Infrastructure | പുലിക്കുന്നില് കാസര്കോട് നഗരസഭയുടെ പുതിയൊരു കോണ്ഫറന്സ് ഹാള് കൂടി വരുന്നു
● 2700 ചതുരശ്ര അടി വിസ്തീർണത്തിൽ നിർമ്മാണം
● 200 പേർക്ക് ഇരിക്കാവുന്ന സൗകര്യം
● 75 ലക്ഷം രൂപയാണ് നിർമ്മാണ ചെലവ്
● താഴത്തെ നിലയിൽ കടമുറികളും ഉണ്ടാകും
കാസർകോട്: (KasargodVartha) നഗരത്തിന്റെ ഹൃദയഭാഗത്ത്, പുലിക്കുന്നിൽ നഗരസഭയുടെ പുതിയൊരു കോൺഫറൻസ് ഹാൾ ഉയരുന്നു. നിലവിലെ മുനിസിപ്പൽ കോൺഫറൻസ് ഹാളിന് സമീപം 75 ലക്ഷം രൂപയോളം ചിലവിട്ടാണ് ആധുനിക സൗകര്യങ്ങളോടുകൂടിയ പുതിയ ഹാൾ നിർമ്മിക്കുന്നത്. നഗരത്തിലെ വർദ്ധിച്ചുവരുന്ന സമ്മേളന ആവശ്യങ്ങൾക്കും സാംസ്കാരിക പരിപാടികൾക്കും ഈ പുതിയ ഹാൾ ഒരു മുതൽക്കൂട്ടാകുമെന്നാണ് പ്രതീക്ഷ.
ഇതിനുള്ള ടെണ്ടർ നടപടികളടക്കം പൂർത്തിയായതായി നഗരസഭാ ചെയർമാൻ അബ്ബാസ് ബീഗം അറിയിച്ചു. പുതിയ കോൺഫറൻസ് ഹാൾ 2700 സ്ക്വയർ ഫീറ്റ് വിസ്തൃതിയിൽ രണ്ട് നിലകളിലായാണ് നിർമ്മിക്കുന്നത്. നഗരസഭാ കൗൺസിൽ ഹാളിന് സമീപത്തെ വളവിൽ നിർമിക്കുന്ന ഈ കെട്ടിടത്തിന്റെ ഒന്നാം നിലയിൽ വിശാലമായ കോൺഫറൻസ് ഹാളും താഴത്തെ നിലയിൽ അഞ്ച് കടമുറികളും ഉണ്ടാകും. നഗരസഭയുടെ തനത് ഫണ്ട് കണ്ടെത്തുന്നതിന്റെ ഭാഗമായാണ് താഴത്തെ നിലയിൽ കടമുറികൾ നിർമ്മിക്കുന്നത്.
ഏകദേശം 200 പേർക്ക് ഇരിക്കാവുന്ന രീതിയിൽ മനോഹരമായാണ് ഹാൾ സജ്ജീകരിക്കുന്നത്. പ്രവേശന സൗകര്യത്തിനായി റാംപ് സംവിധാനവും ഉണ്ടായിരിക്കും. കാസർകോട് നഗരത്തിൽ സാംസ്കാരിക പരിപാടികൾക്കും മറ്റ് സമ്മേളനങ്ങൾക്കും നിലവിൽ ഏറ്റവും കൂടുതൽ ആളുകൾ ആശ്രയിക്കുന്നത് മുനിസിപ്പൽ കോൺഫറൻസ് ഹാളാണ്. മിക്ക ദിവസങ്ങളിലും ഹാൾ ബുക്ക് ചെയ്യപ്പെടുന്ന സാഹചര്യമാണുള്ളത്. ഈ പരിമിതി കണക്കിലെടുത്താണ് പുതിയ ഹാൾ നിർമ്മിക്കാൻ നഗരസഭ തീരുമാനിച്ചത് എന്ന് ചെയർമാൻ കൂട്ടിച്ചേർത്തു.
നിലവിലെ കോൺഫറൻസ് ഹാളിന് 2002 നവംബർ 11ന് അന്നത്തെ നഗരസഭാ ചെയർമാൻ ടി ഇ അബ്ദുല്ലയാണ് തറക്കല്ലിട്ടത്. നിർമ്മാണം പൂർത്തിയാക്കിയ ശേഷം 2005 ഏപ്രിൽ അഞ്ചിന് സി ടി അഹ്മദലി എം.എൽ.എ ഹാൾ ഉദ്ഘാടനം ചെയ്തു. പുതിയ ഹാൾ വരുന്നതോടെ നഗരത്തിലെ സമ്മേളന സൗകര്യങ്ങൾക്ക് ഒരു പുതിയ ഉണർവ് ലഭിക്കുമെന്നാണ് വിലയിരുത്തൽ.
#Kasaragod #ConferenceHall #KeralaDevelopment #Municipality #Infrastructure #LocalNews
Tags
Share this story
