Development | മികച്ച സൗകര്യങ്ങളോടും സംവിധാനങ്ങളോടും കൂടി കാസർകോട് ജനറൽ ആശുപത്രിയിൽ പുതിയ മോർച്ചറി നിർമിക്കുന്നു; 29ന് ശിലാസ്ഥാപനം

കാസർകോട്: (KasargodVartha) ജനറൽ ആശുപത്രിയിൽ പുതിയ മോർച്ചറി നിർമ്മാണം ആരംഭിക്കുന്നു. എൻ എ നെല്ലിക്കുന്ന് എംഎൽഎയുടെ ആസ്തി വികസന ഫണ്ടിൽ നിന്ന് അനുവദിച്ച ഒരു കോടി ഇരുപത് ലക്ഷം രൂപ ചിലവഴിച്ചാണ് ഈ പദ്ധതി നടപ്പിലാക്കുന്നത്. ഒക്ടോബർ 29 ചൊവ്വാഴ്ച രാവിലെ 10 മണിക്ക് നടക്കുന്ന ചടങ്ങിൽ മോർച്ചറിയുടെ ശിലാസ്ഥാപനം നിർവഹിക്കും. 

കേരളത്തിൽ രാത്രികാല പോസ്റ്റ്‌മോർട്ടം നടത്തുന്നത് ഇപ്പോൾ കാസർകോട് ജനറൽ ആശുപത്രിയിൽ മാത്രമാണെന്നത് ശ്രദ്ധേയമാണ്. ഇതിനായി എൻ എ നെല്ലിക്കുന്ന് എംഎൽഎ നിയമസഭക്കകത്തും പുറത്തും നിയമപരമായും ഏറെ പോരാടിയിരുന്നു. 

വൈകുന്നേരം നാല് മണിക്കു ശേഷമുള്ള അപകടങ്ങളിൽ മരണപ്പെടുന്നവരുടെ മൃതദേഹങ്ങൾ പിറ്റേ ദിവസം വരെ മോർച്ചറിയുടെ പുറത്ത് കാത്തിരിക്കേണ്ടി വന്നിരുന്ന സഹോദരങ്ങളുടെ വിലാപവും കണ്ണീരുമാണ് ഇതിന് പ്രേരണയായതെന്ന് എൻ എ നെല്ലിക്കുന്ന് എംഎൽഎ പറഞ്ഞു. 

നല്ല സൗകര്യങ്ങളോടും സംവിധാനങ്ങളോടും കൂടിയ മോർച്ചറി നിർമാണം വഴി ദാരുണ സംഭവങ്ങൾ ഉണ്ടാകുമ്പോൾ ജനങ്ങൾ അനുഭവിക്കുന്ന ദുരിതങ്ങൾക്ക് പരിഹാരമാകുമെന്നാണ് അധികൃതർ പ്രതീക്ഷിക്കുന്നത്.

#Kasargod #Kerala #hospital #mortuary #construction #development #healthcare #MLA #N.A.Nellikkunnu