ഡയോസ്കോറിയ ബാലകൃഷ്ണനി; ഒരു പോലീസ് ഉദ്യോഗസ്ഥൻ്റെ പേരിൽ സസ്യം അറിയപ്പെടുന്നത് രാജ്യത്ത് ആദ്യം

കാസർകോട്: (KasargodVartha) രാജ്യത്തെ പോലീസ് സേനയ്ക്ക് മാതൃകയായി കേരളത്തിലെ ഒരു പോലീസ് ഉദ്യോഗസ്ഥന്റെ പേരിൽ അപൂർവയിനം സസ്യം അറിയപ്പെടുന്നു. പശ്ചിമഘട്ടത്തിൽ നിന്ന് പുതിയൊരു തദ്ദേശീയ കിഴങ്ങ് ഇനത്തെയാണ് ഗവേഷകർ കണ്ടെത്തിയത്. 

ഈ വന്യ ഭക്ഷ്യ ഇനങ്ങളെക്കുറിച്ച് എം.എസ്. സ്വാമിനാഥൻ ഗവേഷണ നിലയത്തിൽ ഡോ. എം.എസ്. സ്വാമിനാഥന്റെയും ഡോ. എൻ. അനിൽകുമാറിൻ്റെയും ശിക്ഷണത്തിൽ ഗവേഷണം നടത്തിയ, കേരള പോലീസിലെ സീനിയർ ഗ്രേഡ് ഡിവൈഎസ്പി കൂടിയായ ഡോ. വി. ബാലകൃഷ്ണനോടുള്ള ആദരസൂചകമായി, ഈ പുതിയ ഇനത്തിന് ഡയോസ്കോറിയ ബാലകൃഷ്ണനി (Dioscorea balakrishnanii) എന്ന് പേര് നൽകി.

ഒരു സസ്യം ഡോ. ബാലകൃഷ്ണന്റെ പേരിൽ അറിയപ്പെടുന്നത് ഇത് രണ്ടാം തവണയാണ്. വയനാടൻ മലനിരകളിൽ നിന്ന് കണ്ടെത്തിയ 'ടൈലോഫോറ ബാലകൃഷ്ണനി' ആയിരുന്നു ആദ്യത്തേത്. ജൈവവൈവിധ്യങ്ങളെക്കുറിച്ചുള്ള ഗവേഷണത്തിന് നൽകിയ സംഭാവനകൾ മാനിച്ച് ആദരസൂചകമായാണ് സഹഗവേഷകർ ഡോ. ബാലകൃഷ്ണന്റെ പേര് നൽകിയത്. ഒരു പോലീസ് ഉദ്യോഗസ്ഥൻ്റെ പേരിൽ സസ്യം നാമകരണം ചെയ്യുന്നത് രാജ്യത്ത് ആദ്യമായിട്ടായിരിക്കും. 

കാസർകോട് ജില്ലയിലെ അരവത്ത് സ്വദേശിയും പ്രശസ്ത കഥകളി ആചാര്യനായിരുന്ന നാട്യരത്‌നം കണ്ണൻ പാട്ടാളി ആശാൻ്റെ ഇളയ മകനാണ് ബാലകൃഷ്ണൻ പാട്ടാളി. ഭാര്യ സുധ ഉദുമ ഹയർസെക്കൻഡറി സ്കൂൾ അധ്യാപികയും സ്പൈഡർ ഗവേഷകയുമാണ്. മക്കൾ ധ്യാൻ, തീർത്ഥ.

പശ്ചിമഘട്ടത്തിലെ വയനാടൻ പ്രദേശങ്ങൾ തനതായ ഭക്ഷ്യയോഗ്യമായ കിഴങ്ങ് ഇനങ്ങളാൽ സമ്പന്നമാണ്. സാധാരണയായി കൃഷിചെയ്യുന്ന കാച്ചിൽ അഥവാ കാവത്ത് എന്നറിയപ്പെടുന്ന കിഴങ്ങുകളുടെ വന്യ ബന്ധുക്കളാണ് ഡയോസ്കോറിയ ഇനത്തിൽപ്പെട്ട കിഴങ്ങുകൾ. 

ഡയോസ്കോറിയേസി (Dioscoreaceae) എന്ന സസ്യകുടുംബത്തിൽപ്പെട്ട ഇവയിൽ, പുതുതായി കണ്ടെത്തിയ ഡയോസ്കോറിയ ബാലകൃഷ്ണനി ഉൾപ്പെടെ 14-ലധികം ഇനങ്ങളിലായി ഏകദേശം 23 വ്യത്യസ്ത വൈവിധ്യങ്ങൾ വയനാട്ടിൽ നിന്ന് കണ്ടെത്തിയിട്ടുണ്ട്. ഇതിൽ കാട്ടുകാച്ചിൽ കൂടാതെ ആരേസീയ കുടുംബത്തിൽപ്പെട്ട കാട്ടുചേനകളും കാട്ടുചേമ്പിലെ ഇനങ്ങളും ഏറെ പ്രധാനപ്പെട്ടവയാണ്.

ഈ കിഴങ്ങുകൾ ആദിവാസി സമൂഹങ്ങളുടെ പ്രധാന ഭക്ഷണ സ്രോതസ്സുകളാണ്. ഇവയിൽ ചിലത് വിഷമുള്ളവയും ചിലത് ഔഷധഗുണമുള്ളവയും മറ്റു ചിലത് ഭക്ഷ്യയോഗ്യവുമാണ്. ഓരോ കിഴങ്ങിനും അതിൻ്റെ രൂപം, നീളം, നിറം, ഇല, മുള്ളുകൾ, വള്ളികൾ, രുചി, നാരുകൾ തുടങ്ങിയവയുടെ പ്രത്യേകതകൾക്കനുസരിച്ച് തനതായ നാടൻ പേരുകളുണ്ട്. 

മഞ്ഞനൂറ, നാര, നെയ് നൂറ, വെള്ള നൂറ, നോക്കപ്പ, നാരക്കവല, വെണ്ണി, കവലക്കിഴങ്ങ്, ഹെക്ക് എന്നിവയെല്ലാം ഇവയിലെ വ്യത്യസ്ത ഇനങ്ങളാണ്. നിത്യഹരിത ചോലവനങ്ങളോട് ചേർന്ന പ്രദേശങ്ങളിൽ കണ്ടുവന്നിരുന്ന, ശാസ്ത്രലോകം ഇതുവരെ തിരിച്ചറിയാതിരുന്ന 'ചോല കിഴങ്ങ്' എന്ന കിഴങ്ങിനാണ് ഇപ്പോൾ ഡയോസ്കോറിയ ബാലകൃഷ്ണനി എന്ന് നാമകരണം ചെയ്തിരിക്കുന്നത്.

ഈ ചെടിയിൽ ആൺ, പെൺ ഇനങ്ങൾ ഉള്ളതിനാൽ കഴിഞ്ഞ പത്ത് വർഷമായി ഇത് നിരന്തരം നിരീക്ഷിച്ചു പൂക്കളുടെ വ്യത്യാസങ്ങൾ ഉൾപ്പെടെ രേഖപ്പെടുത്തിയാണ് പുതിയ ഇനമായി കണ്ടെത്തിയത്. 

വയനാട് എം.എസ്. സ്വാമിനാഥൻ റിസർച്ച് ഫൗണ്ടേഷനിലെ പിച്ചൻ എം. സലിം, ആലപ്പുഴ സനാതനധർമ്മ കോളേജിലെ ബോട്ടണി അസിസ്റ്റന്റ് പ്രൊഫസർ ഡോ. ജോസ് മാത്യു, തിരുവനന്തപുരം കേരള കാർഷിക സർവകലാശാലയിലെ അസിസ്റ്റന്റ് പ്രൊഫസർ ഡോ. എം.എം. സഫീർ എന്നിവരാണ് ഈ ഗവേഷണത്തിന് നേതൃത്വം നൽകിയത്. ഇതുസംബന്ധിച്ച പഠന റിപ്പോർട്ട് അന്താരാഷ്ട്ര ശാസ്ത്ര ജേണലായ 'സ്പീഷീസ് (Species)'ന്റെ പുതിയ ലക്കത്തിൽ പ്രസിദ്ധീകരിച്ചിട്ടുണ്ട്.

തനതായ ആവാസവ്യവസ്ഥകളുടെ സംരക്ഷണത്തിലൂടെ ഭക്ഷ്യസുരക്ഷ, കാർഷിക വികസനം, ഔഷധ മേഖല എന്നിവയ്ക്ക് ഈ കിഴങ്ങുകൾ ഏറെ പ്രാധാന്യമുള്ളതാണ്. വയനാടൻ ജൈവവൈവിധ്യം ഇനിയും പൂർണ്ണമായി രേഖപ്പെടുത്തപ്പെട്ടിട്ടില്ല എന്നതിൻ്റെ സൂചന കൂടിയാണിതെന്ന് ഡോ. ജോസ് മാത്യു അഭിപ്രായപ്പെട്ടു.

കാലാവസ്ഥാ വ്യതിയാനത്തെയും വന്യജീവി സംഘർഷങ്ങളെയും അതിജീവിക്കാൻ കഴിവുള്ള തനത് വന്യ ഭക്ഷ്യ വിഭവങ്ങളെക്കുറിച്ച് പശ്ചിമഘട്ടത്തിൽ ഇനിയും സമഗ്രമായ പഠനം നടത്തേണ്ടതുണ്ടെന്ന് ജൈവവൈവിധ്യ ബോർഡ് ചെയർമാൻ ഡോ. എൻ. അനിൽകുമാർ അഭിപ്രായപ്പെട്ടു.

ഗവേഷണ സ്ഥാപനങ്ങളുടെയും പരിസ്ഥിതി സംഘടനകളുടെയും സിറ്റിസൺ സയന്റിസ്റ്റുകളുടെയും ജൈവവൈവിധ്യ പരിപാലന സമിതികളുടെയും ഇടപെടൽ വഴി കേരള വനാതിർത്തികൾ വനം-വന്യജീവി-മനുഷ്യബന്ധം പരസ്പര പൂരകമാക്കാൻ സഹായിക്കുമെന്നും അദ്ദേഹം കൂട്ടിച്ചേർത്തു.

കേരള പോലീസിന് അഭിമാനമായ ഈ നേട്ടം നിങ്ങൾക്കും പങ്കുവെക്കാം. ഈ വാർത്തയെക്കുറിച്ച് നിങ്ങളുടെ അഭിപ്രായം താഴെ കമന്റ് ചെയ്യൂ.

Article Summary: A new plant species discovered in Western Ghats named after a Kerala Police officer.

#KeralaPolice #PlantDiscovery #KeralaNews #WesternGhats #DioscoreaBalakrishnanii #Kasaragod