണ്ട്. കരാറുകാർ നൽകിയ ബോണ്ട് തുകയിൽ നിന്നാണ് ഈ പിഴ ഈടാക്കുന്നത്.

സംസ്ഥാനത്തെ മൊത്തം പുരോഗതി

തലപ്പാടി മുതൽ മുക്കോല വരെയുള്ള 644 കിലോമീറ്റർ പാത 22 റീച്ചുകളായാണ് നിർമ്മാണം നടക്കുന്നത്. ഇതിൽ ഇതുവരെ അഞ്ച് റീച്ചുകളിൽ മാത്രമാണ് പണി പൂർത്തിയായിരിക്കുന്നത്. നിലവിൽ സംസ്ഥാനത്തെ ആകെ ദേശീയപാത വികസന പ്രവർത്തനങ്ങളിൽ 64 ശതമാനം പ്രവൃത്തി പൂർത്തിയായതായി ഔദ്യോഗിക കണക്കുകൾ വ്യക്തമാക്കുന്നു. ഭൂരിഭാഗം റീച്ചുകളിലും 2021 നവംബറിലാണ് നിർമ്മാണം ആരംഭിച്ചത്.

കാസർകോട് ജില്ലയിലെ ദേശീയപാത വികസനത്തെക്കുറിച്ചും പുതിയ ടോൾ നിരക്കുകളെക്കുറിച്ചും സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ദേശീയപാതയിലെ യാത്രാ വിശേഷങ്ങളും പുതിയ അപ്‌ഡേറ്റുകളും നിങ്ങളുടെ സുഹൃത്തുക്കൾക്കും നാട്ടുകാർക്കും വാട്സ്ആപ്പ് ഗ്രൂപ്പുകളിൽ ഷെയർ ചെയ്യൂ. നിങ്ങളുടെ അഭിപ്രായങ്ങൾ ഫേസ്ബുക്ക് പോസ്റ്റിൽ കമന്റായി രേഖപ്പെടുത്താൻ മറക്കരുത്.

Article Summary: NH 66 construction in Kasaragod by Megha Construction is in its final stage, with 90% work completed on the Cherkala-Nileshwaram reach.

#NH66 #KasaragodNews #NationalHighwayDevelopment #MeghaConstruction #Cherkala #Nileshwaram #KeralaInfrastructure #BreakingNews #NileshwaramTaliparamba